16 YACHACHIKUY
¿Imakunatan Jesús ruwarqan kay pachapi kashaspa?
¿Imatan runakuna yachanku Jesusmanta? Wakinqa yachanku wawa kashaqtin imakunapichus tarikusqanmanta, runakunata yachachispa purisqanmanta, imayna wañupusqanmanta imallan. Ichaqa payta reqsinanchispaqqa allintan yachananchis kay pachapi kashaspa imakunatachus ruwarqan chayta. Kay yachachikuypin chaykunamanta yachasunchis, yachallasuntaqmi imaynatachus paymanta allinta yachay yanapawasunman chaytapas.
1. ¿Ima ruwaymi Jesuspaq aswan allin karqan?
Jesuspaqqa “Diospa gobiernonmanta allin willakuykunata” runakunaman willaymi aswan allinqa karqan (leey Lucas 4:43). Payqa Jehová Diospa gobiernon jamunanmantan astawan yachachirqan, chay gobiernon runakunaq llapa sasachakuyninkunata tukuchipunqa. a Kinsa wata kuskanmi Jesusqa tukuy tiempo llank’arqan chay allin willakuyta willaspa (Mateo 9:35).
2. ¿Imaraykun Jesús milagrokunata ruwarqan?
Biblian nin: “Jesusqa Diospa kachamusqanmi karqan, paytaqa sut’itan Dios reqsichirqan [...] milagrokunata, admirakunapaq kaqkunata, señalkunata ima ruwachispa”, nispa (Hechos 2:22). Jesusqa Diospa atiyninwanmi qochapi jatun wayrata thanichirqan, waranqanpi runakunaman mijuchirqan, onqosqakunata qhaliyachirqan, wañusqakunatapas kausarichirqan (Mateo 8:23-27; 14:15-21; Marcos 6:56; Lucas 7:11-17). Chaykunata ruwasqanwanmi Jesusqa sut’ita rikuchirqan Diospuni payta kachamusqanta, Dioslla imatapas allichananpaq atiyniyoq kasqanta ima.
3. ¿Imatan yachasunman Jesuspa imayna kausasqanmanta?
Jesusqa tukuy tiempon Jehová Diosta kasukurqan (leey Juan 8:29). Payqa qatikachasqaña kaspapas wañunankaman Taytanpa munayninta ruwarqan. Chaywanmi Jesusqa qatikuqninkunaman “ejemplota churarqan, chhaynapi tukuy yuyaywan yupinta qatikunankupaq” (1 Pedro 2:21). Chhaynaqa noqanchispas sasachakuykunapiña tarikuspapas atisunmanmi Diosta kasukuyta.
ASTAWAN YACHASUNCHIS
Kaypin yachasunchis imaynatas Jesús Diosmanta willarqan chayta, imaynatas milagrokunata ruwarqan chaytapas.
4. Jesusqa allin willakuykunatan willarqan
Jesusqa karu llaqtakunatan purirqan allin willakuykunata willaspa. Leeychis Lucas 8:1 textota, jinaspa jamuq tapuykunaman jina parlariychis:
-
¿Payman qayllaykuq runakunallamanchu Jesús Diosmanta willarqan?
-
¿Imatan Jesús ruwarqan runakunata tarinanpaq?
Diosqa willarqanñan Cristo allin willakuykuna willananmanta. Leeychis Isaías 61:1, 2 textota, jinaspa jamuq tapuykunaman jina parlariychis:
-
¿Imaynatan Jesús profeta Isaiaspa willasqanta junt’arqan?
-
¿Necesitankuchu runakuna chay allin willakuykuna uyariyta?
5. Jesusqa runakunaq allinninpaqmi imatapas yachachirqan
Jesusqa Diospa gobiernonmantan allin willakuykunata willarqan, tukuy ima yachachisqanpas runakunaq allinninpaqmi karqan. Wakinmanta kunan yacharisunchis. Leeychis Mateo 6:14, 34; 7:12 textokunata, jinaspa jamuq tapuykunaman jina parlariychis:
-
¿Imakunatan Jesús yachachirqan chay versiculokunapi?
-
¿Chay yachachikuykuna yanapanmanchu kay tiempopi runakunata?
6. Jesusqa milagrokunatan ruwarqan
Jehová Diosmi Jesusman atiyta qorqan milagrokunata ruwananpaq. Juj kaqmanta yachanapaq leeychis Marcos 5:25-34 textota, otaq VIDEOTA qhawaychis, jinaspa jamuq tapuykunaman jina parlariychis:
-
¿Imamantan mana iskayarqanchu videopi rikusqanchis onqosqa warmi?
-
¿Iman astawan kusichisunki chay milagromanta?
Leeychis Juan 5:36 textota, jinaspa jamuq tapuyman jina parlariychis:
-
¿Imatan sut’ita “rikuchin” Jesuspa milagrokuna ruwasqan?
¿Yacharqankichu?
Jesuspa vidanmantaqa Bibliapi tawa librokunapin willashan. Chaykunan: Mateo, Marcos, Lucas, Juan ima. Chay librokunatan nikun Evangeliokuna nispa. Chaykunapin willakushan Jesuspa imaymana ruwasqanmanta. Chaykunata estudiaspaqa astawanmi Jesusmanta yachasunchis.
-
MATEOQ WILLASQAN
Mateon ñaupaq kaq librotaqa qelqarqan. Chay libroqa Jesuspa yachachisqankunamantan willashan, astawanqa Diospa gobiernonmanta yachachisqanmanta.
-
MARCOSPA WILLASQAN
Marcospa qelqasqan libroqa pisillan. Chaypiqa pisillapin willashan Jesuspa imaymana ruwasqanmanta.
-
LUCASPA WILLASQAN
Lucasmi willan Diosmanta mañakuyqa allinpuni kasqanmanta, Jesús warmikunata respetowan rikusqanmanta ima.
-
JUANPA WILLASQAN
Juanqa willashan imayna runachus Jesús karqan, amigonkunawan juj runakunawanpas imaynatachus rimaq chaykunamantan.
WAKIN RUNAKUNAN NINKU: “Jesusqa juj allin runallan karqan”, nispa.
-
¿Imaninkitaq chaymanta?
IMATAN YACHAMURQANCHIS
Jesusqa Diospa gobiernonmantan willarqan, milagrokunatan ruwarqan, Diospa munayninman jinan tukuy imatapas ruwarqan.
Yuyarisun
-
¿Ima llank’aymi Jesuspaq aswan allin karqan?
-
¿Imatan sut’ita rikuchirqan Jesuspa milagrokuna ruwasqan?
-
¿Ima allin yachachikuykunatan Jesús yachachirqan?
ASTAWAN YACHANAYKIPAQ
¿Imamantan Jesús astawan rimarqan? Chaymantan kaypi yachanki.
“¿Imaraykun Jesús yachachirqan Diospa gobiernonmanta?” (Qhawaq, 2014 watapi 1 noviembre)
Jesuspa milagrokuna ruwasqanqa cheqaqpunin, chaymantan kaypi yachanki.
“¿Imatan yachasunman Jesuspa milagrokuna ruwasqanmanta?” (Qhawaq, 2004 watapi 15 julio)
Juj runan Bibliata estudiaspa yacharqan Jesusqa mana payllapichu piensasqanta. ¿Imatan ruwarqan chayta yachaspa?
Kaypin yachanki jayk’aqchus pasasqanman jina Jesuspa imakunachus ruwasqanta.
“Jesuspa ruwasqankunamanta willakuy” (Mosoq Pacha Biblia, astawan yachanapaq A7)
a Diospa gobiernonmantaqa 31-33 yachachikuykunapin astawan yachasun.
Astawan yachanaykipaq
SAPA KUTILLA TAPUKUSQANKU
¿Imaynatan Jehová Diospa testigonkuna Bibliamanta yachachinku?
Jehová Diospa testigonkunawan Bibliata estudiaspaqa, munasqayki Bibliawanmi estudiawaq. Chaymantapas llapa familiaykita amigoykikunata iman invitawaq. Chayqa manan qolqepaqchu.
