LESOGNE 16
Ino ty Natao i Jesosy Tamy i Reke Tan-tane Etoỳ?
Maro ty ndaty mihevetse fa anak’ajaja, ndra mpaminany hendre, ndra lahilahy fa mate ty Jesosy. Hahafantatse ty miomba aze tikagne naho mandineke ty fiaigna’e tambone tane etoy. Ho treantikagne amy ty lesogne toy ato ty raha lahibey ila’e natao i Jesosy naho ty voka izay amantikagne.
1. Ino ty asa lahibey natao i Jesosy?
‘Ty fitoriagne ty talily soa i Fanjakàn’Andrianagnaharey’ ty asa lahibey natao i Jesosy. (Vakio ty Lioka 4:43.) Izao ty talily soa nitorie’e: Hagnoregne fanjakagne ty Andrianagnahare, sady io ro hamaha ze olagne mahazo o ndatio. a Tena niasa mafe ty Jesosy nagnambara tamo o ndatio o hafatse fanjaka iohoe tagnate ty telo taogne naho tapa’e.—Matio 9:35.
2. Nagnaporofo ino i fahagagagne natao i Jesosy rey?
Rehafe ty Baiboly fa maro ty ‘fahagagagne naho ty fambara vaho ty famantaragne nataon’Andrianagnahare tamy ty alala [i Jesosy].’ (Asan’ny Apostoly 2:22) Nimean’Andrianagnahare hery ty Jesosy, le afake nifehe o toets’andrò, nagnomey hanegne ndaty agn’arivo’e, nagnasitragne ty marare, sady namelogne ty mate. (Matio 8:23-27; 14:15-21; Marka 6:56; Lioka 7:11-17) Trea boake amy i fahagagagne natao i Jesosy rey tie Andrianagnahare ty nagnirake aze. Magnaporofo ka rey fa managne hery hamahàgne o olagneo iaby ty Jehovah.
3. Ino ty raha ianarantikagne boake amy ty raha niaigna i Jesosy?
Nankatò i Jehovah lognandro ty Jesosy. (Vakio ty Jaona 8:29.) Nanao ze raha nandilian-dRae’e aze avao ty Jesosy ndra tie nisy nanakagne aza. Izay ty natao’e amparake ty nimateza’e. Niporofoe’e fa afake tsy mivalike aman’Andrianagnahare o ndatio ndra tie miatreke raha sarotse aza. ‘Nagnomey modely’ ho antikagne ty Jesosy mba ‘hagnorihantikagne marine ty lia’e.’—1 Petera 2:21.
ANDAO HANDINEKE TY PITSOPITSO’E
Hodinehentikagne ato ty natao i Jesosy naho fa nitory i talily soay tamo o ndatio naho ty nahavy aze nahavita nanao fahagagagne.
4. Nirehake i talily soay ty Jesosy
Nandeha tomboke an-jato’e kilometatse amy ty lalagne feno lemboke ty Jesosy mba hirehafagne i talily soay amy ty ndaty maro. Vakio ty Lioka 8:1, sady iharò midineke ty fagnonteneagne retoa:
-
Tamy ze ndaty nivory mba hitsanogne aze avao vao ty nitoria i Jesosy?
-
Ino ty kezake natao i Jesosy mba hahatreavagne ndaty hitoriagne i talily soay?
Nisaontsien’Andrianagnahare mialoha fa hirehake talily soa ty Mesia. Vakio ty Isaia 61:1, 2, sady iharò midineke ty fagnonteneagne retoa:
-
Akore ty nagnatanteraha i Jesosy o faminaniagne iohoe?
-
Mila maharey i talily soa rey ka vao ty ndaty amy izao, arake ty heve’o?
5. Nampianatse hamarenagne sarobily ty Jesosy
Ankoatse ty fitoriagne ty talily soa i Fanjakàn’Andrianagnaharey, le nampianatse lesogne azo ampiharegne amy ty fiaignagne andavanandro ka ty Jesosy. Trea amy i toriteny malaza tambone vohitse teoy ty ila’e amy izay. Vakio ty Matio 6:14, 34 naho ty 7:12, sady iharò midineke ty fagnonteneagne retoa:
-
Ino ty torohevetse nirehafe i Jesosy amo o andine’e rehoe?
-
Mbe mahasoa amo o androntikagne hinane zao vao o torohevetse reo, arake ty heve’o?
6. Nanao fahagagagne ty Jesosy
Nimea i Jehovah hery ty Jesosy, le nahavita nanao fahagagagne maro. Intoy misy ohatse raike, vakio ty Marka 5:25-34 ndra alefaso i VIDEO oy. Iharò midineke ty fagnonteneagne retoa naho fa avy eo.
-
Ino ty raha natokisa i ampelay?
-
Ino ty nitea’o tamo o fahagagagne iohoe?
Vakio ty Jaona 5:36, sady iharò midineke ty fagnonteneagne toy:
-
‘Magnaporofo’ ino i fahagagagne natao i Jesosy rey?
Raha mahaliagne
Trea amy ty boke efatse agnate Baiboly ao atao tihoe Filazantsara, ty miomba ty fiaigna i Jesosy. Le ty boke i Matio, i Marka, i Lioka, naho i Jaona. Sambe mirehake pitsopitso’e miomba i Jesosy i mpanoratse aze rey. Ahafantarantikagne ty nifiaigna i Jesosy ty famakiantikagne o boke efatse rehoe.
-
MATIO
Ty boke’e ro nivita soratse voaloha’e. Mirehake miomba ty fampianara i Jesosy io, lohotsie fa ty miomba i Fanjakàn’Andrianagnaharey.
-
MARKA
Ty boke’e ro fara’e fohe. Mirehake raha miambake niseho tamy ty fiaigna i Jesosy io.
-
LIOKA
Ambaha’e fa tena lahibey tamy i Jesosy ty mivavake sady nisoa ty findesa’e o ampelao.
-
JAONA
Tantarae’e amy ty boke’e ao ty miomba ty fifandrambesa i Jesosy amy ty nama’e maifitse aze naho ty ndaty hafa. Izay ty hagnampe antikagne hahafantatse tie ndaty manao akore ty Jesosy.
MISY TY MIREHAKE FA: “Ndaty soa fagnahy avao ty Jesosy fa tsy Mesia.”
-
Akore ty heve’o?
FAMINTIGNAGNE
Nitory miomba i Fanjakàn’Andrianagnaharey, nanao fahagagagne sady nankatò i Jehovah lognandro ty Jesosy.
Fameregnagne
-
Ino ty asa lahibey natao i Jesosy tamy i reke tan-tane etoỳ?
-
Nagnaporofo ino i fahagagagne natao i Jesosy rey?
-
Ino ty lesogne azo ampiharegne amy ty fiaignagne andavanandro nampianare i Jesosy?
FAGNAZAVAGNE FAGNAMPE’E
Ino ty foto-kevetse tena nampianare i Jesosy?
Nagnino tikagne ro afake matoky fa tena nisy i fahagagagne natao i Jesosy rey?
Nisy voka’e tamy ty lahilahy raike toy ty fahafoezan-tegna nanagna i Jesosy.
“Tea Tegna Loatse Raho tie Taloha” (Fitalakesan-davitse 1 Oktobra 2014)
Henteo ato ty filahara ty raha miambake natao i Jesosy tamy ty fanompoagne natao’e tan-tane etoy.
a Hirehake miomba o Fanjakàn’Andrianagnahare iohoe amy ty pitsopitso’e ty Lesogne 31-33.
Va'e ho Tea'o Ka
FAGNONTENEAGNE FAPETRA O NDATIO
Inogne ty Atao Tihoe Fianaragne Baiboly?
Afake mampiasa ze Baiboly tea’o rehe naho fa mianatse Baiboly amy ty Vavolombelo i Jehovah. Maimaimpoagne i fianaragney sady afake taone’o hiarake hianatse ama’o ka ty keleia’o ndra ty ragne’o.
