LESON 16
Ino ma Raha Nataony Jesosy Tambony Tany Teto?
Maro olo mivolan̈a fa Jesosy zen̈y tsaiky hely malôlolôlo, paminan̈y, avio izy naty. Fa asa hahay izy atsika izikoa mandiniky fiain̈ananany taminizy tambony tany teto? Hianarantsika amy leson ty, sasany amy raha maventy nataony Jesosy ndreky hatsaran̈a ho azonao baka amy fahaizan̈a zen̈y.
1. Ino ma asa farany maventy tamy Jesosy?
Asa farany maventy tamy Jesosy ‘nitory vaovao tsara momba Fanjakan̈any Zan̈ahary.’ (Vakia Lioka 4:43.) Izy nan̈ambara vaovao tsara taminolo fa Zan̈ahary han̈orin̈y fanjakan̈a araiky, ke fanjakan̈a io han̈adoso problemo jiaby misy erantany. a Tan̈atiny telo taon̈o sy tapany Jesosy nifen̈y mare nan̈ambara vaovao tsara zen̈y.—Matio 9:35.
2. Nan̈ino ma Jesosy nan̈ano fahagagan̈a?
Baiboly mitantara ‘asa maventy maro ndreky fahagagan̈a ndreky famantaran̈a nirahiny Zan̈ahary nataony Jesosy.’ (Asan’ny Apostoly 2:22) Jehovah nan̈amia angovo Jesosy, ke Jesosy nahavita nampijanon̈o tsiko mare, nan̈amia hanin̈y olo andrivony, nampajanga olo marary, ndreky firaka namelon̈o olo maty. (Matio 8:23-27; 14:15-21; Marka 6:56; Lioka 7:11-17) Hita baka tamy fahagagan̈a nataony Jesosy in̈y fa izy iraka Zan̈ahary ankitin̈y. Hita tamizin̈y koa fa Jehovah manan̈a angovo han̈adosoan̈a problemontsika jiaby.
3. Ino raha ianarantsika baka amy fiain̈anany Jesosy?
Jesosy nan̈araka volan̈a Jehovah fo tamy fiainan̈anany jiaby. (Vakia Jaona 8:29.) Nataony Jesosy zay raha nan̈irahany Babany izy, ndray naro olo nisakana izy han̈ano izio. Naboakany tamy zen̈y fa vitanolombelon̈o manompo Zan̈ahary, ndray an̈atiny raha sarotro. Jesosy nan̈ambela ‘modely harehantsika baka atsika hahavita han̈araka dianany tsarabe.’—1 Petera 2:21.
ALEVA ONON̈O
Diniha akory nataony Jesosy nan̈ambara vaovao tsara ndreky nan̈ano fahagagan̈a.
4. Jesosy nan̈ambara vaovao tsara
Jesosy nahavita dia vity anjatony kilometara, tamy lalan̈a feno laposiera, nan̈ambara vaovao tsara taminolo farany maro. Vakia Lioka 8:1, avio iaraha dinihin̈y fan̈ontanian̈a aby ty:
-
Lera nisy olo nivory hitandren̈y izy fo ma Jesosy vo nitory?
-
Ino raha nataony baka izy nahita olo nikoran̈ana?
Zan̈ahary efa nan̈ambara fa Mesia io hitory vaovao tsara. Vakia Isaia 61:1, 2, avio iaraha dinihin̈y fan̈ontanian̈a aby ty:
-
Akory nataony Jesosy nan̈atanteraka faminanian̈a io?
-
Fahitanao izy, asa mila han̈ambaran̈a vaovao tsara io koa olo amy zioty?
5. Nampianatra fahamarin̈ana maventy Jesosy
Sosokony Jesosy nitory vaovao tsara momba Fanjakan̈any Zan̈ahary in̈y, izy nampianatra olo raha maventy koa. Diniha baka raha sasany nampianariny tamy Toriteny Tan̈abony Bongo. Vakia Matio 6:14, 34, ndreky 7:12, avio iaraha dinihin̈y fan̈ontanian̈a aby ty:
-
Ino aby torohevitry tsara arehan̈a namiany Jesosy, koran̈iny andininy aby io?
-
Fahitanao izy, mbala ilain̈a izioty ma torohevitry aby io?
6. Jesosy nan̈ano fahagagan̈a
Jehovah nan̈amia angovo Jesosy nan̈anovan̈a fahagagan̈a maro. Zahava ohatra araiky amy zen̈y, ke vakia Marka 5:25-34 na alifasa VIDEO io. Avio iaraha dinihin̈y fan̈ontanian̈a ambany io.
-
Tamy video in̈y, ino raha nikeny man̈angy in̈y?
-
Ino raha ten̈a tianao tamy fahagagan̈a io?
Vakia Jaona 5:36, avio iaraha dinihin̈y fan̈ontanian̈a ty:
-
Man̈aporofo ino momba Jesosy iro fahagagan̈a nataony in̈y?
Asa mba hainao?
Ankamarozany raha haintsika momba Jesosy, hita amy boky efatra amy Baiboly ao, na Filazantsara: Matio, Marka, Lioka, ndreky Jaona. Iro nanoratra izio samy mikoran̈a raha momba Jesosy. Atsika koa mamaky iro boky efatra aby io, ho maro raha haintsika momba fiain̈anany Jesosy.
-
MATIO
nanoratra boky voanalohany amy Filazantsara io. Raha nampianariny Jesosy ten̈a nikoran̈iny, sirto raha nampianariny Jesosy momba Fanjakan̈any Zan̈ahary.
-
MARKA
io Filazantsara farany fohiky. Maro mankahery raha koran̈iny ao.
-
LIOKA
mikoran̈a fa ten̈a raha maventy tamy Jesosy vavaka io, avio man̈ambara fa Jesosy tsara fan̈ahy tamy man̈angy.
-
JAONA
man̈ambara toetriny Jesosy taminizy nikoran̈a taminolo ten̈a marikitry izy, ndreky koran̈anany taminolo hafa koa.
MISY OLO MIVOLAN̈A: “Jesosy mira olo jiaby fo. Izy tsy Zanaka Zan̈ahary zen̈y.”
-
Akory hevitrinao?
INO RAHA NIANARANAO TATO?
Jesosy nitory momba Fanjakan̈any Zan̈ahary, nan̈ano fahagagan̈a, ndreky nan̈araka volan̈a Jehovah tamy fiainan̈anany jiaby.
Fan̈ontanian̈a Fameren̈ana
-
Ino ma asa farany maventy tamy Jesosy taminizy tambony tany teto?
-
Man̈aporofo ino iro fahagagan̈a nataony Jesosy in̈y?
-
Ino aby leson maventy nampianariny Jesosy?
ZAHAVA
Ino ma raha ten̈a matetiky nikoran̈iny Jesosy taminolo?
“Nan̈ino ma Jesosy Nan̈ambara Fanjakan̈any Zan̈ahary?” (Tilikambo Fiambesan̈a 1 Oktobra 2014)
Zahava nan̈ino atsika matoky fa Jesosy nan̈ano fahagagan̈a ankitin̈y.
“Ino Leson Azonao Baka amy Fahagagan̈a Nataony Jesosy?” (Tilikambo Fiambesan̈a 15 Zie 2004)
Zahava fa nampiova lelahy araiky zay fahaizany fa Jesosy ten̈a nahinakinaka olo.
“Zaho Taloha Tia Ten̈a Mare” (Tilikambo Fiambesan̈a 1 Oktobra 2014)
Zahava listiny raha maventy nataony Jesosy arakaraka fotoan̈a nan̈anovany izy.
“Raha Niavaka Tamy Fiain̈ana Jesosy” (Fitaovan̈a Fianaran̈a Soratra Masin̈y)
a Leson 31-33 mikoran̈a tsarabe momba Fanjakan̈any Zan̈ahary io.
Mety ho Tianao Koa
RAHA MATETIKY AN̈ONTANIANOLO
Karakory ma Atao Mianatra Baiboly Zen̈y?
Tsy man̈efa mianatra Baiboly amy Vavolombelon̈o Jehovah. Mety tahominao miaraka mianatra aminao koa havanao ndreky kamaradinao. Lera anao mianatra, anao afaka mampiasa zay fandikanteniny Baiboly tianao.
