DYONDZO 16
Yesu U Endle Yini Loko A Ri eMisaveni?
Vanhu vo tala va teka Yesu a ri n’wana lontsongo, muprofeta wo tlhariha kumbe wanuna la nga le ku feni. Kambe, xana hi nga dyondza swo tala hi yena hi ku va hi kambisisa vutomi byakwe loko a ri laha misaveni? Eka dyondzo leyi, hi ta kambisisa swin’wana swa swilo swa nkoka leswi Yesu a swi endleke ni ndlela leyi swi nga ku pfunaka ha yona.
1. Hi wihi ntirho lowu a wu ri wa nkoka swinene eka Yesu?
Ntirho wa nkoka swinene eka Yesu a ku ri ku “chumayela mahungu lamanene ya Mfumo wa Xikwembu.” (Hlaya Luka 4:43.) U dyondzise vanhu leswaku Xikwembu xi ta veka mfumo lowu nga ta tlhantlha swiphiqo hinkwaswo. a Yesu u tirhe hi matimba leswaku a chumayela mahungu lama yo tsakisa ku ringana malembe manharhu ni hafu.—Matewu 9:35.
2. Hikwalaho ka yini Yesu a endle masingita?
Bibele yi hlamusela “mitirho ya matimba ni masingita ni swikombiso leswi Xikwembu xi swi endleke hi ku tirhisa [Yesu].” (Mitirho 2:22) Xikwembu xi nyike Yesu matimba yo lawula maxelo, ku phamela mitshungu swakudya, ku horisa lava vabyaka ni ku pfuxa lava feke. (Matewu 8:23-27; 14:15-21; Marka 6:56; Luka 7:11-17) Masingita lama Yesu a ma endleke ma swi veke erivaleni leswaku a a rhumiwe hi Xikwembu. Ma tlhele ma kombisa leswaku Yehovha u ni matimba yo herisa swiphiqo swa hina hinkwaswo.
3. Hi nga dyondza yini eka ndlela leyi Yesu a hanyeke ha yona?
Yesu u yingise Yehovha eka swilo hinkwaswo. (Hlaya Yohane 8:29.) Hambiloko Yesu a kanetiwa, u endle leswi Tata wakwe a a lava leswaku a swi endla ku fikela eku feni. U kombise leswaku vanhu va nga swi kota ku tirhela Xikwembu hambiloko swi tika. Hi ndlela yoleyo, Yesu u hi ‘vekele xikombiso leswaku hi ta landzelerisisa mikondzo yakwe.’—1 Petro 2:21.
ANAKANYISISA
Kambisisa ndlela leyi Yesu a chumayeleke mahungu lamanene ha yona ni masingita lama a ma endleke.
4. Yesu u chumayele mahungu lamanene
Yesu u fambe mpfhuka wo leha swinene hi milenge a ri karhi a chumayela vanhu vo tala mahungu lamanene. Hlaya Luka 8:1, ivi mi bula hi swivutiso leswi:
-
Xana Yesu a a chumayela ntsena vanhu lava a va ta eka yena va ta n’wi yingisa?
-
U endle matshalatshala wahi leswaku a kuma vanhu vo va chumayela?
Xikwembu xi vule leswaku Mesiya a a ta chumayela mahungu lamanene. Hlaya Esaya 61:1, 2, ivi mi bula hi swivutiso leswi:
-
Yesu u endle yini leswaku vuprofeta lebyi byi endleka?
-
Xana u vona onge vanhu va fanele va twa mahungu lawa lamanene?
5. Yesu u dyondzise tidyondzo ta risima
Hambileswi Yesu a a chumayela mahungu lamanene ya Mfumo wa Xikwembu kambe u tlhele a dyondzisa ni tidyondzo tin’wana leti pfunaka. Xiya swikombiso swin’wana eka Dyondzo yakwe leyi dumeke ya le Ntshaveni. Hlaya Matewu 6:14, 34 na 7:12, ivi mi bula hi swivutiso leswi:
-
Hi swihi switsundzuxo swa nkoka leswi Yesu a vulavuleke ha swona eka matsalwa lawa?
-
U vona onge switsundzuxo leswi swa ha pfuna ninamuntlha?
6. Yesu u endle masingita
Yehovha u nyike Yesu matimba yo endla masingita yo tala. Hlaya Marka 5:25-34 kumbe u tlanga VHIDIYO, leswaku u vona rin’wana ra masingita wolawo. Bulani hi swivutiso leswi landzelaka.
-
I yini leswi wansati wa le ka vhidiyo leyi a a swi tshemba?
-
I yini leswi ku tsakisaka hi singita leri?
Hlaya Yohane 5:36, ivi mi bula hi xivutiso lexi:
-
Masingita ya Yesu ma kombisa “vumbhoni” byihi hi yena?
Xana a wu swi tiva?
Swilo swo tala leswi hi swi tivaka hi Yesu swi huma eka tibuku ta mune ta Bibele leti vuriwaka Tievhangeli, ku nga Matewu, Marka, Luka na Yohane. Mutsari ha un’we wa tievhangeli leti, u hlamusele ni timhaka leti nga tsariwangiki hi vatsari lavan’wana ta vutomi bya Yesu. Kambe loko hi hlaya tievhangeli leti ta mune, hi kota ku n’wi tiva kahle Yesu.
-
MATEWU
u rhange a tsala Evhangeli yakwe. Yi vulavula ngopfu hi tidyondzo ta Yesu, ngopfungopfu leswi a swi dyondziseke hi Mfumo wa Xikwembu.
-
MARKA
u tsale Evhangeli yo koma swinene. Ya tsakisa naswona yi lo mphaa, hi swilo leswi Yesu a swi endleke.
-
LUKA
u vulavula ngopfu hi xikhongelo ni ndlela leyi Yesu a va khomeke ha yona vavasati.
-
YOHANE
u vulavula ngopfu hi vumunhu bya Yesu ni ku hlamusela mabulo yo tala lama Yesu a veke na wona ni vanghana vakwe ni van’wana.
VAN’WANA VA RI: “Yesu i Xikwembu xa Matimba Hinkwawo.”
-
Wena u ri yini?
NKATSAKANYO
Yesu u chumayele hi Mfumo wa Xikwembu, u endle masingita naswona u yingise Yehovha eka swilo hinkwaswo.
Mpfuxeto
-
Hi wihi ntirho lowu a wu ri wa nkoka swinene eka Yesu loko a ri laha misaveni?
-
Masingita ya Yesu ma kombise yini?
-
Hi tihi tidyondzo ta nkoka leti Yesu a ti dyondziseke?
KUMA LESWI ENGETELEKEKE
Hi tihi timhaka leti Yesu a a vulavula ngopfu ha tona?
“Mfumo Wa Xikwembu—Lexi Endlaka Wu Va Wa Nkoka Eka Yesu” (Xihondzo xo Rindza, October 1, 2014)
Kambisisa leswaku hikwalaho ka yini hi fanele hi tshemba leswaku Yesu u ma endlile masingita.
“Masingita Ya Yesu—Xana U Nga Dyondza Yini Eka Wona?” (Xihondzo xo Rindza, July 15, 2004)
Twana ndlela leyi wanuna un’wana a cinceke vutomi byakwe ha yona hileswi a dyondzeke hi Yesu.
“A Ndzi Nga Khathali Hi Vanhu Van’wana” (Xihondzo xo Rindza, October 1, 2014)
Vona swilo leswi Yesu a swi endleke hi ku landzelelana ka swona hi nkarhi lowu a a endla ntirho wakwe ha wona.
a Dyondzo 31 ku ya eka 33 ti ta hlamusela Mfumo wa Xikwembu hi xitalo.
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
