OCIPAMA 16
Nye Yesu a Linga Eci a Kala Palo Posi?
Omanu valua eci va sokolola Yesu, va sima okuti, oñaña, uprofeto umue ukualondunge, ale ulume umue o panda kolofa. Pole, tu pondola hẽ oku lilongisa ovina vikuavo viatiamẽla komuenyo waye eci a kala palo posi? Vocipama cilo, tu konomuisa ovina vimue via velapo calua Yesu a linga kuenda ndomo vi ku kuatisa.
1. Upi wa kala upange wa velapo wa Yesu?
Upange wa velapo wa Yesu wa kala woku ‘kunda olondaka viwa Viusoma wa Suku.’ (Tanga Luka 4:43.) Eye wa kunda olondaka viwa viokuti, Suku wa laikele oku tumbika usoma ale uviali, una u ka tetulula ovitangi viosi viomanu. a Vokuenda kuanyamo atatu lolosãi epandu, Yesu wa talavaya calua poku kundila omanu catiamẽla kesapulo lielavoko. —Mateo 9:35.
2. Cipi ca kala ocimãho covikomo via Yesu?
Embimbiliya li tukula “ovilinga vi komõhisa, lovikomo kuenda olondimbukiso Suku a linga . . . pocakati [ca Yesu].” (Ovilinga 2:22) Lunene Suku a eca kokuaye, Yesu wa tẽla oku tutuiya olongusu violuali, oku tekula omanu valua, oku sakula olombeyi loku pindulavo vana va fa. (Mateo 8:23-27; 14:15-21; Marko 6:56; Luka 7:11-17) Ovikomo Yesu a linga via eca uvangi wokuti, eye wa tumiwile la Suku. Ovikomo viaco, via lekisavo okuti, Yehova o kuete unene woku tetulula ovitangi viosi viomanu.
3. Nye tu lilongisila komuenyo wa Yesu?
Yesu olonjanja viosi wa pokola ku Yehova. (Tanga Yoano 8:29.) Yesu ndaño lelambalalo, wa lekisa ekolelo ku Isiaye toke kolofa. Eye wa lekisa okuti, omanu va pondola oku vumba Suku ndaño lovitangi. Lonjila eyi, Yesu wa tu sila “ongangu oco [tu] kuami volomãhi viaye.” —1 Petulu 2:21.
LILONGISA ONDONGOSI
Kũlĩha ndomo Yesu a kunda olondaka viwa kuenda oku linga ovikomo.
4. Yesu wa enda oku kunda olondaka viwa
Yesu wa enda oku linga ovongende alua okuti, endela posi locimãho coku kundila omanu valua a sanga. Tanga Luka 8:1, noke konomuisa apulilo a kuãimo:
-
Anga hẽ Yesu wa kundila lika omanu vana va endaenda kokuaye?
-
Alikolisilo api Yesu a linga oco a sange omanu?
Suku wa popele okuti, Mesiya wa laikele oku kunda olondaka viwa. Tanga Isaya 61:1, 2, noke konomuisa apulilo a kuãimo:
-
Yesu wa tẽlisa ndati ocitumasuku eci?
-
Ove, o sima hẽ okuti omanu etaili va sukila oku yeva olondaka viwa?
5. Yesu wa longisa ocili ci kuete esilivilo lialua
Handi vali, Yesu ka kundile lika olondaka viwa Viusoma wa Suku, eye wa ecavo olonumbi vi kuatisa. Tala vimue pokati kolonumbi viaco eye a eca Vohundo a lingila Komunda. Tanga Mateo 6:14, 34 kuenda 7:12, noke konomuisa apulilo a kuãimo:
-
Olonumbi vipi viwa Yesu a eca vovinimbu evi?
-
O sima hẽ okuti olonumbi evi, vi kuatisa omanu koloneke vilo?
6. Yesu wa linga ovikomo
Yehova wa eca ku Yesu unene woku linga ovikomo vialua. Oco o kũlĩhe ulandu umue, tanga Marko 5:25-34, ale tala OVIDEO. Noke konomuisa apulilo a kuãimo.
-
Vovideo tua mola, ukãi una wa kala oku vela, wa kuatele ekolelo lipi?
-
Ocina cipi wa sola vali vocikomo eci?
Tanga Yoano 5:36, noke konomuisa epulilo li kuãimo:
-
Ovikomo Yesu a linga via eca “uvangi” upi, ale via situlula nye catiamẽla kokuaye?
Wa ci kũlĩha?
Ovina vialua tua kũlĩha viatiamẽla ku Yesu, vi sangiwa valivulu Embimbiliya a tukuiwa okuti, Avanjeliu ndeci, Mateo, Marko, Luka kuenda Yoano. Vevanjeliu levanjeliu, mua sonehiwa ovina vimue via litepa viatiamẽla ku Yesu. Nda tu kongela pamosi ovina viaco, tu tẽla oku limbuka ndomo omuenyo wa Yesu wa kala palo posi.
-
MATEO
Olio evanjeliu lia sonehiwa tete. Tu sangamo alongiso alua a Yesu ca piãla enene alongiso atiamẽla Kusoma wa Suku.
-
MARKO
Olio litito pokati Kavanjeliu. Elivulu limue li lekisa ovina via pita kuenda ovolandu a komõhisa.
-
LUKA
Li lombolola ndomo oku likutilila kua kuatele esilivilo ku Yesu kuenda ndomo Yesu a enda oku tata akãi.
-
YOANO
Li situlula ovituwa via Yesu poku tukula olombangulo vialua Yesu a kuata lakamba vaye kuenda omanu vakuavo.
OMANU VAMUE VA POPIA VATI: “Yesu wa kala omunu umue uwa, pole, ka kaile Mesiya.”
-
Nye o sima?
NYE WA LILONGISA?
Yesu wa kunda eci catiamẽla Kusoma wa Suku, wa linga ovikomo kuenda wa pokola ku Yehova kovina viosi.
Oku Pitulula
-
Upi wa kala upange wa velapo wa Yesu palo posi?
-
Ovikomo Yesu a linga via lekisa nye?
-
Olonumbi vipi viwa Yesu a eca?
OCO O KŨLĨHE OVINA VIKUAVO
Ocina cipi Yesu a solele vali oku vangula?
“Ceci Usoma wa Suku—u Lomboloka ku Yesu” (Utala Wondavululi 1 wa Mbalavipembe 2014)
Kũlĩhĩsa esunga lieci tu tavela okuti, ovikomo via Yesu via lingiwa muẽle ocili.
“Ovikomo Via Yesu—Nye o Lilongisa Kokuavio?” (Utala Wondavululi 15 Yevambi Linene 2004)
Tanga eci catiamẽla kulume umue wa linga apongoloko komuenyo waye noke yoku lilongisa ndomo Yesu a enda oku tata omanu.
“Nda Pitisile Lika Kovaso Olonjongole Viange” (Utala Wondavululi 1 wa Mbalavipembe 2014)
Tala ovina via velapo Yesu a linga ndomo via sokiyiwa kulala wolotembo ndomo via pita.
a Ocipama 31-33, vi ka vangula vali catiamẽla Kusoma wa Suku.
Ove o ka ci Sola
APULILO A SIATA
Elilongiso Liembimbiliya li Lingiwa Lolombangi Via Yehova li Lomboloka Nye?
Lekuatiso lielilongiso li lingiwa ocali Lolombangi Via Yehova, o pondola oku kuama Lembimbiliya liosi o yongola. Lianja poku laleka epata liove liosi ale akamba vove, oco vu lilongisili kumosi.
