SJEJEL 16
¿Jasa skʼulan ja Jesús ja yajni ti ajyi bʼa Luʼum?
Yajni ja kristyano wa spensarane bʼa Jesús, kechanta wa xyilawe jun yal alats ke mi xbʼobʼ skoltay sbʼaj, jun aluman bibo ma jun winik bʼa ojtikxa chamuk. Pe ¿mi maʼ ojni jnatik sbʼaj mas ta jkʼulantik estudiar lek ja sakʼanil ajyi bʼa Luʼumi? Ja bʼa sjejel it oj jpaklaytik jujuntik ja jas mas tʼilan skʼulan sok jastal ti chʼikana.
1. ¿Jas aʼtel mas tʼilan skʼulan ja Jesús?
Ja aʼtel mas tʼilan skʼulan ja Jesús jani xcholjel ja «lekil rasonik sbʼaja sGobyerno ja Dyosi» (kʼuman ja Lucas 4:43). Xcholo ja lekil rason ke ja Dyos oj ya kujlajuk jun gobyerno bʼa oj stojbʼes spetsanil ja swokole ja kristyano. a Bʼa oxe jabʼil sok snalan, ja Jesús jani waj skʼujol xcholjel ja lekil rason it (Mateo 9:35).
2. ¿Bʼa jas makuni ja milagroʼik bʼa Jesús?
Ja Biblia wa xcholo ke ja «Dyos ya makunuk ja yeʼn [ja Jesús] bʼa skʼulajel jastik jel chaʼanyabʼalil, jastik jel cham yiljel sok milagroʼik» (Hechos 2:22). Soka yip ja Dyos, ja Jesús ya lamxuk jun tsatsal ikʼ sok jaʼ, yayi swaʼel milik kristyano, ya tojbʼuk ja matik maloʼay sok ya sakʼwuk jujuntik (Mateo 8:23-27; 14:15-21; Marcos 6:56; Lucas 7:11-17). Ja milagroʼik skʼulani, sjeʼa jaman lek ke jani jekji yuja Dyos. Cha sjeʼa ke ja Jyoba ayni yip bʼa stojbʼesel ja jwokoltiki.
3. ¿Jas wa sjeʼakitik ja sakʼanil yiʼaj ja Jesús?
Ja Jesús tolabida skʼuʼanyi ja Jyoba (kʼuman ja Juan 8:29). Tojni ajyi man chami sok skʼulan spetsanil ja jas kʼanjiyi yuja sTati ama jitsan skʼanawe oj stim-e. Sjeʼa ke ja kristyano oj bʼobʼ kaʼteltaytik ja Dyos ama x-ekʼ jbʼajtik wokolik. Jach jastal jaw, ja Jesús ‹yaʼakanyile ja sjejel› ja snochumaniki bʼa ‹jachni mero oj stsajlaye› (1 Pedro 2:21).
LA JNEBʼTIK MAS
La kiltik jastal xcholo ja Jesús ja lekil rasonik sok ja milagroʼik skʼulan.
4. Ja Jesús xcholo ja lekil rasonik
Ja Jesús bʼejyi bʼa najtik lugarik bʼa jel ja polbo bʼa jachuk oj xcholyi ja lekil rasonik ja janekʼni kristyano oj staʼi. Kʼumanik ja Lucas 8:1 sok loʼilananik sbʼaja jas ti nochani:
-
¿Kechan maʼ xcholoyi ja jitsan kristyano wa xjak tajuk bʼa oj maklajuki?
-
¿Jasa skʼujolan skʼulajel ja Jesús bʼa oj staʼ ja kristyano?
Ja Dyos yala ke ja Mesías oj xchol lekil rasonik. Kʼumanik ja Isaías 61:1, 2 sok loʼilananik sbʼaja jas ti nochani:
-
¿Jastal ya kʼotuk ja Jesús ja jaw?
-
¿Oj maʼ awal ke ja kristyano cha tʼilani oj smaklaye ja lekil rasonik?
5. Ja Jesús sjeʼa jastik jel xmakuni
Mi kechan xcholo ja lekil rasonik bʼa sGobyerno ja Dyos, cha sjeʼa jastik jel xmakuni. La kiltik jujuntik sjejel ti elel ja bʼa Loʼil bʼa Wits jel naʼubʼal sbʼaj. Kʼumanik ja Mateo 6:14, 34 sok 7:12, sok loʼilananik sbʼaja jas ti nochani:
-
¿Jastik rason yaʼa ja Jesús ja bʼa bersikuloʼik jaw?
-
¿Wan maʼ xa kʼuʼan ke ja rasonik jaw ojni skoltay ja kristyano?
6. Ja Jesús skʼulan milagroʼik
Ja Jyoba yayi yip ja Jesús bʼa skʼulajel milagroʼik. Bʼa yiljel jun sjejel, kʼumanik ja Marcos 5:25-34 ma kʼelawik ja BIDEO. Tsaʼan loʼilananik sbʼaja jas ti nochani:
-
¿Jasa seguro ajyi ja ixuk maloʼayi?
-
¿Jasa mas wa spayawa ja bʼa milagro jaw?
Kʼumanik ja Juan 5:36 sok loʼilananik sbʼaja jas ti nochani:
-
¿Jasa wa «xchiktes» ja milagroʼik skʼulan ja Jesús?
¿Wan maʼ xa naʼa ajyi?
Tʼusan mi yibʼanal ja jas wa xnaʼatik bʼa Jesús tey bʼa chane libro bʼa Biblia sbʼiʼil Evangelio. Ja tsʼijbʼuman ja bʼa chane Evangelio, Mateo, Marcos, Lucas sok Juan, tuktukil ja jastal xcholowe sbʼaja Jesús. Pe wani syaka sbʼaj sok wa xya jnatik tsʼikan sok ja jel chamyabʼjel ekʼ ja sakʼanil.
-
JA MATEO
yeʼn bʼajtan stsʼijbʼan june ja bʼa Evangelioʼik. Ja slibro jani wa xcholo ja jas sjeʼa ja Jesús, pe mastoni ja jas yala ja bʼa sGobyerno ja Dyos.
-
JA MARCOS
stsʼijbʼan ja Evangelio mas kom. Wa xcholo jastik jel chamyabʼalil ekʼi.
-
JA LUCAS
wa sjeʼa ja stʼilanil ja orasyon sok jastal ja Jesús yajxta yila ja ixuke.
-
JA JUAN
jani jel xyala ja smodoʼik ja Jesús, yujni ya ochuk jitsan ja bʼa jastal loʼilani soka yamigoʼik sok ja tuk kristyano.
JA JAS WA XYALAWE JUJUNTIK: «Ja Jesús yeʼn ja Dyos maʼ jel Juntiro ja Yipi».
-
¿Jas waxa pensaran?
JA JASA NEBʼA
Ja Jesús xcholo ja sGobyerno ja Dyos, skʼulan milagroʼik sok tolabida skʼuʼanyi ja Jyoba.
Yajel juljkʼujoltik
-
¿Jasa aʼtel mas tʼilan skʼulan ja Jesús yajni ti ajyi bʼa Luʼum?
-
¿Jastik xchiktes ja milagroʼik bʼa Jesús?
-
¿Jastik sjeʼa jel xmakuni ja Jesús?
LEʼA TUK JASTIK
¿Jasa rason mas tʼilan xcholo ja Jesús?
«¿Jas yuj jel tʼilan bʼa Jesús ja sGobyerno ja Dyos?» (Ja Juʼun Cholumani, 1 bʼa octubre bʼa 2014)
Ila jas yuj ja milagroʼik skʼulan ja Jesús seguro aytik ke merani ekʼi.
«Ja milagroʼik bʼa Jesús: ¿jas wa xbʼobʼa nebʼe?» (Ja Juʼun Cholumani, 15 bʼa julio bʼa 2004)
Kʼuman jastal tukbʼi ja sakʼanil jun winik yajni snebʼa ke ja Jesús mi waj skʼujol bʼa yeʼnta.
Ila jun lista ja bʼa jastik jel tʼilan skʼulan ja Jesús soka bʼa tyempoʼik ekʼi.
a Ja bʼa sjejel 31 man 33 wa xcholo mas jaman jasunuk ja sGobyerno ja Dyos.
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
