LES 16
San Yesus du di a ben de na grontapu?
Furu sma e si Yesus leki wan beibi noso leki wan koni profeiti. Te tra sma e denki Yesus, dan den e prakseri a fasi fa a dede. Ma wi kan leri moro fu Yesus te wi e luku san a du di a ben de na grontapu. Na ini a les disi wi o taki fu wan tu fu den moro prenspari sani di Yesus du èn san yu kan leri fu den.
1. San na a moro prenspari wroko di Yesus du?
A moro prenspari wroko di Yesus du, na taki a ’fruteri sma a bun nyunsu fu Gado Kownukondre’. (Leisi Lukas 4:43.) A ben fruteri sma taki Gado ben o seti wan Kownukondre noso wan regering di ben o lusu ala den problema fu libisma. a Dri nanga afu yari langa Yesus wroko tranga fu prati a bun nyunsu disi.—Mateyus 9:35.
2. Fu san ede Yesus ben du wondru?
Bijbel e taki dati ’Gado meki Yesus du kefalek sani nanga wondru’ (Tori fu den apostel 2:22). Gado ben gi Yesus a makti fu tapu wan bigi winti, fu gi dusundusun sma nyanyan, fu dresi sikisma èn fu gi dedesma libi baka (Mateyus 8:23-27; 14:15-21; Markus 6:56; Lukas 7:11-17). Den wondru di Yesus ben du ben sori sma taki na Gado ben seni en kon na grontapu. Den e sori tu taki Yehovah abi a makti fu lusu ala den problema fu wi.
3. San wi kan leri fu a fasi fa Yesus ben libi?
Ala ten Yesus ben gi yesi na Yehovah. (Leisi Yohanes 8:29.) Aladi sma ben e gens Yesus, toku a ben du ala san en papa ben aksi en. A du dati en heri libi langa. A sori taki libisma man dini Gado awinsi den de na ini muilek situwâsi. Yesus libi ’wan eksempre gi wi, so taki wi kan waka soifri na en baka’.—1 Petrus 2:21.
SORTU TRA SANI YU KAN LERI?
Wi o si fa Yesus preiki a bun nyunsu èn sortu wondru a du.
4. Yesus ben preiki a bun nyunsu
Yesus waka hondrohondro kilometer tapu santi pasi fu preiki a bun nyunsu gi so furu sma leki a man. Leisi Lukas 8:1 èn taki fu den aksi disi:
-
Yesus ben preiki soso gi sma di ben kon na en fu arki en?
-
O furu muiti Yesus du fu feni sma fu preiki gi den?
Gado ben taki na fesi taki a Mesias ben o tyari bun nyunsu gi sma. Leisi Yesaya 61:1, 2 èn taki fu den aksi disi:
-
Fa Yesus meki a profeititori disi kon tru?
-
Yu denki taki sma na ini a ten disi musu yere a bun nyunsu disi?
5. Yesus leri sma prenspari sani
Boiti taki Yesus ben preiki a bun nyunsu fu Gado Kownukondre, a ben leri sma sani di ben kan yepi den na ini den libi. Luku wan tu fu den sani di Yesus leri sma di a ben hori wan prenspari lezing na tapu wan bergi. Leisi Mateyus 6:14, 34 nanga 7:12. Baka dati taki fu den aksi disi:
-
Sortu bun rai Yesus gi na ini den tekst disi?
-
Yu denki taki den rai disi kan yepi sma na ini a ten disi?
6. Yesus ben du wondru
Yehovah ben gi Yesus a krakti fu du furu wondru. Efu yu wani si wan eksempre, dan leisi Markus 5:25-34 noso prei a FELEM. Baka dati taki fu den aksi disi:
-
San na uma na ini a felem ben bribi?
-
San yu lobi fu a wondru disi?
Leisi Yohanes 5:36 èn taki fu na aksi disi:
-
San den wondru di Yesus ben e du ben „sori”?
Yu ben sabi a sani disi?
Furu fu den sani di wi sabi fu Yesus wi kan leisi na ini den Bijbel buku Mateyus, Markus, Lukas, nanga Yohanes. Ibriwan fu den skrifiman disi skrifi son sani fu Yesus di a trawan no fruteri. Te wi e leisi ala den fo buku disi, dan wi e si fa a libi fu Yesus ben de di a ben de na grontapu.
-
MATEYUS
na a fosi sma di skrifi fu a libi fu Yesus. A buku Mateyus e poti moro prakseri na den sani di Yesus ben e leri sma, spesrutu den sani di abi fu du nanga Gado Kownukondre.
-
MARKUS
skrifi a moro syatu buku. A buku fu en e taki fu den span sani di pasa na ini Yesus libi.
-
LUKAS
e sori o prenspari begi ben de gi Yesus èn fa a ben sori lespeki gi umasma.
-
YOHANES
skrifi furu fu den tori di Yesus ben taki nanga den bun mati fu en èn nanga tra sma. Disi e yepi wi fu kon sabi sortu fasi Yesus ben abi.
SON SMA E TAKI: „Yesus na Gado.”
-
San yu e denki?
SAN YU LERI?
Yesus ben e preiki fu Gado Kownukondre, a ben e du wondru èn a ben e gi yesi na Yehovah ala ten.
Fa yu ben o piki den aksi disi?
-
San ben de a moro prenspari wroko gi Yesus di a ben de na grontapu?
-
San den wondru di Yesus du e sori?
-
Sortu bun rai Yesus ben gi sma?
TRA SANI DI YU KAN LUKU
Fu sortu sani Yesus ben e taki moro furu?
„Fu san ede Gado Kownukondre prenspari gi Yesus?” (A Waktitoren, 1 oktober 2014)
Na artikel disi e sori fu san ede wi kan bribi den wondru di Yesus du.
„Den wondru fu Yesus—San yu kan leri fu den?” (A Waktitoren, 15 yuli 2004)
Na ini na artikel disi yu kan leisi fa wan man kenki en libi di a leri fa Yesus ben broko en ede nanga tra sma.
„Mi ben e libi soso gi misrefi” (A Waktitoren, 1 oktober 2014)
Dyaso yu kan leisi fu wan tu prenspari sani di Yesus du èn o ten a du den.
„Prenspari sani di abi fu du nanga Yesus libi na grontapu” (Studeri Gado Wortu moro fini, penti 4)
