SIKAIMOS 16

So kerdias o Jesus kana sas pe Phuv?

THO

But manush denpe gogi ando Jesus sar iek glata, sar iek profeta vai sar iek manush kai ashelas te merel. Numa, nai chaches ke te mai sikiuas pa so kerdias o Jesus pe Phuv si te prinzharas les mai mishto? Ande kako sikaimos, si te dikhas uni andal bare dieli kai kerdias o Jesus ai so shai sikios pa kako.

1. Savi sas e buki mai bari le Jesusoski?

E buki mai bari le Jesusoski sas te phenel le manushenge “le lashe viesti katar e Amperetsia le Devleski” (chito Lucas 4:43, NWT). Ningerdias iek lashi viasta, ke o Del sas te thol iek amperetsia kai sas te lasharel sa le bedi katar le manush. a Ande trin borsh ai dopash, o Jesus thodias sa pestar te ningerel kacha shukar viasta (Mate 9:35).

2. Sostar o Jesus kerelas milagruria?

E Biblia phenel pa but bukia, bare prame ai milagruria kai kerdias o Del mashkar o Jesus (Le Apostolengo 2:22). Pala e zor kai dias les o Del, o Jesus ashadias iek baro brishin, pravardias mai but de pansh mia zhenen, sastiardias le nasualen ai dias les pale o traio ka uni manush kai sovenas ande martia (Mate 8:23-27; 14:15-21; Marko 6:56; Lucas 7:11-17, NWT). Le milagruria kai kerdias o Jesus sikade mishto ke o Del tradias les. Ai vi sikade ke le Devles si les e zor te lasharel sa amare bedi.

3. So sikavel amenge sar traisardias o Jesus?

O Jesus pakiaias o mui katar o Jehova ande soste godi (chito Juan 8:29, NWT). Sas chacho zhi kai mulo ai kerdias sa so tradias lesko Dat makar but zhene chi kamenas. Sikadias ke le manush shai luvudis le Devles makar avena pe amende but bedi. Gadia o Jesus “meklia te len sama pe leste” leske disipluria ai te lenpe “pala leske vurmi” (1 Petri 2:21).

TE MAI SIKIOS

Aida si te dikhas sar ningerelas o Jesus le lashe viesti ai sar kerelas milagruria.

4. O Jesus dias duma pal lashe viesti

O Jesus phirdias but kilometria pa but droma pherdo kishai te aresel ka but manush te del duma pal lashe viesti. Chiton Lucas 8:1 [NWT] ai den duma pa:

Ningerdias o Jesus le lashe viesti numa le manushenge kai zhanas te ashunen les?
So trobusardias te kerel o Jesus te aresel ka but manush?

O Del phendias de dumut ke o Mesias sas te ningerel le lashe viesti. Chiton Isaías 61:1, 2 ai den duma pa:

Sar kerdili chachi kacha profesia ando Jesus?
Gindis tu ke le manush trobun te ashunen le lashe viesti agies?

5. O Jesus sikadias bare prame kai azhutin amen

O Jesus na numa ningerdias le lashe viesti pa e Amperetsia le Devleski, vi sikadias prame kai azhutin amen suako gies. Aida dikhas uni andal prame kai phendias ando Divano pe Plaiin. Chiton Mateo 6:14, 34 ai 7:12 [NWT], ai den duma pa:

Save lashe suaturia phendias o Jesus ande kakala verseturia?
Gindis tu ke kakala suaturia shai azhutin le manushen agies?

6. O Jesus kerdias milagruria

O Jehova dias ka o Jesus e zor te kerel but milagruria. Te zhanen pa iek anda lende, chiton Marcos 5:25-34 [NWT] vai dikhen o VIDEO. Polme den duma pa:

VIDEO: Iek zhuvli nasuali sastili (5:10)

Pa so dikhiol ando video, so zhanelas chachimasa e zhuvli kai sas nasuali?
So plachal tu mai anda kako milagro?

Chiton Juan 5:36 [NWT] ai den duma pa:

So “sikaven chachimasa” le milagruria kai kerdias o Jesus?

Zhanesas kako?

But andal prame kai zhanas pa o Jesus si ramome andel shtar libruria la Bibliake kai bushenpe Evangeliuria. Le manush kai ramosarde kakala shtar libruria—o Mateo, o Marcos, o Lucas ai o Juan—ramosarde suako anda lende so zhanelas pa o Jesus. Lenge suaturia malaven iek avresa ai azhutin amen te mai zhanas pa o traio katar o Jesus.

O MATEO

sas o pervo kai ramosardias iek andal Evangeliuria. Lesko libro del duma pa so sikadias o Jesus, ai mai but pa so phendias pai Amperetsia le Devleski.
O MARCOS

ramosardias o Evangelio mai skurto ai si shukar te chitos les ke thodias mai but pal prame kai kerdias o Jesus de sar so phendias.
O LUCAS

sikavel ke o rhugimos si iek bari prama ai sode de kuchi sas le Jesusoske le zhuvlia.
O JUAN

phenel ke fialo sas o Jesus. Kotse shai chitos sar delas duma o Jesus peske amigonentsa ai avre manushentsa.