DJONDZO 16

Yesu A Yentxe Yini Nkama Na A Li Lani Misaveni?

CHAYA

Vanhu va vanyingi loko va pimisa hi Yesu va pimisa hi xibebetana, muprofeta wa ku tlhariha kumbe munhu lweyi a nga kusuhi ni ku fa. Kambe hi nga tiva swa swinyingi hi yena loko hi djondza hi wutomi la yena nkama na a li lani misaveni. Ka djondzo leyi hi ta vona minchumu ya yinyingi ya lisima leyi Yesu a nga yi yentxa ni swaku yi nga ku pfunisa ku yini.

1. A ku li wini ntirho wa lisima ka Yesu?

Ntirho wa lisima hintamu ka Yesu a ku li ku “chumayela mahungu ya ku tsakisa ya Mfumu wa Xikwembu.” (Lerha Luka 4:43.) Yena a a chumayela mahungu ya ku tsakisa ya leswaku Xikwembu xi ta veka Mfumu lowu nga ta helisa swikarhatu hinkwaswu swa vanhu. a Yesu a tirhe hintamu swaku a chumayela mahungu ya ku tsakisa ku ringana malembe manharhu ni hafu. — Matewu 9:35.

2. Hi mhaka muni Yesu a yentxe masingita?

Bibele li vula swaku ‘Xikwembu xi [yentxe] . . . mintirho ya matimba ni masingita ni swikombiso . . . hi ku tirhisa [Yesu].” (Mintirho 2:22) Hi matimba ya Xikwembu, Yesu a kote ku lawula minchumu ya ku fana ni swidzedze, ku nyika vanhu va vanyingi swakudla, ku daha lava a va vabya, hambi hi ku pfuxa lava a va file. (Matewu 8:23-27; 14:15-21; Marku 6:56; Luka 7:11-17) Masingita lawa Yesu a nga ma yentxa ma kombise swaku a a rhumiwe hi Xikwembu, nakambe leswo swi kombise swaku Yehovha a ni matimba ya ku helisa swikarhatu swa hina hinkwaswu.

3. Hi nga djondza yini ka leswi Yesu a a hanyisa xiswona?

Minkama hinkwayu Yesu a a yingisa Yehovha. (Lerha Yohani 8:29.) Hambileswi a a kanetiwa, Yesu a yingise Papayi wa yena minkama hinkwayu anze a fa. Yena a kombise swaku swa koteka kuva vanhu lava va tirhelaka Xikwembu va xi yingisa hambiloko va kumana ni swikarhatu. Hi mhaka leyo, Yesu a hi siyele “xikombiso leswaku [hi] ta landzelela minkondzo ya yena.” — 1 Pedru 2:21.

DJONDZA SWIN’WANA

Vona swaku Yesu a chumayelise ku yini mahungu ya ku tsakisa ni swaku a yentxise ku yini masingita.

4. Yesu a chumayele mahungu ya ku tsakisa

Yesu a fambe mpfhuka wa ku leha hi minenge ka switaratu leswi a swi tale hi wuthulu na a chumayela mahungu ya ku tsakisa ka vanhu hinkwavu lava a a kumana na vona. Lerhani Luka 8:1, mi gama mi bula hi swivutiso leswi landzelaka:

Ku nga va swaku Yesu a a chumayela ntsena vanhu lava a va ta ka yena va ta mu yingisela?
Hi yini minzamu leyi Yesu a nga yi yentxa swaku a kuma vanhu va ku va chumayela?

Xikwembu se a xi vulile swaku Mesiya a a ta chumayela mahungu ya ku tsakisa. Lerhani Esaya 61:1, 2, mi gama mi bula hi swivutiso leswi landzelaka:

Yesu a li hetisise ku yini wuprofeta leli?
U vona swaku vanhu namuntlha va fanele va twa mahungu ya ku tsakisa?

5. Yesu a djondzise ntiyiso wa lisima

Yesu a nga chumayelanga hi Mfumu wa Xikwembu ntsena kambe a tlhele a djondzisa vanhu minchumu ya lisima. Vona swin’wana leswi a nga swi djondzisa ka Djondzo ya le Nhaveni. Lerhani Matewu 6:14, 34, na 7:12, mi gama mi bula hi swivutiso leswi landzelaka:

Hi yini minchumu ya lisima leyi Yesu a nga yi vula ka tindzimana leti?
Leswi Yesu a nga swi vula swi nga hi pfunisa ku yini?

6. Yesu a yentxe masingita

Yehovha a nyike Yesu matimba ya ku yentxa masingita. Leswaku mi vona manʼwana ya kona, lerhani Marku 5:25-34 kumbe sixtirani VHIDIYO. Mi gama mi bula hi swivutiso leswi landzelaka.

VHIDIYO: Ku Dahiwa Ka Wansati Lweyi A A Vabya (5:10)

I yini leswi wansati lweyi hi nga mu vona ka vhidiyo a a kholwa ka swona?
I mpsini swi nga ku tsakisa ka leswi Yesu a nga swi yentxa?

Lerhani Yohani 5:36, mi gama mi bula hi xivutiso lexi landzelaka:

Masingita lawa Yesu a nga ma yentxa ma kombisa yini hi yena?

Indje a wu swi tiva?

Minchumu ya yinyingi leyi hi yi tivaka hi Yesu hi yi kuma ka Bibele, ka 4 wa mabuku lawa ma vitaniwaka Tievhangeli. Ku nga Matewu, Marku, Luka, na Yohani. Mabuku lawa ma hi byela minchumu ya lisima hi Yesu, se loko hi ma djondza hinkwawu, ma hi pfuna ku mu tiva ku yampsa Yesu.

MATEWU

hi lona la ku sungula ka mabuku lawa ya 4. Li vulavula hintamu hi leswi Yesu a nga swi djondzisa, ngopfungopfu leswi a nga swi djondzisa hi Mfumu wa Xikwembu.
MARKU

hi lona la litsongo ka mabuku lawa ya 4, naswona li vulavula hintamu hi minchumu ya ku hlamalisa leyi yi nga yentxeka.
LUKA

li hi byela hi leswi Yesu a a swi rhandzisa xiswona ku khongela ni leswi a a va khomisa xiswona vavasati.
YOHANI

li vulavula hintamu hi mabulu lawa Yesu a nga ve na wona ni vanghanu va yena ni vanhu van’wana. Leswo swa hi pfuna ku tiva swaku a a li munhu wa ku tshamisa ku yini.