HAAPIIRAA 16
Eaha ta Iesu i rave i te fenua nei?
E rave rahi taata o te manaˈo ra e aiû noa â Iesu, e peropheta aore ra e taata paruparu. Tera râ, e nehenehe tatou e haapii atu â no nia ia ˈna e to ˈna oraraa i te fenua nei. I roto i teie haapiiraa, e haapii mai tatou i te tahi mau mea faufaa ta Iesu i rave e e nafea te reira e tauturu ai ia oe.
1. Eaha te ohipa faufaa roa ˈˈe ta Iesu i rave?
Te ohipa faufaa roa ˈˈe ta Iesu i rave, o te faaiteraa i “te parau apî oaoa o te Faatereraa arii a te Atua.” (A taio i te Luka 4:43.) Ua poro oia i te parau apî oaoa no nia i te Faatereraa arii ta te Atua e haamau no te faatitiaifaro i te mau fifi atoa o te huitaata. a E toru matahiti e te afa to Iesu haa-noa-raa no te faaite i teie poroi faaitoito mau i te taata.—Mataio 9:35.
2. Eaha te fa o ta Iesu mau semeio?
Te faataa ra te Bibilia e rave rahi “ohipa mana, te ohipa faahiahia mau e te semeio” ta te Atua i rave na roto ia Iesu. (Ohipa 2:22) Maoti te puai a te Atua, i nehenehe ai Iesu e haavî i te reva, e faatamaa e tausani taata, e faaora i te maˈi e e faatia faahou mai i tei pohe. (Mataio 8:23-27; 14:15-21; Mareko 6:56; Luka 7:11-17) Te haapapu maitai ra te mau semeio a Iesu e na te Atua i tono ia ˈna. Oia atoa, e mana to Iehova no te faatitiaifaro i to tatou mau fifi atoa.
3. Eaha ta tatou e nehenehe e haapii no nia i to Iesu oraraa?
Ua auraro noa Iesu ia Iehova. (A taio i te Ioane 8:29.) Noa ˈtu te patoiraa, ua rave noa Iesu i ta to ˈna Metua i ani ia ˈna ia rave e tae roa ˈtu i to ˈna poheraa. Ua faaite oia e nehenehe te hoê taata e tavini i te Atua noa ˈtu te mau tupuraa fifi mau. Ua vaiiho mai ïa Iesu “i te hiˈoraa ia pee maite tatou i to ˈna mau taahiraa avae.”—Petero 1, 2:21.
A FAAHOHONU ATU Â
A hiˈo mea nafea Iesu i te faaiteraa i te parau apî oaoa i te taata e i te faatupuraa i te mau semeio.
4. Ua faaite Iesu i te parau apî oaoa
Ua haere avae Iesu i nia hanere kilometera no te faaite i te parau apî oaoa i te mau taata atoa. A taio i te Luka 8:1, e a aparau i teie mau uiraa:
-
Ua poro noa anei Iesu i te mau taata tei putuputu no te faaroo ia ˈna?
-
Eaha te mau tautooraa ta Iesu i rave no te poro i te taata?
Ua tohu te Atua e faaite te Mesia i te parau apî oaoa. A taio i te Isaia 61:1, 2, e a aparau i teie mau uiraa:
-
Mea nafea Iesu i te faatupuraa i teie parau tohu?
-
I to oe manaˈo, mea faufaa anei ia faaroo te mau taata i teie parau apî oaoa i teie mahana?
5. Ua haapii Iesu i te mau parau mau faufaa roa
Hau atu â i te pororaa i te parau apî oaoa no nia i te Faatereraa arii a te Atua, ua horoa atoa Iesu i te mau haapiiraa faufaa roa. A hiˈo na i te mau hiˈoraa no roto mai i ta ˈna aˈoraa tuiroo i nia i te Mouˈa. A taio i te Mataio 6:14, 34 e te 7:12, e a aparau i teie mau uiraa:
-
Eaha te aˈoraa faufaa ta Iesu i horoa i roto i teie mau irava?
-
I to oe manaˈo, e tauturu anei teie aˈoraa i te mau taata i teie mahana?
6. Ua faatupu Iesu i te mau semeio
Ua horoa Iehova i te puai ia Iesu no te faatupu e rave rahi semeio. No te ite i te hoê hiˈoraa, a taio i te Mareko 5:25-34 aore ra a pata i te VIDEO. E a aparau i te mau uiraa i muri nei.
-
I roto i te video, eaha ta te vahine e maˈi to ˈna i tiaturi na?
-
Eaha ta oe i au roa no nia i teie semeio?
A taio i te Ioane 5:36, e a aparau i teie uiraa:
-
Eaha ta te mau semeio a Iesu e “haapapu mai ra” no nia ia ˈna?
Ua ite anei oe?
Te rahiraa o te mau mea ta tatou i ite no nia ia Iesu, no roto mai ïa i na maha buka Bibilia piihia te mau Evanelia: Mataio, Mareko, Luka e Ioane. Ua faahiti na taata papai tataitahi e rave rau mea no nia ia Iesu. Ia taio tatou i na maha buka atoa, e faahiahia tatou no nia i to ˈna oraraa.
-
MATAIO
ua papai oia i te Evanelia matamua, te faaitehia ra te mau haapiiraa a Iesu, no nia iho â râ i te Faatereraa arii a te Atua.
-
MAREKO
ua papai oia i te Evanelia poto roa, e itehia e rave rahi tupuraa faahiahia.
-
LUKA
te faaite mai ra oia i te faufaaraa o te pure no Iesu e te faataahia ra te huru o Iesu i nia i te mau vahine.
-
IOANE
te faaite mai ra oia e rave rahi mea ta Iesu i parau no nia i to ˈna mau hoa piri e te tahi atu mau taata. E tauturu mai te reira ia tatou ia haapii no nia i to Iesu huru.
TE MANAˈO O VETAHI: “E taata maitai o Iesu, aita ˈtu.”
-
Eaha to oe manaˈo?
HAAPOTORAA
Ua poro Iesu no nia i te Faatereraa arii a te Atua, ua faatupu i te mau semeio e ua auraro noa oia ia Iehova.
Haamanaˈoraa
-
Eaha te ohipa faufaa roa ta Iesu i rave i te fenua nei?
-
Eaha ta te mau semeio a Iesu e haapapu ra?
-
Eaha te mau haapiiraa faufaa ta Iesu i haapii?
HIˈOPOA
Eaha te tumu parau ta Iesu i faahiti pinepine?
“Te Basileia o te Atua, no te aha mea faufaa mau no Iesu?” (Te Pare Tiairaa Novema 2014)
A hiˈo no te aha tatou e nehenehe ai e tiaturi e ua tupu iho â te mau semeio a Iesu.
“Eaha ta te semeio a Iesu e haapii mai?” (Tumu parau o Te Pare Tiairaa)
A taio mea nafea te hoê taata i te tauiraa i to ˈna oraraa a haapii ai oia mea nafea Iesu i te aupururaa i te taata.
A hiˈo i te tapura o te mau ohipa faufaa roa ta Iesu i rave mai te haamataraa e tae atu i te hopearaa o ta ˈna taviniraa.
“Tupuraa faufaa o te oraraa o Iesu i te fenua nei” (Te Bibilia, Huriraa o te ao apî, tuhaa hau A7)
a E aparau hau atu â tatou no nia i te Faatereraa arii a te Atua i roto i te haapiiraa 31-33.
E au atoa outou . . .
UIRAA A TE TAATA
Eaha te ravehia i te hoê haapiiraa Bibilia pûpûhia na te mau Ite no Iehova?
Maoti teie aparauraa Bibilia tamoni ore pûpûhia na te mau Ite no Iehova, nehenehe outou e faaohipa i ta outou iho Bibilia. A titau atoa mai i to outou utuafare aore ra hoa.
