AISISIAET NA 16
Anyoika bo Nuabu Yesu Kiswama Naajaar Toma Akwap?
Eomitos itunga luipu ebe eroko Yesu erai imukeru yenipuda aingarakinio, ido ice eomitos ebe erai ngesi enaabi loecobe, arai bo etunganan loewuta atwanare. Ipedori kereka oni ajenun nuipu nuikamunitos nges kotoma aisisia akiro nuikamunitos akeijar naajaar toma akwap? Kaisisiaet kana, irereori oni akiro nuepolok nuiswamat ngesi ka epone loingarakiniata ngun ijo.
1. Ani bo aswam naapol noi naeswamai Yesu?
Aswam naka Yesu naapol arai “alimonokin akiro nukajokak nuka Ajakanut Naka Edeke.” (Kosiom Luka 4:43.) Abu ngesi kolimonok akiro nukajokak ebe esipokini Edeke ajakanut arai bo nat apugan naelemari atiokisio kere nuka itunga. a Iswamat Yesu kagogong noi alimonokin itunga akiro nu nuajokak adaun ikar iuni katutubet.—Matayo 9:35.
2. Kanuinyo eswama Yesu aumonokineta?
Inerit Ebaibuli nuikamunitos “aswamisio [nuipu] nukapedor, ka nukaumokin ka aanyuneta da nukiswamai Edeke [kotoma Yesu].” (Aswamisio 2:22) Kotoma apedor naka Edeke, abu Yesu kitikok ekwam, kitan itunga luipu, kitangaleu luadekasi, ido abu kitajaru luatwak. (Matayo 8:23-27; 14:15-21; Marako 6:56; Luka 7:11-17) Aumonokineta nueswamai Yesu itodunitos cut ebe ejukunit Edeke ngesi. Itodunitos bobo ebe ejaatar Yawe keda apedor naka alemar atiokisio kere.
3. Anyoika bo nuisisiauni oni kaneejai Yesu?
Abu Yesu korimaa Yawe kojautene edio kere. (Kosiom Yokana 8:29.) Karaida atereikina ngesi keda areio, kitoni atwanare, abu Yesu kiswama kamunoonut ngun kere nuakoto Papake nges aswam. Abu ngesi kitodu ebe epedorete itunga aijaanakin Edeke karaida kotoma ojautene loetiono noi. Kwangin, abu Yesu kinyekinia oni ‘aanyunet tetere kitupaari ikukutuke.’—1 Petero 2:21.
KISISIAU NUIPU
Kisisiau nuikamunitos epone loalimonokinia Yesu itunga akiro nukajokak ka aumonokineta nuabu ngesi kiswama.
4. Abu Yesu kolimonok akiro nukajokak
Kanu aimor akiro nukajokak keda itunga luipu abu Yesu kolot amairon nuipu korotin luapol apua. Kosiom Luka 8:1, kosodete aimor aingiseta nuta:
-
Alimonokini kereka Yesu itunga bon luatukokina aiirar nges?
-
Epone ani eswamaa Yesu kagogong kanu adumun itunga?
Adwarit Edeke ebe eraun Mesia loelimonokini akiro nukajokak. Kosiom Isaia 61:1, 2, kosodete aimor aingiseta nuta:
-
Epone ani abu Yesu kitodolikinia adwaretait ngin?
-
Iwomit kereka jo ebe ipudasi itunga lolo aiirar akiro nu nukajokak?
5. Isisianakinit Yesu itunga akiro nukabeit ido nuingarakinete
Ilema alimonokin akiro nukajokak nuka Ajakanut Naka Edeke, akiro nuesisianakini Yesu araasi nuingarakinete. Kwape aanyunet, kirereo adis nukotoma Oinerike loejenara loko Moru. Kosiom Matayo 6:14, 34 keda 7:12, kosodete aimor aingiseta nuta:
-
Anu bo aicorakineta nuingarakinete nuabu Yesu kijaik kokokoron kangul?
-
Iwomit ijo ebe ingarakinete aicoreta nu itunga lolo?
6. Abu Yesu kiswama aumonokineta
Abu Yawe kisipedoo Yesu aswam aumonokineta nuipu. Kanu ajenun aanyunet adiopet, kosiom Marako 5:25-34 arai bo koboliak EBIDIO. Kosodete aimor aingiseta nuetupakinete.
-
Kobidio kalo, anyoika bo nueyuunit aberu ngin naadeka?
-
Inyo bo iminakinit ijo kotoma aumokinet kangin?
Kosiom Yokana 5:36, kosodete aimor aingiset nata:
-
Aumonokineta nuiswamat Yesu, inyo “itejenunito” kanuikamunitos nges?
Ijeni kereka jo?
Akiro nuipu nuijeni oni nuikamunitos Yesu ejaasi toma oitaabon iwongon luka Ebaibuli luenyaritai Eijiri—Matayo, Marako, Luka, keda Yokana. Kangol ewadikan eijiri, iwadikat acekiro nuegitakina nuikamunitos Yesu. Kisiom oni itaabon ngul kere iwongon, itacaikinete oni jokan nuikamunitos aijar naka Yesu.
-
MATAYO
nges egearit aiwadik eijirike. Elimokinit oni aisisianakineta nuipu nuka Yesu, ka cut nuesisianakini ngesi nuikamunitos Ajakanut Naka Edeke.
-
MARAKO
iwadikat eijiri loewuriana kakere. Inerit noi nuikamunitos aswamisio nuka Yesu.
-
LUKA
itodunit ebe ayait Yesu ailip kwape ibore yenapol noi ido itodunit bobo epone loka asianut loayaitor Yesu angor.
-
YOKANA
elimokinit oni akiro nuipu nuineritos Yesu keda ikepapero, ka luce da. Ingarakinete nu oni ajenun iponesio luka Yesu.
EBAKASI ICETUNGA EBE: “Erai Yesu Edeke Lokapedor Kere.”
-
Iwomit ijo biai?
NUIDAU AISISIAUN
Elimonokinit Yesu nuikamunitos Ajakanut Naka Edeke, iswamat aumonokineta, ido arimaarit ngesi Yawe kotoma ojautene edio kere.
Ainyogoor
-
Ani bo aswam naapol kakere naeswamai Yesu naajaar ngesi akwap?
-
Aumonokineta nueswamai Yesu itogogongitos inyo?
-
Epone ani ingarakiniata oni akiro nuesisianakini Yesu?
ISISIAU BOBO NUTA
Anu bo akiro nuetopoloorit Yesu einer adepar nuce kere?
“Ajakanut Naka Edeke—Apolouke Kaneejai Yesu” (Watchtower, Elap Loitomonet 1, 2014)
Isisiau kanuinyo icamunitor oni cut ebe aumonokineta nueswamat Yesu apotu kojaunos.
Kosiom epone loejulakinia etunganan akeijar akaulo naka aisisiaun epone loapodokinitor Yesu itunga.
“Apodokinit Eong Nuikamunitos Akaijar Bon” (Watchtower, Elap Loitomonet 1, 2014)
Koany akiro nuepolok nuiswamat Yesu nuimarunitai katupanakinetakec.
a Aisisiaet na 31-33 epote aitetem nuikamunitos Ajakanut Naka Edeke kotoma aidules.
