LESON 16

Kosa Jézu la fé kan li lété su la tèr ?

ÉKOUT AN

In bonpe domoun i voi Jézu kom inn ti bébé san défans, in profèt oubien in moun i sar mor. Mé kosa nou pe aprann ankor kan nou étudié son vi kan li lété su la tèr ? Nou va koz su désèrtin zafèr lé plu zinportan ke Jézu la fé, é nou va voir poukosa sa i konsèrn aou.

1. Kosa lété le travay le plus inportan ke Jézu la fé ?

Le travay le plus inportan ke Jézu la fé, lété « anons le gayar nouvèl le roiyom Bondieu » (lir Luk 4:43). Le gayar nouvèl ke li té prèch lété ke Bondieu va mèt an plas in roiyom, oubien in gouvèrnman, ke va règ tout bann problèm dan le monn a. Jézu la prèch se mésaj léspoir la san arété, pandan 3 zan é demi (Matieu 9:35).

2. Kosa bann mirak ke Jézu la fé i prouv anou ?

La Bib i koz su in bonpe ‘zaksion puisan, bann mirak é bann sign ke Bondieu la fé, gras Jézu’ (Akt 2:22). Gras le pouvoir Bondieu, Jézu la gingn kontrol bann zéléman la natur, nouri bann milié domoun, géri bann malad, é mèm résusit bann mor (Matieu 8:23-27 ; 14:15-21 ; Mark 6:56 ; Luk 7:11-17). Bann mirak ke Jézu la fé, la prouvé ke li lété anvoiyé par Bondieu. Sa la prouvé osi ke Jéova na le pouvoir règ tout nout bann problèm.

3. Kosa nou aprann su la vi Jézu ?

Jézu la toultan obéi Jéova (lir Jan 8:29). Malgré bann difikulté, Jézu la fé tout sak son Papa la demann ali, juska la fin son vi. Li la prouvé ke bann zumin i pe sèrv Bondieu, mèm kan lé difisil. Dukou, Jézu la lès anou ‘in légzanp pou ke nou suiv fidèlman son bann tras’ (1 Pièr 2:21).

ALON APRANN PLUS

Alon voir sak Jézu la fé pou fé konèt le gayar nouvèl, é alon koz su bann mirak ke li la réalizé.

4. Jézu la fé konèt le gayar nouvèl

Pou anons le gayar nouvèl èk le plus domoun posib, Jézu la march in kantité kilomèt su bann chemin la tèr. Lir Luk 8:1 é koz su bann késtion la :

Èske Jézu la prèch seulman èk domoun ke té i vien ékout ali ?
Kèl zéfor Jézu la fé pou alé trouv domoun ?

Bondieu lavé di a lavans ke le Mési noré anons in gayar nouvèl. Lir Izai 61:1, 2 é koz su bann késtion la :

Koman Jézu la réaliz profési la ?
Èske ou pans ke bann domoun zordi la bezoin antann se gayar nouvèl la ?

5. Jézu la ansègn bann vérité inportan

Jézu la prèch le gayar nouvèl le roiyom Bondieu, mé li la osi ansègn bann leson util pou nout vi. Alon voir detroi zégzanp dan le Sèrmon su la montagn. Lir Matieu 6:14, 34 é 7:12 é koz su bann késtion la :

Kèl konsèy util Jézu i donn dan bann vèrsé la ?
Èske ou pans ke bann konsèy la, lé toujour util zordi ?

6. Jézu la fé bann mirak

Jéova la donn Jézu le pouvoir fé in bonpe mirak. Alon pran in légzanp : lir Mark 5:25-34 oubien gard le VIDÉO. Aprésa, koz su bann késtion ki vien apré.

VIDÉO : Jézu i soign in fam malad (5:10)

Kosa le madam malad lété sur ?
Kosa ou trouv inkroiyab dann mirak la ?

Lir Jan 5:36 é koz su késtion la :

Kosa bann mirak Jézu i « fémont » anou ?

Ou té koné sa ou ?

Sak nou koné su Jézu i sort surtou dan bann 4 liv la Bib ki apèl lé Zévanjil : Matieu, Mark, Luk é Jan. Dan chak liv néna bann zinformasion diféran su Jézu. Kan nou lir lé Zévanjil, nou néna in lidé vréman gayar su son vi.

MATIEU

la ékri son Lévanjil an premié. Li atir latansion su bann zansègnman Jézu, surtou su sak li la di su le roiyom Bondieu.
MARK

la ékri le plu p’ti Lévanjil. Li rakont in bonpe zévènman in fason vivan.
LUK

i atir latansion su la priyèr é la jantiyès ke Jézu lavé pou bann madam.
JAN

i rakont in bonpe diskusion ke Jézu lavé avèk son bann proch kamarad, oubien avèk dot moun. Li èd anou aprann plus su le pèrsonalité Jézu.