TIMIRTTE 16
Yesuusi Saˈan Deˈiyo Wode Ay Oottidee?
Daro asay Yesuusa gacino naˈa, Xoossay erissidobaa yootiya eranchcha asa woy hayqqana haniya asa giidi qoppees. SHin I saˈan deˈido deˈuwaabaa pilggiyoogan abaa loytti erana danddayiyoo? Nuuni Yesuusi oottido keehi koshshiya amaridabatanne hegeeti nena waati maaddana danddayiyaakko ha timirttiyan beˈana.
1. Yesuusawu waanna oosoy aybee?
“Xoossaa kawotettaa wonggeliyaa mishiraachchuwaa” yootiyoogee Yesuusawu waanna ooso. (Luqaasa 4:43 nabbaba.) I asaa metuwaa ubbaa xayssiya kawotettaa woy aysuwaa Xoossay ehaanaagaa asawu mishiraachchuwaa yootiis. a Ha minttettiyaabaa Yesuusi asawu yootanawu heezzu layttanne baggaa minnidi oottiis.—Maatiyoosa 9:35.
2. Yesuusi maalaalissiyaabata oottido gaasoy aybee?
‘Xoossay Yesuusa baggaara keehi daro wolqqaama oosota, oorattabatanne malaatata oottidoogaa’ Geeshsha Maxaafay yootees. (Oosuwaa 2:22) Yesuusi wolqqaama gotiyaa teqqanaadan, shaˈan qoodettiyaageeta mizanaadan, harggidaageeta pattanaadan, ubba qassi hayqqidaageeta denttanaadan Xoossay wolqqaa immiis. (Maatiyoosa 8:23-27; 14:15-21; Marqqoosa 6:56; Luqaasa 7:11-17) Yesuusi oottido maalaalissiyaabati Xoossay A kiittidoogaa bessoosona. Nu meto ubbaa qaaranawu Yihoowawu wolqqay deˈiyoogaakka bessoosona.
3. Yesuusi saˈan deˈido deˈuwaappe ay tamaarana danddayiyoo?
Yesuusi ay hanotankka Yihoowawu azazettiis. (Yohaannisa 8:29 nabbaba.) Yesuusi ba Aaway koyiyo ubbabaa oottiis. I oottennaadan daroti digganawu malikkonne, saˈan deˈido wode ubban hegaa oottiis. Metiyaabay deˈishinkka, asay Xoossawu oottana danddayiyoogaa I bessiis. Hegaa gishshawu, Yesuusi nu “a kaallana mala, [nuussi] leemiso gidiis.”—1 PHeexiroosa 2:21.
LOYTTA AKEEKA
Yesuusi mishiraachuwaa asawu waati yootidaakko, qassi maalaalissiyaabata waati oottidaakko akeeka.
4. Yesuusi mishiraachchuwaa asawu yootiis
Yesuusi danddayettida keenan daro asawu mishiraachchuwaa yootiiddi, baanay tullu giyo ogiyan xeetan qoodettiya kilo meetiriyaa tohuwan hemettiis. Luqaasa 8:1 nabbabite; yaatidi ha oyshata tobbite:
-
Yesuusi I yootiyoobaa siyanawu shiiqida asa xallawu sabbakidee?
-
Yesuusi asaa demmanawu ay oottidee?
Masee mishiraachchuwaa yootanaagaa Xoossay kasetidi odiis. Isiyaasa 61:1, 2 nabbabite; yaatidi ha oyshata tobbite:
-
Yesuusi ha hiraagaa waati polidee?
-
Asay ha wodiyan he mishiraachchuwaa siyana koshshees gaada qoppay?
5. Yesuusi keehi maaddiya timirtteta tamaarissiis
Yesuusi Xoossaa Kawotettaa mishiraachchuwaa yootiyoogaa xalla gidennan, asaa eta deˈuwan maaddiyaabaakka tamaarissiis. Yesuusi Maatiyoosa shemppo 5ppe 7 gakkanaashin tamaarissidobaappe amaridabaa akeeka. Maatiyoosa 6:14, 34nne 7:12 nabbabite; yaatidi ha oyshata tobbite:
-
Ha xiqisetun Yesuusi zorido maaddiya zoree aybee?
-
Ha zoree ha wodiyan deˈiya asaa maaddees gaada qoppay?
6. Yesuusi maalaalissiyaabata oottiis
Yihooway maalaalissiya darobata oottanaadan Yesuusassi wolqqaa immiis. I oottido issibaa akeekanawu, Marqqoosa 5:25-34 nabbabite; woy BIIDUWAA beˈite. Yaatidi kaallidi deˈiya oyshata tobbite.
-
Sahettiya maccaasiyaa ay ammaniyoogaa biiduwaappe akeekadii?
-
Ha maalaalissiyaaban nena ufayssidabay aybee?
Yohaannisa 5:36 nabbabite; yaatidi ha oyshaa tobbite:
-
Yesuusi oottido maalaalissiyaabati abaa ‘markkattiyoobay’ woy qonccissiyoobay aybee?
Hagaa eray?
Nuuni Yesuusabaa eriyo darobay Geeshsha Maxaafan Maatiyoosa, Marqqoosa, Luqaasanne Yohaannisa geetettiya oyddu Wonggeletun deˈees. Wonggeliyaa xaafeti ubbay Yesuusabaa issuwaagee haraagaappe dummatiya amaridabaa yootidosona. Nuuni ha oyddu maxaafata nabbabiyo wode, A deˈuwaabaa ufayssiyaabaa akeekoos.
-
MAATIYOOSI
xaafido Wonggelee koyroogaa. He maxaafay Yesuusa timirttetuppe darota, ubba qassi Xoossaa Kawotettaabaa I tamaarissidobaa yootees.
-
MARQQOOSI
xaafido Wonggelee ubbaappe qantta. He maxaafay ufayssiya darobata yootees.
-
LUQAASI
Yesuusi woosaa ay keena xoqqu ootti xeelliyaakko, qassi macca asaa waati oyqqidaakko yootiis.
-
YOHAANNISI
Yesuusi ba mata laggetuuranne haratuura haasayido darobaa yootiyoogan, A eeshshaabaa keehi qonccissiis.
ISSI ISSI ASAY HAGAADAN GEES: “Yesuusi Ubbaa Danddayiya Xoossaa.”
-
Ne qofay aybee?
AY AKEEKADII?
Yesuusi Xoossaa Kawotettaabaa yootiis, maalaalissiyaabata oottiisinne ay hanotankka Yihoowawu azazettiis.
Zaaretuwaa
-
Yesuusi saˈan deˈiyo wode awu waanna oosoy aybee?
-
Yesuusi oottido maalaalissiyaabati ay qonccissiyoonaa?
-
Yesuusi keehi maaddiyaabaa ay tamaarissidee?
PILGGA
Yesuusi ubbabaappe aaruwan tamaarissidobay aybee?
“Xoossaa Kawotettaa Yesuusi Xoqqu Ootti Xeellees” (Wochchiyo Keelaa, Xiqimita 1, 2014)
Yesuusi maalaalissiyaabata tumuppe oottidoogaa nuuni ammanana danddayiyoy aybissakko akeeka.
“Yesuusi Oottido Maalaaliyaabatuppe Ay Tamaarana Danddayay?” (Wochchiyo Keelaa huuphe yohuwaa)
Issi bitanee Yesuusi haratuyyo keehi qarettiyoogaa erido wode A deˈoy waani laamettidaakko nabbaba.
“Ta Koyiyoobaa Xallaa Polaydda Deˈaas” (Wochchiyo Keelaa, Xiqimita 1, 2014)
Yesuusi oottido keehi koshshiyaabati I oottido maaran maaran xaafettidaagaa beˈa.
“Saˈan Yesuusa Deˈuwaara Gayttida Waannabata” (Xoossaa Qaalaa Xannaˈanawu Maaddiyaabaa, SHaahuwaa 4)
a Timirtte 31-33y Xoossaa Kawotettaabaa loytti qonccissana.
Hageeta Beˈadii?
ASAY DAROTOO OYCHIYO OYSHATA
Yihoowa Markkati Geeshsha Maxaafaa Xannaˈissiyoy Ayba Ogiyaanee?
Yihoowa Markkati miishsha qanxxissennan xannaˈissiyo prograamiyan, Geeshsha Maxaafaa birshshettaa awugaakka goˈettana danddayaasa. Ne so asa ubbaynne ne laggetikka nenaara xannaˈanaadan shoobbana danddayaasa.
