ЛЕКЦИЈА 16
Со керѓа о Исус кеда сине ки Пхув?
Бут мануша замислинена песке е Исусе сар бебе или сар мануш со мерела. А јавера дикхена ки лесте само сар јекх мудро пророко. Ама, и Библија сикавела амен повише баши лесте. Ки акаја лекција ка дикха несаве таро најважна буќа со керѓа лен о Исус џикоте сине ки Пхув хем сар адава шај те поможинел туке.
1. Со сине е Исусеске најважно?
Е Исусеске најважно сине те вакерел „о шукар хабери башо е Девлескоро Царство“. (Читин Лука 4:43.) Ов проповединѓа о шукар хабери кај о Девел ка керел јекх Царство, или влада, која со ка решинел са о манушикане проблемија. a О Исус трин текваш берш бут трудинѓа пе те вакерел е манушенге акава шукар хабери (Матеј 9:35).
2. Соске о Исус керѓа чудија?
Ки Библија пишиме тане бут моќна делија, чудија хем знакија со керѓа о Девел преку о Исус (Дела 2:22). О Девел денѓа е Исусе моќ те смиринел јекх силно бура, те парварел буте манушен, те сасљарел е насвален, па чак те иранел ко живото е мулен (Матеј 8:23-27; 14:15-21; Марко 6:56; Лука 7:11-17). Акала чудија јасно сикавѓе кај о Девел бичхалѓа е Исусе. Исто аѓаар, ола сикавѓе кај е Јехова иси ле моќ те решинел са амаре проблемија.
3. Со шај те сикљова таро е Исусескоро живото?
О Исус секогаш сине послушно е Јеховаске. (Читин Јован 8:29.) Иако сине ле противибе, о Исус верно џи ко мерибе керѓа са со родинѓа лестар лескоро Дад. Аѓаар, ов сикавѓа кај о мануша шај те служинен е Девлеске чак ко пхаре околностија. Адалеа, ов денѓа е манушенге „пример ко са те џан пало лескере чекорија“ (1. Петрово 2:21).
ДОЗНАЈН ПОВИШЕ
Дикх сар о Исус проповединѓа о шукар хабери хем сар керѓа чудија.
4. О Исус проповединѓа о шукар хабери
О Исус пхирѓа бут километрија ко пхувјале друмија те шај те проповединел о шукар хабери кобор со шај повише манушенге. Читин Лука 8:1, а пало адава керен лафи башо акала пучиба:
-
Дали о Исус проповединела сине само околенге со авена сине ки лесте?
-
Кобор бут трудинѓа пе о Исус те шај те аракхел е манушен?
О Девел пророкујнѓа кај о Месија ка проповединел јекх шукар хабери. Читин Исаија 61:1, 2, а пало адава керен лафи башо акала пучиба:
-
Сар о Исус исполнинѓа акава пророштво?
-
Со мислинеа, дали о мануша авдиве ваљани те шунен акава шукар хабери?
5. О Исус денѓа корисна советија
О Исус на проповединѓа само о шукар хабери башо е Девлескоро Царство, него исто аѓаар ов денѓа корисна советија. Дикх некобор примерија ко лескоро пенџардо говор со викинела пе Проповед ки гора. Читин Матеј 6:14, 34 хем 7:12, а пало адава керен лафи башо акала пучиба:
-
Кола корисна советија денѓа о Исус ко акала стихија?
-
Со мислинеа, дали акала советија шај те поможинен е манушенге авдиве?
6. О Исус керѓа чудија
О Јехова денѓа е Исусеске моќ те керел бут чудија. Те шај те дикхе јекх пример, читин Марко 5:25-34 или дикх о ВИДЕОКЛИПИ, а пало адава керен лафи башо акала пучиба:
-
Ко со сине уверими и насвали џувли?
-
Со свиџинела пе туке ко акава чудо?
Читин Јован 5:36, а пало адава керен лафи башо акава пучибе:
-
Башо со сведочинѓе о чудија со керѓа о Исус?
Дали џанљан?
Бут шај те сикљова башо Исус таро штар библиска лила со викинена пе Евангелија. Адала тане о лила Матеј, Марко, Лука хем Јован. Секова писатели ко пло лил пишинѓа различна деталија башо Исус. Кеда читинаја соштар лила, добинаја јекх слика таро лескоро живото со воодушевинела амен.
-
МАТЕЈ
Ов прво пишинѓа пло евангелие. Ко пло лил ов пишинѓа бут башо е Исусескере сикљојба, а посебно со сикавѓа о Исус башо е Девлескоро Царство.
-
МАРКО
Лескоро евангелие тано најтикно. Ов на задржинѓа пе бут ко настанија со случинѓе пе, него ко адава со керѓа о Исус.
-
ЛУКА
Ов повише истакнинѓа кобор е Исусеске сине важно и молитва хем сар понашинѓа пе е џувленцар.
-
ЈОВАН
Ов пишинѓа башо бут разговорија со сине е Исусе пле паше амаленцар хем е јаверенцар, колендар со сикљоваја сави личност сине о Исус.
НЕСАВЕ ШАЈ ВАКЕРЕНА: „О Исус сине само јекх обично пророко хем ништо повише“.
-
Со мислинеа ту?
СО СИКЛИЛЕМ
О Исус проповединѓа башо е Девлескоро Царство, керѓа чудија хем секогаш сине послушно е Јеховаске.
Сар ка одговорине?
-
Со сине е Исусеске најважно кеда сине ки Пхув?
-
Со сикавена е Исусескере чудија?
-
Кола корисна советија денѓа о Исус?
ИСТРАЖИН
Баши која тема о Исус керѓа највише лафи?
„Божјето Царство — колку му значи на Исус“ (Стражарска кула таро 1 октомври 2014)
Дикх соске шај те верујна кај о чудија со керѓа о Исус чаче случинѓе пе.
„Чудата на Исус — што можеш на научиш?“ (Стражарска кула таро 15 јули 2004)
Читин сар јекх мануш менинѓа пло живото кеда дознајнѓа кобор бут о Исус грижинѓа пе е јаверенге.
„Мислев дека светот се врти околу мене“ (Стражарска кула таро 1 октомври 2014)
Дикх о главна настанија тари е Исусескири служба ко редо сар со случинѓе пе.
„Најважните настани од Исусовиот живот на Земјата“ (Да ја истражуваме Божјата Реч, 4-Б)
a Ко лекцие 31-33 ка керел пе повише лафи башо е Девлескоро Царство.
Шај исто ка интересинел тут
НАЈЧЕСТА ПУЧИБА
Сар изглединела о библиско курси со нудинена е Јеховаскере сведокија?
Џикоте икерела пе о бесплатно библиско курси, шај те користине било кова превод тари Библија. Ко курси шај те канине некас тари тли фамилија или несаве амале.
