NGUDO 16
Yesu O Ita Mini Musi E Kha Ḽifhasi?
Musi vhathu vhanzhi vha tshi humbula nga ha Yesu, vha humbula nga ha ṅwana, muporofita o ṱalifhaho kana muthu ane a khou fa. Fhedzi naa u ḓivha nga ha zwe a zwi ita musi e kha ḽifhasi zwi nga ita uri ri gude zwo engedzeaho nga hae? Kha ino ngudo, ri ḓo guda nga ha zwithu zwa ndeme zwe Yesu a zwi ita na nḓila ine zwa nga ni thusa ngayo.
1. Yesu o ita mushumo ufhio wa ndeme?
Mushumo wa ndeme we Yesu a u ita ndi wa u “ḓivhadza mafhungo maḓifha a Muvhuso wa Mudzimu.” (Vhalani Luka 4:43.) O ḓivhadza mafhungo maḓifha a uri Mudzimu u ḓo ita uri hu vhe na muvhuso une wa ḓo tandulula thaidzo dzoṱhe dza vhathu. a Yesu o fhedza miṅwaha miraru na hafu a tshi khou ita zwoṱhe zwine a nga kona uri a vhudze vhathu wonoyu mulaedza u ṱuṱuwedzaho.—Mateo 9:35.
2. Ndi ngani Yesu o ita maḓembe?
Bivhili i amba uri Mudzimu u ita mishumo minzhi “ya maanḓa, zwithu zwi mangadzaho na vhuṱolo” kana maḓembe a tshi shumisa Yesu. (Mishumo 2:22) Mudzimu o ṋea Yesu maanḓa uri a kone u langa mutsho, u ṋea vhathu vhanzhi zwiḽiwa, u fhodza vha lwalaho na u vusa vhafu. (Mateo 8:23-27; 14:15-21; Marko 6:56; Luka 7:11-17) Maḓembe e Yesu a a ita a sumbedza khagala uri Yesu o vha o rumiwa nga Mudzimu. A dovha a sumbedza uri Yehova u na maanḓa a u tandulula thaidzo dzashu dzoṱhe.
3. Ri nga guda mini kha nḓila ye Yesu a tshila ngayo?
Yesu o dzula a tshi thetshelesa Yehova kha zwiimo zwoṱhe. (Vhalani Yohane 8:29.) Yesu o ita zwoṱhe zwe a humbelwa uri a zwi ite nga Khotsi awe. O zwi ita vhutshilo hawe hoṱhe musi e kha ḽifhasi naho vhaṅwe vho lingedza u mu thivhela. O sumbedza uri vhathu vha nga kona u shumela Mudzimu na musi vha kha zwiimo zwi konḓaho. Ndi ngazwo Yesu o ri vhetshela “tsumbo ine [ra] tea u i tevhela nga vhuronwane.”—1 Petro 2:21.
GUDANI ZWO ENGEDZEAHO
Gudani nga ha uri Yesu o vhudza hani vhathu mafhungo maḓifha na u ita maḓembe.
4. Yesu o vhudza vhathu mafhungo maḓifha
Yesu o tshimbila lwendo lulapfu nḓilani dzi re na mabuse a tshi khou ḓivhadza mafhungo maḓifha kha vhathu vhanzhi nga hune a nga kona ngaho. Vhalani Luka 8:1, ni kone u fhindula mbudziso dzi tevhelaho:
-
Naa Yesu o funza fhedzi vhathu vhe vha kuvhangana u itela u mu thetshelesa?
-
Yesu o ita mini uri a kone u wana vhathu?
Mudzimu o dzula o amba uri Messia u ḓo ḓivhadza mafhungo maḓifha. Vhalani Yesaya 61:1, 2, ni kone u fhindula mbudziso dzi tevhelaho:
-
Yesu o ita hani zwe zwa ambiwa kha dzenedzi vese?
-
Naa ni vhona u nga ṋamusi vhathu vha a ṱoḓa u pfa enea mafhungo maḓifha?
5. Yesu o funza ngudo dza ndeme
Yesu o funza mafhungo maḓifha. O dovha a funza ngudo dzi thusaho vhathu. Ṱhogomelani tsumbo dzi si gathi kha zwe a zwi Funza e Thavhani. Vhalani Mateo 6:14, 34 na 7:12, ni kone u fhindula mbudziso dzi tevhelaho:
-
Kha dzenedzi vese, Yesu o ṋea nyeletshedzo dzifhio dzi shumaho?
-
Naa ni vhona u nga yeneyi nyeletshedzo i nga thusa vhathu ṋamusi?
6. Yesu o ita maḓembe
Yehova o ṋea Yesu maanḓa uri a kone u ita maḓembe manzhi. U itela u vhona iṅwe tsumbo, vhalani Marko 5:25-34 kana ni ṱalele VIDIO. Ni kone u fhindula mbudziso dzi tevhelaho.
-
Kha vidio, mufumakadzi we a vha a tshi khou lwala o vha a tshi tenda mini?
-
Ndi mini zwe na zwi takalela kha enea mafhungo?
Vhalani Yohane 5:36, ni kone u fhindula mbudziso i tevhelaho:
-
Maḓembe e Yesu a a ita a sumbedza “vhuṱanzi” vhufhio nga hae?
Naa no vha ni tshi zwi ḓivha?
Vhunzhi ha mafhungo ane ra a ḓivha nga ha Yesu a wanala Bivhilini kha Mateo, Marko, Luka na Yohane. Vhaṅwali vha dzenedzo Bugu vho amba zwidodombedzwa zwi sa fani nga ha Yesu. Muṅwali muṅwe na muṅwe o ṅwala zwithu zwi sa fani na zwe muṅwe a zwi ṅwala nga ha Yesu. Musi ri tshi vhala dzenedzo bugu dzoṱhe, ri wana mafhungo a mangadzaho nga ha vhutshilo ha Yesu.
-
MATEO
bugu ya Mateo ndi yone ye ya thoma u ṅwaliwa. I amba nga ha zwithu zwinzhi zwe Yesu a zwi funza, nga mannḓa-mannḓa zwe a zwi funza nga ha Muvhuso wa Mudzimu.
-
MARKO
bugu ya Marko ndi yone ṱhukhusa kha dzoṱhe. I amba nga ha zwiitea zwinzhi zwi takadzaho.
-
LUKA
i amba nga ha nḓila ye u rabela zwa vha zwi zwa ndeme ngayo kha Yesu na nḓila yavhuḓi ye a fara ngayo vhafumakadzi.
-
YOHANE
i amba nga ha zwithu zwinzhi zwe Yesu a zwi vhudza khonani dzawe na vhaṅwe vhathu. Zwenezwi zwi ri thusa uri ri kone u ḓivha uri Yesu o vha e muthu wa hani.
VHAṄWE VHATHU VHA AMBA URI: “Yesu o vha e muthu wavhuḓi, fhedzi ho vha hu si ene Messia.”
-
Inwi ni ri mini?
NO GUDA MINI?
Yesu o ḓivhadza nga ha Muvhuso wa Mudzimu, a ita maḓembe, a thetshelesa Yehova na kha zwiimo zwi konḓaho.
Ni Kha Ḓi Zwi Humbula?
-
Ndi ufhio mushumo wa ndeme we Yesu a u ita musi e kha ḽifhasi?
-
Maḓembe e Yesu a a ita a ṋea vhuṱanzi vhufhio nga hae?
-
Ndi zwifhio zwithu zwi thusaho zwe Yesu a funza nga hazwo?
WANANI ZWO ENGEDZEAHO
Yesu o ambesa nga ha mini musi a tshi funza?
“Muvhuso Wa Mudzimu Ndi Wa Ndeme Lungafhani Kha Yesu?” (Tshiingamo, 1 October 2014)
Vhonani uri ndi ngani ri tshi nga fhulufhela uri Yesu o ita maḓembe zwa vhukuma.
“Ni Nga Guda Mini kha Vhuṱolo Ha Yesu?” (Tshiingamo, 15 July 2004)
Vhalani nga ha nḓila ye muṅwe munna a shandula ngayo vhutshilo hawe musi o no guda nga ha nḓila ye Yesu a vha a tshi ṱhogomela ngayo vhathu.
“Ndo vha ndi tshi tshilela nṋe muṋe fhedzi” (Tshiingamo, 1 November 2014)
Vhonani mutevhe wa zwithu zwa ndeme zwe Yesu a zwi ita nga u tevhekana hazwo.
a Ri ḓo guda zwo engedzeaho nga ha Muvhuso wa Mudzimu kha ngudo 31-33.
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
