LEKSIYON 17
Ano an Personalidad ni Jesus?
Pag pinag-adalan ta an mga sinabi saka ginibo ni Jesus digdi sa daga, maaaraman ta an magagayon niyang kuwalidad asin huli kaiyan mapaparani kita sa saiya asin sa saiyang Ama na si Jehova. Ano an pira sa mga kuwalidad na iyan? Asin paano ta maaarog si Jesus?
1. Ano an mga pagkakapareho ni Jesus sa saiyang Ama?
Sa langit, bilyon-bilyon na taon na naobserbaran ni Jesus an saiyang mamumuton na Ama asin nakanuod sa Saiya. Bilang resulta, arog na arog niya an kaisipan asin pagmati kan saiyang Ama saka an mga pamamaagi kaini sa paggibo kan mga bagay-bagay. (Basahon an Juan 5:19.) Sa katunayan, naarog na marhay ni Jesus an personalidad kan saiyang Ama, kaya nasabi niya: “An siisay man na nakahiling na sa sako nakahiling na man sa Ama.” (Juan 14:9) Mantang mas nabibisto mo si Jesus, mas mabibisto mo man si Jehova. Halimbawa, an pagmalasakit ni Jesus sa mga tawo patunay na nagmamalasakit na marhay si Jehova sa saimo.
2. Paano ipinahiling ni Jesus na namumutan niya si Jehova?
Sinabi ni Jesus: “Tanganing maaraman kan kinaban na namumutan ko an Ama, ginigibo ko kun ano an ipinagbuot kan Ama na gibuhon ko.” (Juan 14:31) Kan si Jesus yaon digdi sa daga, ipinahiling niya an dakulang pagkamuot sa saiyang Ama paagi sa pagsunod sa Saiya dawa sa mga sitwasyon na masakit iyan gibuhon. Gustong-gusto man ni Jesus na sabihon sa iba an manungod sa saiyang Ama asin tabangan an iba na magin amigo ni Jehova.—Juan 14:23.
3. Paano ipinahiling ni Jesus na namumutan niya an mga tawo?
Sinasabi kan Bibliya na “an urog [na] nawiwilihan [ni Jesus] iyo an katawuhan.” (Talinhaga 8:31, nota sa ibaba) Ipinahiling niya an pagkamuot na iyan paagi sa mapagsakripisyong pagtabang asin pagpakusog sa mga tawo. Ipinahiling kan mga ginibo niyang milagro bako lang an saiyang kapangyarihan kundi pati man an saiyang pagmalasakit. (Marcos 1:40-42) Mabuot siya saka pantay-pantay an paghiling niya sa mga tawo. An saiyang mga sinabi nagpakusog asin nagtao nin paglaom sa gabos na sadiyosan an puso na nagdangog saiya. Handa si Jesus na magsakit asin magadan dahil namumutan niya an mga tawo, lalo na an mga nagsusunod sa mga itinukdo niya.—Basahon an Juan 15:13, 14.
ARAMON PA
Mas bistuhon pa si Jesus. Aramon man kun paano mo maaarog an saiyang pagkamuot asin pagkabukas-palad.
4. Namumutan ni Jesus an saiyang Ama
Itinutukdo sato kan halimbawa ni Jesus kun paano ta maipapahiling an satong pagkamuot sa Diyos. Basahon an Lucas 6:12 asin Juan 15:10; 17:26. Pagkatapos na basahon an kada teksto, pag-ulayan an hapot na ini:
-
Bilang pag-arog ki Jesus, paano ta maipapahiling na namumutan ta si Jehova?
Namumutan ni Jesus an saiyang Ama sa langit asin pirmi siyang nakikipag-ulay sa Saiya sa pamibi
5. Nagmamalasakit si Jesus sa mga tawong nangangaipo
Pirming iniinot ni Jesus an kapakanan kan iba. Dawa kan pagal siya, ginamit niya an saiyang oras asin kusog para tabangan an mga tawo. Basahon an Marcos 6:30-44, dangan pag-ulayan an mga hapot na ini:
-
Sa pagkasaysay na ini, sa anong mga paagi ipinahiling ni Jesus an saiyang pagmalasakit sa iba?—Hilingon an bersikulo 31, 34, 41, asin 42.
-
Taano ta tinabangan ni Jesus an mga tawo?—Hilingon an bersikulo 34.
-
Huling mahihiling ki Jesus an mga kuwalidad ni Jehova, ano an itinutukdo sa saimo manungod ki Jehova kan mga ginibo ni Jesus?
-
Sa anong mga paagi ta maaarog an pagmalasakit ni Jesus sa iba?
6. Si Jesus bukas-palad
Matinao si Jesus maski bako siyang mayaman, asin sinasabi niya sato na magin matinao man. Basahon an Gibo 20:35, dangan pag-ulayan an hapot na ini:
-
Base sa sinabi ni Jesus, paano kita magigin maugma?
I-play an VIDEO, dangan pag-ulayan an hapot na ini:
-
Sa anong mga paagi kita makakatao sa iba dawa ngani bako man kitang mayaman?
Aram mo daw?
Itinutukdo sa sato kan Bibliya na mamibi ki Jehova paagi sa ngaran ni Jesus. (Basahon an Juan 16:23, 24.) Pag namimibi kita sa arog kaiyan na paagi, ipinapahiling ta an satong pasasalamat sa ginibo ni Jesus para tabangan kitang magin amigo ni Jehova.
MAY MGA NAGSASABI: “Mayo man pakiaram an Diyos sa pagsakit ta.”
-
Huling mahihiling ki Jesus an personalidad kan saiyang Ama, paano pinapatunayan kan mga ginibo niya na nagmamalasakit sa sato si Jehova?
SUMARYO
Namumutan ni Jesus si Jehova, asin namumutan niya an mga tawo. Huling si Jesus arog kan saiyang Ama, mas mamimidbid mo si Jehova mantang mas namimidbid mo si Jesus.
Rebyu
-
Arog ni Jesus, paano ta maipapahiling na namumutan ta si Jehova?
-
Arog ni Jesus, paano ta maipapahiling na namumutan ta an mga tawo?
-
Ano an pinakanagustuhan mo sa personalidad ni Jesus?
HILINGON MAN
Pag-isipan an pira sa mga kuwalidad ni Jesus na puwede tang arugon.
“Tanganing Maarog si Jesus, Magin . . .” (Si Jesus—An Dalan, an Katotoohan, an Buhay, pahina 317)
Aramon kun taano ta dapat kitang mamibi paagi sa ngaran ni Jesus.
“Taano ta Dapat Mamibi na Ipinapaagi sa Pangaran ni Jesus?” (An Torrengbantayan, Pebrero 1, 2008)
May sinasabi daw an Bibliya manungod sa itsura ni Jesus?
Ano an manunudan ta sa paagi nin pagtrato ni Jesus sa mga babayi?
“Respeto at Dignidad sa Ilalim ng Pangangalaga ng Diyos” (Ang Bantayan, Setyembre 1, 2012)
Puwede Mo Man Magustuhan
PARATING MGA IHINAHAPOT
Ano an Pag-adal sa Bibliya na Iinaalok kan mga Saksi ni Jehova?
Sa interactive na programa nin pag-adal na iinaalok kan mga Saksi ni Jehova, puwede mong gamiton an arin man na traduksiyon nin Bibliya. Dai mag-alangan na imbitaran an saimong bilog na pamilya o an siisay man sa mga amigo mo na umiba saimo.
