16 YACHANA PARTI
Jesusca cai Allpaibi ausha imatata rara
Maican runagunaga Jesuspi yuyasha, shuc llullucu, shuc profeta, o huañungarauc runa shinata ricunaun. Chasna acpihuas, cai Allpaibi paiba causaimanda yachasha, pai imasa ashcata ricsinata ushangui. Cai yachana partibiga, Jesus cai Allpaibi imasa causashcata, pai rashcaguna canda imasa yanapangaraushcata ricushun.
1. Jesusca imatata punda pactachira
Jesusca “Diospa ali mandanamanda cuintasha yachachisha purira” (Lucas 8:1ta leipai). Jesusca Diospa gubirnumanda gustu cuintaigunata predicara. Cai gubirnuga runagunahua turmintugunata tucuchingaraun. a Quimsa huata chaupitami, Jesusca cai gustu cuintaita yachachingahua sinzhita tarabara (Mateo 9:35).
2. Jesusca imahuata milagrogunata rara
Bibliaga Jesus rashca milagrogunamanda riman. Jesusca “ashca mana pihuas rashcagunata Diospa ushaihuan rasha ambira” (Hechos 2:22). Jesusca Diospa ushaihuan, sinzhi huairata, mar ulasta casilla saquiri nisha mandara, ashca huaranga runagunata carara, ungushcagunata ambira, huañushcagunatas causachira (Mateo 8:23-27; 14:15-21; Marcos 6:56; Lucas 7:11-17). Jesus rashca milagrogunaga, Dios cachashcatami ricuchira. Chasnallata, caiga Jehova ñucanchi turmintugunata alichingahua ushaita charishcata ricuchira.
3. Jesus imasa causashcamanda imatata yachanchi
Tucui urasmi, Jesusca Jehovata casura (Juan 8:29ta leipai). Ashca runaguna turmintachicpihuas, Jesusca paiba Yaya nishcata pactachisha huañunagama sirvira. Paiba ejemplohuan, ñucanchi turmintugunata charishahuas, Diosta sirvisha catina ushashcata yachachitucuranchi. Casnami, Jesucristoga pai shina “purinauchun nishami causara” (1 Pedro 2:21).
CAIMANDA MASTA YACHAI
Jesus imasa Diosmanda gustu cuintaigunata yachachishcata, milagrogunata rashcata ricushun.
4. Jesusca Diosmanda gustu cuintaigunata runagunata yachachira
Jesusca Diospa gustu cuintaimanda huin runagunata yachachingahua, yapa caru pulbu ñambigunata purisha rira. Lucas 8:1ta leichi, huasha cai tapuigunamanda cuintanacuichi:
-
Jesusca paita uyangahua, tandarishca runagunallatachu predicac ara.
-
Jesusca runagunata mascasha tupangahua imatata rara.
Diosca, Cristo gustu cuintaigunata yachachina ashcata rimara. Lucas 4:17-19ta leichi, huasha cai tapuigunamanda cuintanacuichi:
-
Jesusca cai profeciata imashinata pactachira.
-
Canga imatata ningui, cunanbas runagunaga gustu cuintaita uyanata minishtinaunzhu.
5. Jesusca alitami yachachira
Jesusca Diospa gubirnumanda gustu cuintaigunata predicashahuas, ñucanchi imasa causanata yachachira. Jesusca, Sermon del Monte nishcaibi, imata rimashcata yachashunchi. Mateo 6:14, 34 y 7:12ta leichi, huasha cai tapuigunamanda cuintanacuichi:
-
Cai versiculogunaibi, Jesusca ima balishca cunaigunatata yachachira.
-
Canga imatata yuyangui, cai cunashcagunaga runagunata cunan punzha yanapanata ushanzhu.
6. Jesusca milagrogunata rara
Jehovaga Jesusta milagrogunata rangahua ushaita cura. Jesus rashca milagrota ricungahua, Marcos 5:25-34ta leichi o VIDEOTA ricuichi. Huasha, cai tapuigunamanda cuintanacuichi:
-
Videoibi ricushca shina, chi ungushca huarmiga Jesus paita ambingaraushcata quirirachu.
-
Cai milagrota Jesus rashcamanda imatata mas gustangui.
Juan 5:36ta leichi, huasha cai tapuimanda cuintanacuichi:
-
Jesus rashca milagrogunaga imatata ricuchin.
Yacharanguichu
Jesusmanda cadsi tucui yachachishcagunaga, Bibliamanda Evangelio nishca chuscu librogunaibi maun. Cai chuscu librogunata quillcaccunaga Mateo, Marcos, Lucas y Juan, Jesusmanda imasa causashcata, ima yachachishcata cuintanaun. Caran cai librota quillcaccunami, Jesusmanda caran tunu shimihuan sumacta cuintanaura. Cai chuscu librogunata leishaga, Jesus causaimandami gustuta yachanchi.
-
MATEO
punda Evangelio librota quillcara. Pai quillcashca libroga, Jesus yachachishcamandami riman. Diospa gubirnumanda caibi pasacta yachachin.
-
MARCOS
ichilla Evangelio librotami quillcara. Jesus gustu rashcagunamandami cuintan.
-
LUCAS
Diosta mañana balishca ashcamanda cuintan. Chasnallata, Jesus huarmigunata alita tratashcata cuintan.
-
JUAN
Jesus imasa ashcatami cuintan. Chasnallata, Jesus imasa paiba amigogunahuan, shuc runagunahuan cuintanacushcatami riman.
MAICANGUNAGA CASNAMI NINAUN: “Jesus tucui ushayuc Dios man”.
-
Canga imatata yuyangui.
IMATA YACHASHCANGUI
Jesusca Diospa gubirnumanda predicara. Milagrogunata rara. Tucui uras Jehovata casura.
Yachashcata cuintai
-
Jesus cai Allpai aushcai, imatata punda pactachira.
-
Jesuspa milagrogunaga imatata ricuchira.
-
Runaguna alita causangahua, Jesusca imatata yachachira.
CANLLATA MASTA YACHAI
Jesusca imamandata mas yachachira.
“Jesusraicu Diospa gubirnuga imahuata balishca an” (La Atalaya, 1 de octubre de 2014)
Jesuspa milagroguna sirtu ashcata yachai.
“Jesuspa milagrogunamanda imatata yachanata ushangui” (La Atalaya, 15 de julio de 2004)
Shuc runa, Jesus huin runagunata llaquishcata yachasha, paiba causai imasa cambiashcata leipai.
“Ñucami shuccunamandas mas balic ani nisha yuyaric arani” (La Atalaya, 1 de octubre de 2014)
Jesuspa causai, imasa caran punzha pai rashcaguna pactarishcata ricui.
“Cai Allpaibi Jesuspa causai” (La Biblia. Traducción del Nuevo Mundo, apendice A7)
a 31 a 33 yachana partibi, Diospa gubirnumanda masta yachashun.
