SIFUNDVO 16
Yini Jesu Layenta Ngesikhatsi Alapha Emhlabeni?
Bantfu labanyenti nabacabanga ngaJesu, bacabanga ngeluswane, umphrofethi lohlakaniphile, nobe ngendvodza lefako. Kodvwa kukhona yini lokunyenti lesingakufundza ngaye nasihlola indlela lebekaphila ngayo ngesikhatsi alapha emhlabeni? Kulesifundvo, sitawucoca ngetintfo letibalulekile Jesu latenta kanye nendlela letingakusita ngayo.
1. Ngumuphi umsebenti lobewubaluleke kakhulu kuJesu?
‘Kushumayela tindzaba letimnandzi teMbuso waNkulunkulu’ bekungumsebenti lobewubaluleke kakhulu kuJesu. (Fundza Lukha 4:43.) Bekashumayela tindzaba letimnandzi tekutsi Nkulunkulu utawumisa umbuso, nobe hulumende, lotawucatulula tonkhe tinkinga tebantfu. a Kwaphela iminyaka lemitsatfu nehhafu Jesu asebenta ngekutimisela, atjela bantfu lomlayeto lokhutsatako.—Matewu 9:35.
2. Jesu watentelani timangaliso?
LiBhayibheli likhuluma “ngemisebenti lemikhulu, ngetimangaliso, nangetibonakaliso Nkulunkulu latenta [ngaJesu].” (Imisebenti 2:22) Nkulunkulu waniketa Jesu emandla ekulawula simo selitulu, kondla bantfu labanyenti, kwelapha labagulako kanye nekuvusa labafile. (Matewu 8:23-27; 14:15-21; Makho 6:56; Lukha 7:11-17) Timangaliso latenta betikhombisa ngalokucacile kutsi bekatfunywe nguNkulunkulu. Taphindze takhombisa kutsi Jehova unemandla ekucatulula tonkhe tinkinga tetfu.
3. Yini lesingayifundza endleleni Jesu labephila ngayo?
Kuto tonkhe timo, Jesu bekalalela Jehova. (Fundza Johane 8:29.) Jesu wakwenta konkhe Babe wakhe lebekamcele kutsi akwente ngisho nobe bantfu bebamphikisa, futsi loko wakwenta kuphila kwakhe konkhe ngesikhatsi alapha emhlabeni. Wakhombisa kutsi bantfu bangakhona kukhonta Nkulunkulu ngisho nobe babhekene netimo letimatima. Ngaleso sizatfu, Jesu ‘wasishiyela sibonelo kuze silandzele tinyatselo takhe edvute.’—1 Phetro 2:21.
CHUBEKA UFUNISISA
Hlola kutsi Jesu wabacocela njani labanye tindzaba letimnandzi waphindze wenta netimangaliso.
4. Jesu wacocela labanye tindzaba letimnandzi
Jesu wahamba libanga lelidze emigwacweni legcwele tintfuli kuze acocele bantfu labanyenti tindzaba letimnandzi. Fundza Lukha 8:1, bese nicoca ngalemibuto:
-
Jesu washumayela kuphela bantfu lebebeta kutomlalela yini?
-
Yini Jesu layenta kute atfole bantfu?
Nkulunkulu bekashito kutsi Mesiya bekatawucocela labanye tindzaba letimnandzi. Fundza Isaya 61:1, 2, bese nicoca ngalemibuto:
-
Jesu wasigcwalisa njani lesiphrofetho?
-
Ucabanga kutsi bantfu lamuhla bayadzinga yini kuva letindzaba letimnandzi?
5. Jesu wafundzisa emaciniso labalulekile
Ngetulu kwekushumayela tindzaba letimnandzi ngeMbuso waNkulunkulu, Jesu wafundzisa tifundvo letilusito. Cabanga ngetibonelo letimbalwa taloko lakufundzisa eNshumayelweni yakhe ledvumile yaseNtsabeni. Fundza Matewu 6:14, 34 na-7:12, bese nicoca ngalemibuto:
-
Ngutiphi teluleko letilusito Jesu lakhuluma ngato kulamavesi?
-
Ucabanga kutsi leteluleko tisengasisita yini nalamuhla?
6. Jesu wenta timangaliso
Jehova waniketa Jesu emandla ekwenta timangaliso letinyenti. Kuze ubone letinye tato, fundza Makho 5:25-34 nobe udlale le-VIDEO, bese nicoca ngalemibuto lelandzelako.
-
Kule-video, yini lebeyikholelwa ngulona wesifazane lebekagula?
-
Yini loyitsandzako ngalesimangaliso?
Fundza Johane 5:36, bese nicoca ngalombuto:
-
Timangaliso lebetentiwa nguJesu ‘betifakazela’ ini ngaye?
Bewati yini?
Lokunyenti lesikwatiko ngaJesu kuvela etincwadzini letine teliBhayibheli letibitwa ngekutsi ngemaVangeli—Matewu, Makho, Lukha naJohane. Ngamunye walabaVangeli, wabhala imininingwane leyehlukile ngaJesu. Kufundza onkhe lamaVangeli kusenta sikucondze kahle kuphila kwaJesu ngesikhatsi alapha emhlabeni.
-
MATEWU
wayibhala kucala incwadzi yakhe. Isitjela lokunyenti ngaloko Jesu lakufundzisa ikakhulukati loko lakufundzisa ngeMbuso waNkulunkulu.
-
MAKHO
wabhala incwadzi lemfisha kunato tonkhe kulamaVangeli. Isitjela lokunyenti ngetintfo letijabulisako letenteka ekuphileni kwaJesu.
-
LUKHA
usitjela ngendlela umthantazo lebewubaluleke ngayo kuJesu kanye nendlela lebekaphatsa ngayo bantfu besifazane.
-
JOHANE
usitjela tintfo letinyenti Jesu latikhuluma nebangani bakhe kanye nalabanye bantfu futsi loku kusisita sibone kutsi bekangumuntfu lonjani.
LABANYE BANTFU BATSI: “Jesu bekamane nje ayindvodza lelungile, kodvwa bekangesuye Mesiya.”
-
Wena utsini?
LOKO LESICOCE NGAKO
Jesu washumayela ngeMbuso waNkulunkulu, wenta timangaliso futsi walalela Jehova kuto tonkhe timo.
Yini Loyifundzile?
-
Ngumuphi umsebenti lobewubaluleke kakhulu kuJesu ngesikhatsi alapha emhlabeni?
-
Timangaliso letentiwa nguJesu betifakazela ini?
-
Ngutiphi tifundvo letilusito Jesu latifundzisa?
LOKUNYE LONGAKUHLOLA
Ngusiphi sihloko Jesu labevame kukhuluma ngaso?
Tfola kutsi yini lesenta siciniseke kutsi timangaliso letentiwa nguJesu tenteka mbamba.
Fundza indlela kuphila kwalenye indvodza lokwashintja ngayo nayifundza ngendlela Jesu lebekabakhatsalela ngayo labanye bantfu.
“Bengiticabangela Mine Kuphela” (Sicongosekulindza saNovember 1, 2014)
Buka luhla lwetintfo Jesu latenta, ngekulandzelana kwato.
a Tifundvo 31 kuya ku-33 titawucoca kabanti ngeMbuso waNkulunkulu.
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Siyini Sifundvo SeliBhayibheli Lesichutjwa BoFakazi BaJehova?
Ungasebentisa nobe ngabe nguliphi lihumusho leliBhayibheli nawutadisha naBoFakazi BaJehova. Ukhululekile kumema umndeni wakho wonkhe nobe bangani bakho kutsi babe khona nawufundza.
