16 УРОКИ

Со керелас о Исусес, кана сине ки пхув?

МУК

Десаве мануша представинен песке е Исусес сар бебес, сар пророки или сар мануш, ковато мерел. Ама ащи ли те ахальовас по-бут букя леске, като четинас лескере животоске ки пхув? Калке урокиесте ка дикхас десаве таро най-важна букя, колато кергяс о Исусес тай соске си шукар те жанес лен.

1. Со сине о най-важно, ковато керелас о Исусес?

О най-важно, ковато керелас о Исусес сине те шунярел „и лачши новина е Девлескере Царствоске“. (Четине Лука 4:43.) Ов проповединелас и лачши новина, кай о Дел ка вазделас царство a , или управление, ковато ка решинел саворе проблемя е манушенгере. Трин бреша тай екваш о Исусес делас всичко пестар, за те пхенел е манушенге калка шукар думес таро Дел. (Матей 9:35)

2. Соске о Исусес керелас чудеса?

Анди Библия пишинел саве „могъща букя, чудеса тай знамения“ кергяс о Дел чрез о Исусес. (Деяния 2:22) О Дел диняс е Исусес сила те спиринел йекх бари балвал, те парварел буте манушен, те саскярел е насвален тай даже те иринел е мулен кариг о животос. (Матей 8:23-27; 14:15-21; Марко 6:56; Лука 7:11-17) Таро чудеса, колато кергяс о Исусес, дикхьол ясно, кай о Дел бичшалгяс лес тай кай е Йеховас иси и сила те решинел саворе амаре проблемя.

3. Со сикльовас таре Исусескоро животос?

О Исусес винаги шунелас е Йеховас. (Четине Йоан 8:29.) Пе целоне животосте ки пхув, о Исусес керелас всичко со мангелас лестар лескоро Дад, даже кана окола дикхенас те спиринен лес. Ов докажингяс, кай о мануша ащи те служинен е Девлеске, даже кана си бут пхаро тай сикавгяс аменге сар „те пхирас палал лескере стъпкенде“. (1 Петър 2:21)

РОДЕ ПО-ХОРЕСТЕ

Дикх сар о Исусес пхенелас околенге и лачши новина тай сар керелас чудеса.

4. О Исусес пхенелас околенге и лачши новина

О Исусес пхиргяс бут ко прахале дрома, за те проповединел и лачши новина кизом ащи по-буте манушенге. Четинен Лука 8:1 тай хоратинен калке въпросиенге:

Дали о Исусес проповединелас само е манушенге, колато коркоре авенас паш лесте, за те шунен лес?
Со керелас о Исусес, за те жал паш о мануша тай те проповединел ленге?

О Дел предскажингяс, кай о Месия ка проповединелас и лачши новина. Четинен Исаия 61:1, 2 тай хоратинен калке въпросиенге:

Сар о Исусес изпълнингяс кавка пророчество?
Мислинес ли, кай о мануша авдиес требе те шунен кайка лачши новина?

5. О Исусес делас шукар съвекя

О Исусес ма само проповединелас и лачши новина е Девлескере Царствоске, а също сикавелас е манушен полезна букя е животоске. Дикх саве съвекя диняс анди Проповед ки планина. Четинен Матей 6:14, 34 тай 7:12 тай хоратинен калке въпросиенге:

Саве шукар съвекя диняс о Исусес калке стиховиенде?
Мислинес ли, кай калка съвекя си шукар аменге-да?

6. О Исусес керелас чудеса

О Йехова диняс е Исусес сила те керел бут чудеса. За те ахальовен саво сине йекх лендар, четинен Марко 5:25-34 или дикхен о КЛИПИ. После хоратинен калке въпросиенге:

КЛИПИ: О Исусес саскяргяс йекхе насвале ромня (5:10)

Состе сине сигурно и жувли таро клипи?
Со харешингяс туке таро чудо, ковато кергяс о Исусес?

Четинен Йоан 5:36 тай хоратинен калке въпросиеске:

Со сикавенас е Исусескере чудеса за леске?

Жанес ли?

По-бут таро букя, колато жанас е Исусеске си таро щар библейска лила Матей, Марко, Лука тай Йоан, коленге пхенел пес евангелия. Секо йекх таро мануша, колато пишинде лен, пишингяс различна подробноскя е Исусеске. Кана четинас калка щар лила заедно, ахальовас бут лачшес саво сине е Исусескоро животос.

О МАТЕЙ

сине о първо, ковато пишингяс по евангелие. Лесте пишинел бут таро букя, колато сикавелас о Исусес, сарто например о учение е Девлескере Царствоске.
О МАРКО

пишингяс о най-кратко евангелие. О букя, колато си пишиме калке лилесте си бут интересна.
О ЛУКА

пхенел аменге кизом сине важно е Исусеске и молитва тай сикавел кизом сине лачшо е жувлиенца.
О ЙОАН

сикавел саво мануш сине о Исусес, като пхенел аменге саве букиенге хоратинелас ов пе близконе амаленца тай авере манушенца.