YOOSOMA 16
Yesu Aapanke Exeeni Okathi Aari Awe Valaponi?
Okathi atthu akina animuupuwela aya Yesu, awo animuupuwela mwaana, profeta a ankhili wala mulopwana aahaala okhwa. Masi ninniixutta itthu sinceene vaavo ninthokorerya ahu okumi wa Yesu okathi aari awe valaponi. Yoosoma ela, ninrowa oweha itthu vakhaani sa faita Yesu aapanke awe ni moota itthu iyo sikhanle aya oonikhaliherya.
1. Muteko xeeni muulupale Yesu aavara awe?
Muteko muulupale Yesu aavara awe waari “olaleya ihapari sooreera sa Omwene wa Muluku”. (Mmusome Luka 4:43.) Ihapari sooreera Yesu aalaleya awe, owo aalavula sa Omwene, eyo piiyo, ekuvernu ya Muluku yeeyo enrowa omaliha mixankiho sotheene sa apinaatamu. a (Nwehe enoota) Mwa iyaakha tthaaru nnimeya, Yesu aaniluttuweliwa waahimeerya atthu ihapari sooreera.—Matheyo 9:35.
2. Etthu xeeni yaamwiiriha Yesu opaka miiriirya?
Biibiliya onnihimya “miteko sootikiniha . . . [Muluku aapanke awe] omurumeelaka” Yesu. (Miteko 2:22) Orumeelaka ikuru aavahiwe awe ni Muluku, Yesu aahiwerya omaaliha epheyo yuulupale, waavaha yoolya atthu anceene, waapenuxa atthu anceene ni waahihimuxa alipa-ookhwa. (Matheyo 8:23-27; 14:15-21; Marko 6:56; Luka 7:11-17) Itthu sootikiniha Yesu aapaka awe saanooniherya oratteene wira aarummwale ni Muluku. Nave miiriirya iyo sinnooniherya wira Yehova ookhalana owerya woomaliha mixankiho sahu sotheene.
3. Okumi wa Yesu onniixuttiha exeeni?
Okathi wotheene, Yesu aanimwiiwelela Yehova. (Mmusome Yohani 8:29.) Owo aahipaka eyo okumi awe wotheene hata okathi yoole aalupatthiwa awe wala aakumana awe mixankiho. Nto Yesu aahooniherya oratteene wira vanniweryaneya apinaatamu ohihiya omukokhorela Muluku hata arina ene mixankiho. Tthiri ‘oonihiyerya ntakiheryo wira nitthareke vakhiviru vene mavalo awe’.—1 Pedru 2:21.
MWIIXUTTE ITTHU SIKINA
Nwehe moota Yesu aalaleyale awe ihapari sooreera ni opaka itthu sootikiniha.
4. Yesu aanilaleya ihapari sooreera
Yesu aaheetta ikiloomo sinceene iphiro ni istaraata sowaatta ntthupi wira aalaleerye atthu anceene ihapari sooreera. Mmusome Luka 8:1, nuumala-vo mwaakhule makoho anittharelana:
-
Niireke Yesu aalaleerya paahi atthu yaathukumana wira anwiriyane?
-
Yesu aimananinhe sai wira aaphwanye atthu?
Muluku aahihimya vahinatthi wira Mesiya aarowa olaleya ihapari sooreera. Mmusome Yesaya 61:1, 2, nuumala-vo mwaakhule makoho anittharelana:
-
Yesu omalihenrye sai eprofesia ela?
-
Munoona wira atthu olelo-va ahaana wiiwa ihapari sooreera?
5. Yesu aahiixuttiha itthu sa efaita yinceene
Ohiya paahi olaleya ihapari sooreera sa Omwene wa Muluku, Yesu aahivaha miruku sooloka. Nwehe matakiheryo vakhaani a itthu Yesu aahimmye awe vaavo aalavula awe Mwaha awe Vamwaako. Mmusome Matheyo 6:14, 34 ni 7:12, nuumala-vo mwaakhule makoho anittharelana:
-
Miruku xeeni sooloka Yesu aavanhe awe sinilavuliwa iversiikulu iya?
-
Nyuwo munoona wira miruku iya sinimwaakhaliherya atthu olelo-va?
6. Yesu aahipaka itthu sootikiniha
Yehova aahinvaha ikuru Yesu wira opake miiriirya sinceene. Nwehe ntakiheryo nimosa, mmusome Marko 5:25-34 wala nwehe EVIIDIYU. Nuumala-vo, mwaakhule makoho.
-
Etthu xeeni aakupali awe muthiyana aawereiwa ninwehe ahu nviidiyuni?
-
Mwiiriirya ole Yesu aapanke awe, etthu xeeni yoosivenleni?
Mmusome Yohani 5:36, nuumala-vo mwaakhule nikoho ninttharelana:
-
Itthu sootikiniha Yesu aapaka awe, sinooniherya exeeni?
Nyuwo mwaanisuwela?
Itthu sinceene ninsuwela ahu voohimya sa Yesu silempwale eliivuru ya Matheyo, Marko, Luka ni Yohani. Iliivuru iyo sinnisuweliwa okhala Ivangelyo. Nave khula mulipa-oolepa oromola itthu sikina sa okumi wa Yesu mukina ohilempe awe. Nto vaavo ninhela ahu nipuro nimosa itthu iyo sotheene, ninniwerya oweha okumi wa Yesu okathi aari awe valaponi.
-
MATHEYO
Yaari Evangelyo yoopacerya olempwa. Evangelyo eyo ninniphwanya itthu sinceene Yesu iixuttinhe awe otepexa wene itthu sa Omwene wa Muluku.
-
MARKO
Ela Evangelyo yootepexa oyeva ya Ivangelyo sotheene. Nave ennihimya itthu soohakalaliha Yesu aapanke awe.
-
LUKA
Evangelyo ela ennooniherya wira Yesu aanivaha efaita ovekela ni ennooniherya moota Yesu aathokorerya awe athiyana.
-
YOHANI
Evangelyo ela ennooniherya ikwaha sinceene Yesu aavaanela awe ni apatthani awe ni atthu akina. Eyo enninikhaliherya osuwela mikhalelo sa Yesu.
ATTHU AKINA ANIHIMYA WIRA: “Yesu aari mutthu ooreera murima paahi”.
-
Nyuwo munoonela sai?
IPONTO SUULUPALE
Yesu aahilaleya ihapari sooreera sa Omwene wa Muluku, aahipaka itthu sootikiniha ni okathi wotheene aanimwiiwelela Yehova.
Wuuluula
-
Tuuvi waari mutekomuulupale wa Yesu okathi aari awe valaponi?
-
Itthu sootikiniha Yesu aapanke awe sinooniherya exeeni?
-
Miruku xeeni sooloka Yesu aavanhe awe?
NWEHE ITTHU SIKINA
Mwaha xeeni Yesu aamakela awe olavula?
“Omwene wa Muluku Onrowa Opaka Exeeni Mmureerelo Anyu” (Owehaweha, 1 a Outubro, 2014)
Nwehe itthu sinnikupaliha wira miiriirya Yesu aapanke awe ti sekeekhai.
“Miiriirya Yesu Aapanke Awe Sinniixuttiha Exeeni?” (Owehaweha, 15 a Julyo, 2004)
Musome moota mulopwana mmosa aapanke awe marukunuxo mookumini mwawe nuumala wiixutta moota Yesu aathokorerya awe atthu.
“Miyo Kaaphavela Mureerelo Aka Paahi” (Owehaweha, 1 a Outubro, 2014)
Nwehe itthu suulupale Yesu aapanke awe moovarihana ni okathi siiraneyale aya.
“Sowiiraneya Suulupale sa Okumi wa Yesu Valaponi” (Malakiheryo Anikhaliherya Osoma Nuulumo na Muluku, Eponto 4)
a Yoosoma 31 mpakha 33 ninrowa olavula Omwene wa Muluku.
