LECCIÓN 16
¿Bin la spas te kʼalal xtaluk ta Balumilal te Jesuse?
Ay machʼatik ya xtal ta yoʼtanik te Jesús te jichlaj bitʼil jtul alal, jtul pʼijil j-alwanej o ya xtal ta yoʼtanik te bitʼil la yichʼ milele. Pero teme ya jnoptik ta lek te bin la spas te kʼalal kʼax ta Balumilale, yame jnaʼbeytikxan sba ta lek. Ta lección into kiltik bintik mukʼ skʼoplal la spas te Jesús sok te bin lekilal ya ata yuʼune.
1. ¿Bin aʼtelil te kʼax mukʼ skʼoplal tal spas te Jesuse?
Te aʼtelil te kʼax mukʼ skʼoplal tal spas te Jesús jaʼ te la spuk ta alel te lek yachʼil kʼop yuʼun te Wentainel yuʼun Dios (kʼopona Lucas 4:43). Te lek yachʼil kʼop te la scholbey skʼoplale jaʼ te ya schiknajtes jun wentainel o jun gobierno te Dios, te ya schajpan spisil te wokoliletike. a Oxeb jaʼbil sok olil la scholbey skʼoplal te Wentainel-abi (Mateo 9:35).
2. ¿Bin la yakʼ ta ilel te milagroetik la spas te Jesuse?
Te Biblia ya yal te bayal ta «jchahp aʼteliletic soc señahiletic» la spas te Dios ta swenta te Jesús (Hechos 2:22). Te Jesús la skom tulan yikʼal jaʼal, la smakʼlin bayal ants winiketik, la slekubtes jchameletik sok ay machʼatik la schaʼkuxajtes, pero jaʼ ta swenta yuʼel te Diose (Mateo 8:23-27; 14:15-21; Marcos 6:56; Lucas 7:11-17). Te milagroetik la spas te Jesús la yakʼ ta ilel te jaʼ tikunbil tal yuʼun te Diose. Jaʼnix jich la yakʼ ta ilel te ay yuʼel te Jehová yuʼun ya slajin spisil te wokoliletike.
3. ¿Bin ya yakʼ jnoptik te bin la spas te Jesuse?
Spisil-ora la schʼuunbey smantal Jehová te Jesuse (kʼopona Juan 8:29). La skʼotes ta pasel te bin albot yuʼun te sTat manchukme ay machʼatik kontrainot yuʼun sok jun yoʼtan la yakʼ sba manchukme la yichʼ milel. La yakʼ ta ilel te ya xjuʼ ya x-abatinotik ta stojol te Dios manchukme ay jwokoltik. Jich la yakʼ ta ilel lekil ejemplo te Jesús ta stojol te jnopojeletik yuʼun swenta ya stʼunik te bin la spase (1 Pedro 2:21).
JNOPTIKXAN TA LEK
Kiltik bin-utʼil la spuk ta alel te lek yachʼil kʼop sok la spas milagroetik te Jesuse.
4. Te Jesús la spuk ta alel te lek yachʼil kʼop
Te Jesús la sbeentay bayal lumetik swenta ya scholbey yaʼiy bayal ants winiketik te lek yachʼil kʼope. Kʼoponaik Lucas 8:1 sok albeyaik skʼoplal ini:
-
¿Jaʼnaxbal la scholbey skʼop Dios te machʼatik ya xtalik ta stojole?
-
¿Bin la spas te Jesús swenta ya scholbey skʼop Dios te ants winiketike?
Te Dios la yakʼ ta naʼel te ya spuk ta alel lek yachʼil kʼop te Mesiase. Kʼoponaik Isaías 61:1, 2 sok albeyaik skʼoplal ini:
-
¿Bin-utʼil la skʼotes ta pasel te Jesús te bin ya yal te albilkʼope?
-
¿Yabal xtuun yuʼunik-euk te lek yachʼil kʼop te ants winiketik ta ora ini?
5. Te Jesús bayal bintik mukʼ skʼoplal la yakʼ ta nopel
Ma jaʼuknax la spuk ta alel te Wentainel yuʼun Dios, jaʼnix jich bayal bintik mukʼ skʼoplal la yakʼ ta nopel te ya xtuun kuʼuntike. Kiltik cheʼoxeb ejemplo. Kʼoponaik Mateo 6:14, 34 sok 7:12, sok albeyaik skʼoplal ini:
-
¿Bintik tojobtesel la yakʼ te Jesuse?
-
¿Yabal xtuun yuʼunik te ants winiketik ta kʼajkʼal ini te tojobtesel la yakʼ te Jesuse?
6. La spas milagroetik te Jesuse
Te Jehová la yakʼbey yuʼel te Jesús yuʼun ya spas bayal milagroetik. Kiltik jun ejemplo, kʼoponaik Marcos 5:25-34 o ilawilik te VIDEO. Ta patil albeyaik skʼoplal ini:
-
¿Bin schʼuunoj yoʼtan-a te antse?
-
¿Bin la spas te Jesús te kʼaxto la amulane?
Kʼoponaik Juan 5:36 sok albeyaik skʼoplal ini:
-
¿Bin ya yakʼ ta naʼel te milagroetik la spas te Jesuse?
¿Anaʼojbal-a?
Jteb ma spisil te bin ya jnaʼtikix ta swenta te Jesús ya jtatik ta Evangelioetik te jaʼ te Mateo, Marcos, Lucas sok Juan. Te machʼatik la stsʼibayik te Evangelioetike bayal bintik ya yakʼ jnaʼtik ta swenta te Jesús. Teme ya jkʼopontik schanebal te libroetik-abi, bayalxan bin ya jnoptik ta swenta te Jesús.
-
MATEO
jaʼ te machʼa la stsʼibay te sbabial libro yuʼun te Evangelio. Tey ta libroe jaʼ la yalbeyxan skʼoplal te bin la yakʼ ta nopel te Jesús, jich bitʼil te Wentainel yuʼun te Diose.
-
MARCOS
te libro la stsʼibaye maba najtuk stukel. Bayal bintik la yalbey skʼoplal te chajpʼnax ta aʼiyele.
-
LUCAS
ya yakʼ jnaʼtik te mukʼ skʼoplal la yil te Jesús te oración sok te bitʼil leknax yoʼtan ta stojol te antsetike.
-
JUAN
ya yakʼ jnaʼtik bin yilel stalel te Jesús, melel la scholbey skʼoplal bin-utʼil la skʼopon te yamigotak sok te ants winiketike.
AY MACHʼATIK JICH YA YALIK: «Jaʼ Dios te Jesuse».
-
¿Bin ya awal te jaʼate?
¿BINTIK LA JNOPTIK?
Te Jesús la spukbey skʼoplal te Wentainel yuʼun Dios, la spas milagroetik sok spisil-ora la schʼuunbey smantal te Jehová.
¿Jilbal ta awoʼtan into?
-
¿Bin aʼtelil te kʼax mukʼ skʼoplal la spas ta Balumilal te Jesuse?
-
¿Bin la yakʼ ta naʼel te milagroetik la spas te Jesuse?
-
¿Bintik la yakʼ ta nopel te Jesús te ya xtuun kuʼuntike?
YA XJUʼ YA ANOPXAN INI
¿Bin-a te mukʼ skʼoplal la spuk ta alel te Jesuse?
Ilawil bin yuʼun jchʼuunejtik te yuʼun-nix kʼot ta pasel-a te milagroetik la spas te Jesuse.
Ilawil bin-utʼil jelon skuxlejal jtul winik te kʼalal la snop bin yilel stalel te Jesuse.
«Mero mukʼ jkʼoplal ya kaʼiy jba-a» (Te J-ilkʼinal ta toyol, 1 yuʼun octubre 2014)
Ilawil te bintik xkechkon kʼot ta pasel ta skuxlejal te Jesuse.
a Ta lección 31 kʼalal ta 33 ya scholbey skʼoplal bin-a te Wentainel yuʼun Dios.
Yaniwan amulan-euk sk'oponel ini
TE BINTIK YA SJOJKʼOYLANIK
¿Bin-utʼil ya yakʼik te nojptesel yuʼun Biblia te testigoetik yuʼun Jehová?
Ya xjuʼ ya atuuntes biluk Bibliail te kʼalal ya awichʼ te nojptesel te ya yakʼik te testigoetik yuʼun Jehová. Jaʼnix jich ya xjuʼ ya apas invitar te afamilia sok te awamigotak.
