LESONA 16
O le ā na Faia e Iesu a o Iai i le Lalolagi?
E toʻatele tagata e manatu iā Iesu o se pepe, o se perofeta atamai po o se tagata ua lata ina maliu. Ae pe e mafai ona tatou aʻoaʻo atili e faatatau iā te ia, e ala i le iloiloina o lona soifuaga a o iai i le lalolagi? I lenei lesona, o le a iloilo ai nisi o mea e sili ona tāua na faia e Iesu, ma pe faapefea ona aafia ai oe.
1. O le ā le galuega autū sa faia e Iesu?
O le galuega autū sa faia e Iesu, o le ʻfolafola atu lea o le tala lelei o le Malo o le Atua.’ (Faitau le Luka 4:43.) Na ia talaʻia atu le tala lelei o le a faavae e le Atua se malo po o se faigāmalo, e mafai ona foʻia faafitauli uma o tagata. a Sa galue malosi Iesu e faailoa atu lenei feʻau mo le tolu ma le ʻafa tausaga.—Mataio 9:35.
2. O le ā ua faailoa mai e vavega na faia e Iesu?
Ua faamatalaina e le Tusi Paia le tele o “galuega mamana ma mea ofoofogia, ma faailoga na faia e le Atua . . . e ala iā [Iesu].” (Galuega 2:22) E ala i le mana o le Atua, na mafai ai e Iesu ona faatoʻafilemu le matagi, fafaga le faitau afe o tagata, faamālōlō maʻi, ma e oo lava i le toe faatutūina mai o ē ua feoti. (Mataio 8:23-27; 14:15-21; Mareko 6:56; Luka 7:11-17) O vavega na faia e Iesu, e manino mai ai na auina mai o ia e le Atua. Ua faailoa mai ai foʻi, e iai le mana iā Ieova e foʻia ai o tatou faafitauli uma.
3. O le ā e tatou te aʻoaʻoina mai i le soifuaga o Iesu?
Na usiusitaʻi Iesu iā Ieova i mea uma lava. (Faitau le Ioane 8:29.) E ui i teteega, ae na faia pea e Iesu mea uma lava na finagalo ai lona tamā, seʻia oo lava ina maliu. Na ia faamaonia ai e mafai lava e tagata ona auauna i le Atua, e tusa pe feagai ma tulaga faigatā. O lea, ua tuuina mai ai e Iesu “le faaaʻoaʻoga mo [i tatou] ina ia [tatou] mulimulituʻi ai i ona tulaga aao.”—1 Peteru 2:21.
SAʻILIʻILI ATILI
Iloilo auala na folafola atu ai e Iesu le tala lelei ma faia vavega.
4. Na folafola atu e Iesu le tala lelei
Na savali Iesu mo le faitau selau o maila i auala pefu, e folafola atu le tala lelei i le tele o tagata e mafai ai. Faitau le Luka 8:1, ona talanoa lea i fesili nei:
-
Pe na o tagata na ō ane e faalogologo iā Iesu na ia talaʻi atu ai?
-
O ā taumafaiga na faia e Iesu ina ia maua ai tagata?
Na valoia mai e le Atua o le a folafola atu e le Mesia le tala lelei. Faitau le Isaia 61:1, 2, ona talanoa lea i fesili nei:
-
Na faapefea ona faataunuu e Iesu lenei valoaga?
-
O le ā sou manatu, pe manaʻomia ona faalogo tagata i aso nei i le tala lelei?
5. Na aʻoaʻo mai e Iesu ni lesona aogā
E lē gata i le talaʻia o le tala lelei e faatatau i le Malo o le Atua, ae na aʻoaʻo mai foʻi e Iesu ni lesona aogā. Iloilo nisi o faaaʻoaʻoga mai i lana Lauga taʻutaʻua i luga o le Mauga. Faitau le Mataio 6:14, 34 ma le 7:12, ona talanoa lea i fesili nei:
-
O ā fautuaga aogā na taʻua e Iesu i nei fuaiupu?
-
Pe e te manatu o loo aogā pea na fautuaga i aso nei?
6. Na faia e Iesu vavega
Na tuu atu e Ieova le mana iā Iesu e faia ai le tele o vavega. Ina ia vaai i se faaaʻoaʻoga, faitau le Mareko 5:25-34 pe faaali le VITIŌ, ona talanoa lea i fesili nei:
-
I le vitiō, o le ā na talitonu i ai le fafine maʻi?
-
O le ā se mea e te maofa ai i lenei vavega?
Faitau le Ioane 5:36, ona talanoa lea i le fesili lenei:
-
O le ā ua faamaonia pe “fai ma molimau” i vavega na faia e Iesu, e faatatau iā te ia?
E te silafia?
O le tele o mea ua tatou iloa e faatatau iā Iesu, e maua i tusi e fā o le Tusi Paia ua taʻua o Evagelia. O tusi o Mataio, Mareko, Luka ma Ioane. E eseese uma faamatalaga na tusia e nei faievagelia e faatatau iā Iesu. O le tuufaatasiga o nei faamatalaga ua maua ai le ata atoa o le soifuaga o Iesu.
-
MATAIO
Na muamua tusia lana Evagelia. O loo faamatala mai ai le tele o aʻoaʻoga a Iesu, aemaise lava ana aʻoaʻoga e faatatau i le Malo o le Atua.
-
MAREKO
O le Evagelia pito i puupuu lea. O loo faamatala mai ai ni mea mananaia na tutupu.
-
LUKA
O loo uaʻi atu i le tāua o le tatalo, ma le auala na feutagaʻi ai Iesu ma fafine.
-
IOANE
O loo faailoa mai ai uiga o Iesu, e ala i le taʻua o a latou talanoaga ma ana uō vavalalata ma isi.
UA FAAPEA MAI NISI: “O Iesu o le Atua o Lē e ona le malosi uma lava.”
-
O le ā sou manatu?
AOTELEGA
Na talaʻia e Iesu le Malo o le Atua, faia vavega ma usiusitaʻi iā Ieova i mea uma.
Fesili Autalu
-
O le ā le galuega autū a Iesu a o iai i le lalolagi?
-
O le ā ua faamaonia mai i vavega na faia e Iesu?
-
O ā lesona aogā na aʻoaʻo mai e Iesu?
MANATU FAAOPOOPO
O le ā le mataupu na tele ina talanoa ai Iesu?
“Malo o le Atua—Le Māfuaaga e Tāua ai iā Iesu” (Le Olomatamata, Oketopa 1, 2014)
Iloilo le māfuaaga e tatou te talitonu ai na tutupu moni lava vavega na faia e Iesu.
“Vavega a Iesu—O le ā ua E Aʻoaʻoina Mai Ai?” (Le Olomatamata, Iulai 15, 2004)
Iloilo pe na faapefea ona suia le olaga o se tamāloa ona o le faaaʻoaʻoga o le alofa faataulaga o Iesu.
“Na Ou Manatu Ifo Lava na o Loʻu Lava Lelei” (Le Olomatamata, Oketopa 1, 2014)
Tagaʻi i mea iloga na tutupu i le faiva a Iesu ma faasologa o taimi na tutupu ai.
a O le a talanoaina atili i le Lesona 31-33 le Malo o le Atua.
E te Ono Fiafia Foʻi
FESILI E MASANI ONA LĀGĀ
O le ā le Talanoaga Faale-Tusi Paia o Loo Ofoina e Molimau a Ieova?
Ua ofo atu e Molimau a Ieova se suʻesuʻega faale-Tusi Paia e lē totogia, e mafai ona e faaaogāina ai so o se faaliliuga o le Tusi Paia. E mafai foʻi ona valaaulia lou aiga atoa po o au uō e auai ai.
