UMBUESÁ 16

Maã Jesus umuñhã uikú ramé kuera iwí upé?

UYUPIRŨ

Ta umanduári ramé Jesus resé, siya miraitá ta umaã aé mayé yepé taína u yepé profeta ukuawaá u yepé apigá uikuwaá yepé mirá resé umanũ arama. Ma yayumbué ramé Jesus vida resé iwí upé yapoderi yakuá supiwaá isesé. Kuá umbuesá upé, yasú yamaã yepeyepé maã importantewaá Jesus umuñhã asuí mayé kuá upoderi uajudari indé.

1. Mayewaá Jesus murakí importante piriwaá?

Jesus murakí importante piriwaá ‘umbeu kuá ñheenga purangawaá’ Deus Reino resé. (Releri Luka 4:43.) Kuá ñheenga purangawaá Jesus umbeuwaá, aé Deus Governo resé usuwaá kurí umukaturu pañhe iwasú yasasawaá. a (Remaã nota.) Musapiri akayú pukusá Jesus upurakí retana umbeu arama kuá ñheenga purangawaá resé miraitá supé. — Mateu 9:35.

2. Marã Jesus umuñhã kuera milagre?

Bíblia umbeu siya ‘milagreitá Deus umuñhãwaá Jesus rupí’. (Ato 2:22) Deus kirimbasá irum, Jesus umupituú yepé trevada, umeẽ timbiú siya miraitá supé arama, umupuranga imasíwaitá asuí umbaka umanũwaitá. (Mateu 8:23-27; 14:15-21; Marko 6:56; Luka 7:11-17) Jesus milagreitá ta uxari yakuá Deus umunduwaá aé. Aintá ta uxari yakuá yuíri Deus upoderi umbawa pañhe yapurarawaá irum.

3. Maã yapoderi yayumbué Jesus umuñhãwaá rupí?

Jesus usendúwara Jeová. (Releri João 8:29.) Aé umuñhã kuayé ivida pukusá, até ta usikari ramé aé. Aé uxari yakuá miraitá ta upoderi ta umuñhã Deus vontade até ta usasá ramé iwasuwaá rupí. Ape ‘uxari yamaã arama yané rangá aé yasú arama sakuera sapé rupí’. — 1 Pedro 2:21.

REYUMBUÉ PIRI ARAMA

Remaã mayé Jesus umbeu ñheenga purangawaá resé asuí mayé umuñhã milagreitá.

4. Jesus umbeu kuera ñheenga purangawaá resé

Jesus uwatá retana siya tetamaitá rupí umbeu arama kuá ñheenga purangawaá resé pañhe miraitá supé arama. Peleri Luka 8:1. Ariré pekuntari kuá resé:

Será Jesus umbué añhũ miraitá ta usikawaá ipiri?
Maã Jesus usikari umuñhã uwasemu arama miraitá?

Deus uxari Bíblia upé kuá profecia: Mesia usúma umbeu kuá ñheenga purangawaá resé. Peleri Izaía 61:1, 2. Ariré pekuntari kuá resé:

Mayé kuá profecia uyumuñhã Jesus resé?
Será miraitá ta uprecisari ta usendú kuá ñheenga purangawaá?

5. Jesus umbué supiwaá importantewaá

Jesus umbeu ñheenga purangawaá Deus Reino resé, ma umeẽ conselho purangawaá yuíri. Remaã yepeyepé maã Jesus umbuewaá uikú ramé iwitera upé. Peleri Mateu 6:14, 34 asuí 7:12. Ariré pekuntari kuá resé:

Mayewaá conselho purangawaá Jesus umeẽ kuá versículoitá upé?
Indé arama, será kuá conselhoitá aintá puranga miraitá supé yané tempo upé?

6. Jesus umuñhã kuera milagreitá

Jeová umeẽ kirimbasá Jesus supé umuñhã arama siya milagre. Remaã yepé exemplo. Peleri Marko 5:25-34 u pemaã kuá VÍDEO. Ariré pekuntari kuá resé:

VÍDEO: Jesus umupuranga yepé kuñhã imasiwaá uikú (5:10)

Kuá kuñhã uikú imasí. Yawewaá suité maã resé aé uruyari?
Maã regustari piri kuá milagre resé?

Peleri João 5:36. Ariré pekuntari kuá resé:

Maã kuá milagreitá Jesus umuñhãwaá ta uxari yakuá?

Rekuáwana será kuá resé?

Quase pañhe maã yakuawaá Jesus resé uikú Mateu, Marko, Luka asuí João upé Bíblia upé. Ta useruka aintá mayé Evangelho. Muíri aintá suí ta umpinima yepeyepé maã Jesus vida resé. Mairamé yaleri pañhe aintá yapoderi yakuá maã usasá Jesus irum iwí upé.

MATEU

Yepesá umpinamawaá Jesus resé. Ape aikué siya maã Jesus umbuewaá, mayé maã umbué Deus Reino resé.
MARKO

Aé kuá Evangelho kuaíra piriwaá. Aé iwasuíma yaentenderi arama asuí ukuntari siya maã Jesus murakí resé.
LUKA

Kuá livro umbeu mayé oração importante Jesus supé asuí mayé aé umaã kuñhãitá.
JOÃO

Uxari yakuá siya maã Jesus ukuntariwaá isumuaraitá irum asuí amú miraitá irum. Kuá uajudari yakuá arama Jesus rikusá resé.