MATAUPU 16
Ne a Mea ne Fai ne Iesu i te Nofoga i te Lalolagi?
E mafau‵fau a tino e tokouke i a Iesu se pepe fua, se pelofeta poto, io me se tagata ko pili o mate. Kae e mata, e mafai o uke atu ‵tou mea e iloa māfai e iloilo ne tatou tena olaga i te lalolagi? I te mataupu tenei, ka mafau‵fau tatou ki nisi mea tāua kolā ne fai ne Iesu mo te aoga o mea konā ki a koe.
1. Se a te ‵toe galuega tāua ne fai ne Iesu?
A te ‵toe galuega tāua ne fai ne Iesu ko te “folafola atu te tala ‵lei o te Malo o te Atua.” (Faitau te Luka 4:43.) Ne talai atu ne ia te tala ‵lei me ka fakatu ne te Atua se malo, io me se pulega telā ka faka‵lei aka ei a fakalavelave katoa o tino. a Ne galue malosi a Iesu o folafola atu a te fekau gali tenei i loto i se tolu mo te āfa tausaga.—Mataio 9:35.
2. Kaia ne fai ei ne Iesu a vavega?
E fakamatala mai i te Tusi Tapu me e uke a “galuega ‵mana mo mea fakaofoofogia mo fakailoga kolā ne fai ne te Atua . . . e auala i a [Iesu].” (Galuega 2:22) E auala i te ‵mana o te Atua, ne mafai o pule atu a Iesu ki tau-o-aso, fagai te fia afe o tino, faka‵lei a ma‵saki, kae toe faka‵tu aka a tino ‵mate. (Mataio 8:23-27; 14:15-21; Maleko 6:56; Luka 7:11-17) E fakaasi manino mai i vavega a Iesu me ne uga mai a ia ne te Atua. E fakaasi mai foki ei me maua ne Ieova a te malosi ke faka‵lei aka ei a fakalavelave katoa.
3. Ne a mea tāua e mafai o tauloto ne tatou mai te auala ne ola ei a Iesu?
Ne fakalogo a Iesu ki a Ieova i mea katoa. (Faitau te Ioane 8:29.) Faitalia a ‵tekemaiga, ne fai eiloa mo te fakamaoni ne Iesu a mea ne fakamolemole atu tena Tamana ke fai ke oko eiloa ki tena mate. Ne fakamaoni mai ne ia me e mafai ne tino o tavini atu ki te Atua, faitalia a tulaga faiga‵ta e fe‵paki mo latou. Tela la, ne tuku mai ne Iesu “se fakaakoakoga mō [tatou] ke tau‵tali fakapili‵pili atu i ana kalafaga.”—1 Petelu 2:21.
KELI MALOSI IFO
Mafaufau ki te auala ne folafola atu ei ne Iesu a te tala ‵lei kae fai foki ne ia a vavega.
4. Ne folafola atu ne Iesu a te tala ‵lei
Ne sasale a Iesu i te fia selau o maila i auala ‵pefu, ke fakaoko atu a te tala ‵lei ki so se tino e mafai o maua. Faitau te Luka 8:1, ko sau‵tala ei ki fesili konei:
-
E mata, ne talai atu fua a Iesu ki tino kolā ne maopoopo mai o fakalogo‵logo ki a ia?
-
Ne a mea ne fai ne Iesu ke maua ne ia a tino?
Ne ‵valo mai ne te Atua me i te Mesia ka folafola atu ne ia te tala ‵lei. Faitau te Isaia 61:1, 2, ko sau‵tala ei ki fesili konei:
-
Ne fakataunu pefea ne Iesu a te valoaga tenei?
-
Se a tau faka‵tau e mata, e ‵tau o iloa ne tino a te tala ‵lei tenei?
5. Ne akoako atu ne Iesu a muna‵tonu tāua
I tafa o te talai atu o te tala ‵lei e uiga ki te Malo o te Atua, ne akoako atu ne Iesu a nisi mea tāua. Ke mafaufau ki nai fakaakoakoga mai tena Lāuga lauiloa i luga i te Mauga. Faitau te Mataio 6:14, 34 mo te 7:12, ko sau‵tala ei ki fesili konei:
-
Ne a manatu fesoasoani aoga ne fai mai ne Iesu i fuaiupu konei?
-
Se a tau faka‵tau, e mata, koi aoga ki a tatou a te manatu fesoasoani tenei?
6. Ne fai ne Iesu a vavega
Ne tuku atu ne Ieova ki a Iesu a te ‵mana ke fai ne ia a vavega e uke. Ke onoono ki se fakaakoakoga e tasi, faitau te Maleko 5:25-34 io me pei te VITIO. Ka oti ko sau‵tala ei ki fesili konei.
-
I te vitio, se a te mea ne talitonu ki ei te fafine masaki?
-
Se a te mea e gali ei ki a koe a te vavega tenei?
Faitau te Ioane 5:36, ko sau‵tala ei ki te fesili tenei:
-
Se a te mea ne “molimau” atu ki ei io me ne fakamaoni mai ne vavega a Iesu e uiga ki a ia?
E iloa ne koe?
A te ukega o mea e iloa ne tatou e uiga ki a Iesu e maua i tusi Evagelia e fa i te Tusi Tapu—Mataio, Maleko, Luka, mo Ioane. Ne aofia ne tino tusi Evagelia konei a fakamatalaga kese‵kese e uiga ki a Iesu. Kae kafai e tuku fakatasi ne tatou a fakamatalaga katoa konei, ko mafai ei o lavea atu ne tatou te ata gali kātoa o tena olaga.
-
MATAIO
ne tusi muamua ne ia tena tusi Evagelia. E faka‵mafa mai i ei a akoakoga a Iesu, kae maise e uiga ki te Malo o te Atua.
-
MALEKO
ne tusi ne ia te ‵toe tusi Evagelia toetoe. E fakamatala mai i ei a mea ‵gali e uke ne ‵tupu.
-
LUKA
ne fakasino fakapito atu ki ‵talo mo faifaiga a Iesu ki fāfine.
-
IOANE
e fakasino malosi atu ki uiga o Iesu mai te fakamatalamaiga o sau‵talaga e uke ne fai ne Iesu mo ana taugasoa ‵pili pelā foki mo nisi tino.
MEA E FAI MAI NE NISI TINO: “A Iesu se tagata ‵lei fua kae e se ko te Mesia.”
-
Se a tau faka‵tau ki ei?
MANATU AOGA
Ne talai atu a Iesu e uiga ki te Malo o te Atua, fai a vavega, kae fakalogo ki a Ieova i mea katoa.
Fesili
-
Se a te ‵toe galuega tāua ne fai ne Iesu i te lalolagi?
-
Se a te mea e fakamaoni mai ne vavega a Iesu?
-
Ne a manatu fesoasoani aoga ne akoako mai ne Iesu?
NISI FAKAMATALAGA
Se a te mataupu ne faka‵mafa malosi mai ne Iesu?
“Te Malo o te Atua—Te Tāua ki a Iesu” (Te Faleleoleo Maluga, Oketopa 1, 2014)
Mafaufau ki pogai e ‵tau ei o tali‵tonu tatou me ne ‵tupu tonu eiloa a vavega a Iesu.
“Ko Vavega a Iesu—Ne a Au Mea e Tauloto Mai i ei?” (Te Faleleoleo Maluga, Iulai 15, 2004)
Faitau ki te auala ne aoga ei ki se tagata e tokotasi a te alofa sē fakapito o Iesu.
“Ne Ola Au i se Olaga Fia Tu Tokotasi” (Te Faleleoleo Maluga, Oketopa 1, 2014)
Onoono ki mea tāua ne fai ne Iesu i tena galuega talai e ‵tusa mo te fakasologa tonu.
a Ka fakamatala mai i te Mataupu 31-33 a mea e uke atu e uiga ki te Malo o te Atua.
