LEKCIJA 16
So kergja o Isus keda sine ki Phuv?
But manuša zamislinena peske e Isuse sar bebe ili sar manuš so merela. A javera dikhena ki leste samo sar jekh mudro proroko. Ama, i Biblija sikavela amen poviše baši leste. Ki akaja lekcija ka dikha nesave taro najvažna bukja so kergja len o Isus džikote sine ki Phuv hem sar adava šaj te pomožinel tuke.
1. So sine e Isuseske najvažno?
E Isuseske najvažno sine te vakerel „o šukar haberi bašo e Devleskoro Carstvo“. (Čitin Luka 4:43.) Ov propovedingja o šukar haberi kaj o Devel ka kerel jekh Carstvo, ili vlada, koja so ka rešinel sa o manušikane problemija. a O Isus trin tekvaš berš but trudingja pe te vakerel e manušenge akava šukar haberi (Matej 9:35).
2. Soske o Isus kergja čudija?
Ki Biblija pišime tane but mokjna delija, čudija hem znakija so kergja o Devel preku o Isus (Dela 2:22). O Devel dengja e Isuse mokj te smirinel jekh silno bura, te parvarel bute manušen, te sasljarel e nasvalen, pa čak te iranel ko životo e mulen (Matej 8:23-27; 14:15-21; Marko 6:56; Luka 7:11-17). Akala čudija jasno sikavgje kaj o Devel bičhalgja e Isuse. Isto agjaar, ola sikavgje kaj e Jehova isi le mokj te rešinel sa amare problemija.
3. So šaj te sikljova taro e Isuseskoro životo?
O Isus sekogaš sine poslušno e Jehovaske. (Čitin Jovan 8:29.) Iako sine le protivibe, o Isus verno dži ko meribe kergja sa so rodingja lestar leskoro Dad. Agjaar, ov sikavgja kaj o manuša šaj te služinen e Devleske čak ko phare okolnostija. Adalea, ov dengja e manušenge „primer ko sa te džan palo leskere čekorija“ (1. Petrovo 2:21).
DOZNAJN POVIŠE
Dikh sar o Isus propovedingja o šukar haberi hem sar kergja čudija.
4. O Isus propovedingja o šukar haberi
O Isus phirgja but kilometrija ko phuvjale drumija te šaj te propovedinel o šukar haberi kobor so šaj poviše manušenge. Čitin Luka 8:1, a palo adava keren lafi bašo akala pučiba:
-
Dali o Isus propovedinela sine samo okolenge so avena sine ki leste?
-
Kobor but trudingja pe o Isus te šaj te arakhel e manušen?
O Devel prorokujngja kaj o Mesija ka propovedinel jekh šukar haberi. Čitin Isaija 61:1, 2, a palo adava keren lafi bašo akala pučiba:
-
Sar o Isus ispolningja akava proroštvo?
-
So mislinea, dali o manuša avdive valjani te šunen akava šukar haberi?
5. O Isus dengja korisna sovetija
O Isus na propovedingja samo o šukar haberi bašo e Devleskoro Carstvo, nego isto agjaar ov dengja korisna sovetija. Dikh nekobor primerija ko leskoro pendžardo govor so vikinela pe Propoved ki gora. Čitin Matej 6:14, 34 hem 7:12, a palo adava keren lafi bašo akala pučiba:
-
Kola korisna sovetija dengja o Isus ko akala stihija?
-
So mislinea, dali akala sovetija šaj te pomožinen e manušenge avdive?
6. O Isus kergja čudija
O Jehova dengja e Isuseske mokj te kerel but čudija. Te šaj te dikhe jekh primer, čitin Marko 5:25-34 ili dikh o VIDEOKLIPI, a palo adava keren lafi bašo akala pučiba:
-
Ko so sine uverimi i nasvali džuvli?
-
So svidžinela pe tuke ko akava čudo?
Čitin Jovan 5:36, a palo adava keren lafi bašo akava pučibe:
-
Bašo so svedočingje o čudija so kergja o Isus?
Dali džanljan?
But šaj te sikljova bašo Isus taro štar bibliska lila so vikinena pe Evangelija. Adala tane o lila Matej, Marko, Luka hem Jovan. Sekova pisateli ko plo lil pišingja različna detalija bašo Isus. Keda čitinaja soštar lila, dobinaja jekh slika taro leskoro životo so vooduševinela amen.
-
MATEJ
Ov prvo pišingja plo evangelie. Ko plo lil ov pišingja but bašo e Isuseskere sikljojba, a posebno so sikavgja o Isus bašo e Devleskoro Carstvo.
-
MARKO
Leskoro evangelie tano najtikno. Ov na zadržingja pe but ko nastanija so slučingje pe, nego ko adava so kergja o Isus.
-
LUKA
Ov poviše istakningja kobor e Isuseske sine važno i molitva hem sar ponašingja pe e džuvlencar.
-
JOVAN
Ov pišingja bašo but razgovorija so sine e Isuse ple paše amalencar hem e javerencar, kolendar so sikljovaja savi ličnost sine o Isus.
NESAVE ŠAJ VAKERENA: „O Isus sine samo jekh obično proroko hem ništo poviše“.
-
So mislinea tu?
SO SIKLILEM
O Isus propovedingja bašo e Devleskoro Carstvo, kergja čudija hem sekogaš sine poslušno e Jehovaske.
Sar ka odgovorine?
-
So sine e Isuseske najvažno keda sine ki Phuv?
-
So sikavena e Isuseskere čudija?
-
Kola korisna sovetija dengja o Isus?
ISTRAŽIN
Baši koja tema o Isus kergja najviše lafi?
„Božjeto Carstvo — kolku mu znači na Isus“ (Stražarska kula taro 1 oktomvri 2014)
Dikh soske šaj te verujna kaj o čudija so kergja o Isus čače slučingje pe.
„Čudata na Isus — što možeš na naučiš?“ (Stražarska kula taro 15 juli 2004)
Čitin sar jekh manuš meningja plo životo keda doznajngja kobor but o Isus grižingja pe e javerenge.
„Mislev deka svetot se vrti okolu mene“ (Stražarska kula taro 1 oktomvri 2014)
Dikh o glavna nastanija tari e Isuseskiri služba ko redo sar so slučingje pe.
„Najvažnite nastani od Isusoviot život na Zemjata“ (Da ja istražuvame Božjata Reč, 4-B)
a Ko lekcie 31-33 ka kerel pe poviše lafi bašo e Devleskoro Carstvo.
Šaj isto ka interesinel tut
NAJČESTA PUČIBA
Sar izgledinela o biblisko kursi so nudinena e Jehovaskere svedokija?
Džikote ikerela pe o besplatno biblisko kursi, šaj te koristine bilo kova prevod tari Biblija. Ko kursi šaj te kanine nekas tari tli familija ili nesave amale.
