YE TI MANDA 16
Kua wa la Jésus asara lani na ngoi so lo yeke na sese?
Azo mingi apensé so Jésus ayeke mbeni bébé so a doit ti bâ lege ti lo, mbeni prophète so ayeke na ndara wala mbeni koli so ayeke gue ti kui. Me eskê e peut ti hinga ye mingi na ndö ti lo tongana e gi ti hinga ye na ndö ti gigi ti lo na sese ge? Na yâ ti ye ti manda so, e yeke bâ ambeni kota ye so Jésus asara lani nga e yeke bâ tongana nyen la apeut ti mû maboko na mo.
1. Kota kua wa la Jésus asara lani?
Kota kua so Jésus asara lani ayeke ti ‘fa nzoni tënë ti Royaume ti Nzapa’. (Diko Luc 4:43.) Lo fa lani nzoni tënë so atene Nzapa ayeke sigi na mbeni royaume, wala mbeni gouvernement, so ayeke leke akpale kue so azo ayeke na ni. a Teti ngu ota na ndambo, Jésus asara kue ti fa nzoni tënë so na azo.—Matthieu 9:35.
2. Jésus asara lani amiracle ngbanga ti nyen?
Bible asara tënë ti gbâ ti “akusala ti ngangu, aye ti kpene nga na afä so Nzapa asara na lege ti [Jésus]”. (Kusala 2:22). Nzapa amû lani ngangu na Jésus ti kaï akota pupu, ti mû kobe na azo saki mingi, ti sava azo so terê ti ala ason nga ti kiri même na azo so akui na fini (Matthieu 8:23-27; 14:15-21; Marc 6:56; Luc 7:11-17). Amiracle ti Jésus afa lani polele so Nzapa la atokua lo. A fa nga so Jéhovah ayeke na ngangu ti leke akpale kue so e yeke na ni.
3. Nyen la e peut ti manda na lege ti fason so Jésus avivre lani na ni?
Jésus amä yanga ti Jéhovah na yâ ti aye kue. (Diko Jean 8:29.) Atâa kangango lege so Jésus awara, lo sara lakue ye so Babâ ti lo ahunda na lo ti sara juska lo kui na ni. Lo fa so azo apeut ti sara na Nzapa atâa ala wara angangu kpale. So Jésus asara tongaso, lo zia na e “mbeni tapande si [e] mû peko ti gere ti lo mbilimbili.”—1 Pierre 2:21.
GI TI HINGA AYE MINGI
Bâ tongana nyen la Jésus afa lani nzoni tënë na azo nga lo sara amiracle.
4. Jésus afa lani nzoni tënë na azo
Jésus atambela lani akilomètre ngbangbo mingi na ndö ti alege so poussière ayeke dä, lo sara kue ti fa nzoni tënë na azo mingi. Diko Luc 8:1, na pekoni kiri tënë na ahunda so:
-
Eskê Jésus afa lani tënë gï na azo so abungbi ti mä lo?
-
Ngangu wa la Jésus asara lani ti wara azo?
Nzapa afa lani kozo awe so Messie ayeke fa nzoni tënë na azo. Diko Ésaïe 61:1, 2, na pekoni kiri tënë na ahunda so:
-
Tongana nyen la Jésus asara si prophétie so aga tâ tënë?
-
Mo pensé so laso azo abezoin ti mä nzoni tënë?
5. Jésus afa lani akpengba tâ tënë
Jésus afa lani nzoni tënë na ndö ti Royaume ti Nzapa, nga lo fa anzoni ye ti manda. Bâ ambeni tapande ni na yâ ti Fango tënë ti lo na ndö ti hoto, so azo ahinga ni mingi. Diko Matthieu 6:14, 34 nga na 7:12, na pekoni kiri tënë na ahunda so:
-
Anzoni wango wa la Jésus amû na yâ ti aversê so?
-
Mo pensé so awango so apeut ti aidé azo laso?
6. Jésus asara lani amiracle
Jéhovah amû lani ngangu na Jésus ti sara gbâ ti amiracle. Ti bâ mbeni tapande ni, diko Marc 5:25-34 wala zia VIDÉO ni. Na pekoni kiri tënë na ahunda so.
-
Na yâ ti vidéo so, nyen la wali so terê ti lo ason so ahinga na bê ti lo kue?
-
Na yâ ti miracle so, nyen la apika bê ti mo?
Diko Jean 5:36, na pekoni kiri tënë na hunda so:
-
Amiracle so Jésus asara “asara tënë ti témoin” wa na ndö ti lo, wala a fa nyen na ndö ti lo?
Mo hinga?
Mingi ti aye so e hinga na ndö ti Jésus ayeke na yâ ti ambeti ti Bible osio so a iri ni aÉvangile: Matthieu, Marc, Luc nga na Jean. Zo oko oko so asû Évangile azia na yâ ni anzene nzene tënë so ayeke nde na ti amba ti lo na ndö ti Jésus. Atënë so kue asara si e hinga gigi ti Jésus nzoni.
-
MATTHIEU
lo la lo sû Évangile ti lo kozo. Na yâ ni, mo yeke wara afango ye ti Jésus, mbilimbili aye so lo fa na ndö ti Royaume ti Nzapa.
-
MARC
Évangile ti lo ayeke nduru ahon atanga ni. A sara tënë na ndö ti gbâ ti apendere ye so asi.
-
LUC
lo fa so sambela ayeke lani kota ye mingi na lê ti Jésus nga lo fa tongana nyen la Jésus ayeke sara ye lani na mbage ti awali.
-
JEAN
lo fa gbâ ti aye na ndö ti asarango ye ti Jésus na lege so lo fa peko ti gbâ ti alisoro so Jésus asara na akota kamarade ti lo nga na ambeni zo.
AMBENI ZO ATENE: “Jésus ayeke lani gï mbeni nzoni zo, me lo yeke Messie ape.”
-
Mo tene ti mo nyen?
NA NDURU TËNË
Jésus afa lani tënë na ndö ti Royaume ti Nzapa, lo sara amiracle nga lo mä yanga ti Jéhovah na yâ ti aye kue.
Dango bê
-
Kota kua wa la Jésus asara lani na ngoi so lo yeke na sese?
-
Amiracle ti Jésus afa nyen?
-
Anzoni ye ti manda wa la Jésus afa lani?
GI NDA TI YE
Nyen la Jésus asara lani tënë na ndö ni mingi?
Bâ ndani so e hinga na bê ti e kue so Jésus asara lani biani amiracle.
“Ye wa mo lingbi ti manda na ndo amiracle ti Jésus?” (Tour ti Ba Ndo ti lango 15 ti juillet 2004)
Bâ tongana nyen la gigi ti mbeni koli achangé na ngoi so lo hinga so Jésus apensé mingi na azo.
“Mbi pensé lani gi na mbi wani awe” (Tour ti Ba Ndo ti lango 1 ti octobre 2014)
Bâ akota kua so Jésus asara na fango tënë na molongo so aye ni asi na ni.
“Akpengba ye so asi na yâ ti gigi ti Jésus na sese” (Mbeti ti Nzapa ti fini dunia, Ambeni tënë A7)
a Ye ti manda 31-33 ayeke fa anzene nzene tënë mingi na ndö ti Royaume ti Nzapa.
Bâ nga
ATËNË SO AZO AYEKE HUNDA KA
A-Témoin ti Jéhovah ayeke manda Bible na azo tongana nyen?
Mo peut ti sara kua na traduction ti Bible so mo ye na temps so a-Témoin ti Jéhovah ayeke manda Bible na mo senge senge. Mo peut ti tisa afami ti mo kue wala ambeni kamarade ti mo.
