XOOK 16
¿Baʼax tu beetaj Jesús ka taal way Luʼumeʼ?
Yaʼab máakoʼobeʼ ku tuklikoʼobeʼ Jesúseʼ chéen juntúul chaambal, juntúul profeta wa láayliʼ chʼuyukbal teʼ cheʼ tuʼux kíimsaʼaboʼ. ¿Máasaʼ wa ka a wojéelt baʼax tu beetaj way yóokʼol kaabeʼ jeʼel a kʼaj óoltik tubeeleʼ? Teʼ xookaʼ yaan a kanik jujunpʼéel tiʼ le baʼaxoʼob tu beetaj Jesúsoʼ yéetel baʼaxoʼob ku kaʼansiktoʼon.
1. ¿Máakalmáak le meyaj tu tsʼáaj táanil ichil u kuxtal Jesúsoʼ?
Jesúseʼ jach tu tsʼáaj u yóol u tsikbalt «le baʼaloʼob maʼalobtak ken u beet u Reino Dios» tiʼ le máakoʼoboʼ (xok Lucas 4:43). Tu yáamil tres años y medioeʼ jach tu tsʼáaj u yóol u kaʼans tiʼ le máakoʼob chéen u Reino Dios ken u yutskíint tuláakal le problemas yanoʼ a (Mateo 9:35).
2. ¿Baʼaxten Jesúseʼ tu beetaj milagroʼob?
Le Bibliaoʼ ku yaʼalikeʼ Jesúseʼ «tu beetaj milagroʼob bey xan baʼaloʼob ku beetik u jaʼakʼal u yóol máak» (Hechos 2:22). Yoʼolal le poder tsʼaʼabtiʼ tumen Diosoʼ páajchaj u jetsʼik junpʼéel kʼaʼamkach iikʼ, u tsʼáaik baʼal u jaant u milesil máakoʼob, u tsʼakik kʼojaʼanoʼob yéetel u kaʼa kuxkíintik le kimenoʼoboʼ (Mateo 8:23-27; 14:15-21; Marcos 6:56; Lucas 7:11-17). Le milagroʼob tu beetaj Jesúsoʼ tu yeʼesaj Dios túuxt way Luʼumeʼ. Tu yeʼesoʼob xaneʼ chéen tiʼ Jéeoba yaan u poderil u yutskíintik tuláakal le problemasoʼ.
3. ¿Baʼax k-kanik tiʼ le bix úuchik u kuxtal Jesúsoʼ?
Jesúseʼ mantatsʼ tu yuʼubaj u tʼaan Jéeoba (xok Juan 8:29). Kex yaʼab máakoʼob pʼekteʼ chúukpaj u yóol u meyajt Jéeoba tak tu xuul. Tu yeʼeseʼ wíinikeʼ jeʼel u páajtal u chúukpajal u yóol u meyajt Dios kex maʼ chéen chʼaʼabiliʼ. Jeʼex túun k-ilkoʼ Jesúseʼ tu yeʼesajtoʼon «bix jeʼel [k-xíimbal] jach jeʼex úuchik u beetkoʼ» (1 Pedro 2:21).
UTIAʼAL A MAAS NAʼATIK
Koʼox ilik le milagroʼob tu beetaj Jesúsoʼ yéetel bix tu kaʼansil le baʼaloʼob ken u beet u Reino Diosoʼ.
4. Jesúseʼ tu kaʼansaj baʼax ken u beet u Reino Dios
Jesúseʼ jach yaʼab kilómetros tu xíimbaltaj utiaʼal u tsikbaltik le baʼaloʼob ken u beet u Reino Diosoʼ. Xokeʼex Lucas 8:1, kéen tsʼoʼokkeʼ ka tsikbaltikeʼex lelaʼ:
-
Jesúseʼ, ¿chéen wa le máaxoʼob náatsʼoʼob yiknal tu kaʼansoʼ?
-
¿Baʼax anchaj u beetik utiaʼal u kaʼansik le máakoʼoboʼ?
Dioseʼ tu yaʼaleʼ letiʼe Mesías ken u kaʼans le baʼaloʼob maʼalobtak ken u beet u Reinooʼ. Xokeʼex Isaías 61:1, 2, kéen tsʼoʼokkeʼ ka tsikbaltikeʼex lelaʼ:
-
¿Bix tu béeykuntil Jesús le profecíaoʼ?
-
¿Láayliʼ wa ta tʼaan kʼaʼabéet u yuʼubik le máakoʼob le baʼax tu kaʼansaj Jesúsoʼ?
5. Le baʼaxoʼob tu kaʼansaj Jesúsoʼ jach jeʼel u yáantik máakeʼ
Jesúseʼ tu kaʼansaj baʼax ken u beet Dios yéetel uláakʼ baʼaloʼob jach jeʼel u yáantik máakeʼ. Koʼox ilik baʼaxoʼob tu kaʼansaj le tiaʼan tiʼ junpʼéel montañaoʼ. Xokeʼex Mateo 6:14, 34 yéetel 7:12, kéen tsʼoʼokkeʼ ka tsikbaltikeʼex lelaʼ:
-
¿Baʼax consejoiloʼob tu tsʼáaj Jesús teʼ versículoʼoboʼ?
-
¿Jeʼel wa ta tʼaan u yáantik máak teʼ kʼiinoʼobaʼ?
6. Jesúseʼ tu beetaj milagroʼob
Jéeobaeʼ tu tsʼáaj poder tiʼ Jesús utiaʼal u beetik yaʼab milagroʼob. Utiaʼal a wilkeʼex junpʼéel tiʼ le milagroʼob tu beetoʼ xokeʼex Marcos 5:25-34 wa chaʼanteʼex le VIDEOOʼ. Kéen tsʼoʼokkeʼ ka tsikbaltikeʼex lelaʼ.
-
Jeʼex tu yeʼesil le videooʼ, ¿baʼax u yojel le koʼolel kaʼachoʼ?
-
¿Baʼax maas jatsʼuts ta wilil tiʼ le milagro tu beetaj Jesúsoʼ?
Xokeʼex Juan 5:36, kéen tsʼoʼokkeʼ ka tsikbaltikeʼex lelaʼ:
-
¿Baʼax ku «probartik» le milagroʼob tu beetaj Jesúsoʼ?
¿A wojel wa?
Óoliʼ tuláakal le baʼaxoʼob ojéelaʼan yoʼolal Jesúsoʼ tsʼíibtaʼan teʼ kanpʼéel Evangelioʼoboʼ. Le máaxoʼob tsʼíibt u libroil Mateo, Marcos, Lucas yéetel Juaneʼ jejeláas baʼaxoʼob tu tsʼíibtoʼob yoʼolal Jesús. Tuláakal le baʼaxoʼob tu tsʼíibtoʼoboʼ jach maʼalob u nupkubaʼob, tsʼoʼoleʼ ku yáantkoʼon k-ojéelt baʼaxoʼob tu beetaj Jesús ka anchaj way Luʼumeʼ.
-
MATEO
yáax tsʼíibt junpʼéel tiʼ le Evangelioʼoboʼ. Le libro tu tsʼíibtoʼ maases ku tʼaan tiʼ le baʼaxoʼob tu kaʼansaj Jesús yoʼolal u Reino Diosoʼ.
-
MARCOS
tsʼíibt le Evangelio maas kóomoʼ. Chéen baʼaleʼ ku tsikbaltik yaʼab baʼaloʼob ku péeksik u yóol máak.
-
LUCAS
aʼal baʼaxten jach kʼaʼabéet u orar máak yéetel tu yaʼalaj xaneʼ Jesúseʼ jach maʼalob úuchik u tratartik le koʼoleloʼoboʼ.
-
JUAN
aʼal bix u modos Jesús tumen tʼaanaj tiʼ le baʼaxoʼob tu tsikbaltaj yéetel u amigoʼob bey xan yéetel uláakʼ máakoʼoboʼ.
BAʼAX SUUK U YAʼALAʼAL: «Jesúseʼ chéen juntúul utsul máak kaʼachi».
-
Techeʼ, ¿baʼax ka tuklik yoʼolal Jesús?
BAʼAX TSOʼOLI
Jesúseʼ tu kaʼansaj baʼax ken u beet u Reino Dios, tu beetaj milagroʼob yéetel mantatsʼ tu yuʼubaj u tʼaan Jéeoba.
Baʼax ta kanaj
-
¿Baʼax meyajil tu tsʼáaj táanil ichil u kuxtal Jesús le ka anchaj way Luʼumeʼ?
-
¿Baʼax tu yeʼesaj le milagroʼob tu beetaj Jesúsoʼ?
-
¿Baʼaxoʼob tu kaʼansaj Jesús?
KAN U MAASIL
¿Baʼax maases tu kaʼansaj Jesús?
«U Reino Dios: ¿baʼaxten kʼaʼanaʼan utiaʼal Jesús? (U Pʼíich Tulumil Kanan, 1 tiʼ octubre tiʼ 2014)
Ilawil baʼaxten jeʼel u páajtal k-creertik jach tu jaajil úuch le milagroʼob tu beetaj Jesúsoʼ.
«¿Baʼax jeʼel k-kanik tiʼ le milagroʼob tu beetaj Jesúsoʼ?» (U xookil U Pʼíich Tulumil Kanan)
Xok bix kʼexpajik u kuxtal juntúul máak úuchik u kanik Jesúseʼ maʼ tuukulnaj chéen tiʼ letiʼiʼ.
«Teen kaʼach u maas kʼaʼanaʼanil» (U Pʼíich Tulumil Kanan, 1 tiʼ octubre tiʼ 2014)
Ilawil baʼaxoʼob sen úuch ichil u kuxtal Jesús.
a Teʼ xook 31 tak 33, yaan u maas tsoʼolol baʼax u Reino Dios.
Maʼ xaaneʼ jeʼel u yutstal xan ta wicheʼ
KʼÁATCHIʼOB SUUK U BEETAʼAL
¿Bix u tsʼáaikoʼob xook u testigoʼob Jéeoba yéetel le Bibliaoʼ?
Le xook ku tsʼáaik u testigoʼob Jéeobaoʼ gratis, jeʼel u páajtal a usartik a Bibliaeʼ yéetel jeʼel u páajtal a invitartik wa máax utiaʼal u láakʼintikech teʼ xookoʼ.
