ISHOMO RYA 17

Ni eha mitwarize eyi Yesu ayine?

ZAANA

Ku turi kumanya ebi Yesu yagambire n’ebi yakozire ari omu nsi, nitumanya emitwarize eri kutuma twaba banywani beye kandi tukaba banywani b’Ishe, Yehova. Ni eha emwe omuri eyo mitwarize mirungi? Kandi shi ni bata oku turi kubasa kutoreza Yesu omu kubaho kwitu?

1. Ni mu buha buryo obu Yesu ari nk’Ishe?

Yesu ari omu iguru akaba nareba Ishe kandi akamara emyaka myingi ari kumwegeraho byingi. Ni yo nshonga ari kutekateka, akehurira kandi aketwara nk’Ishe. (Shoma omuri Yohaana 5:19.) Yesu natoreza emitwarize y’Ishe omu bwijwire; akagamba ati: ‘Ondebire, biri arebire [Tata].’ (Yohaana 14:9) Oku orikizaho kumanya Yesu ni ko orikizaho kumanya Yehova. Ecokureberaho: Yesu nayereka abantu esaasi kandi na Yehova ni ko ari kuzereka.

2. Ni bata oku Yesu yayerekire ku ari kukunda Yehova?

Yesu akagamba ati: ‘Nyowe nkora nk’oku Tata yandagire, ngu ensi emanye ku mukunda.’ (Yohaana 14:31) Obu Yesu yabire ari omu nsi, akereka ku nakunda Ishe ari kumworobera n’obu cabire kimugumire. Nambwenu Yesu akaba nakunda kugamba ahari Ishe kandi akakwasa abantu kugira obunywani na we.—Yohaana 14:23.

3. Ni bata oku Yesu yayerekire ku nakunda abantu?

Bibuli negamba ku Yesu ari kukunda abantu munonga. Akereka ku nakunda abantu ari kubagumya kandi ari kubakwasa. Akakora eby’okutangaza ebyayerekire ku ayine amani n’esaasi. (Mako 1:40-42) Akaba natwariza ge abantu kandi atari kushorora. Ebigambo byeye bikaba nibigumya abantu abine emitima mirungi abamuhurikize kandi bibaha amasiko. Yesu akikiriza kubonabona n’okufa aha bwa rukundo eyi ari kukunda abantu. Konka nakunda munonga abantu abari kukora ebi ari kuturagira.—Shoma omuri Yohaana 15:13, 14.

YEGA BYINGI

Yega byingi aha mitwarize ya Yesu. Nambwenu shwijuma oku ori kubasa kutoreza Yesu ori kwereka rukundo n’obufura.

4. Yesu nakunda Ishe

Ecokureberaho ca Yesu nikitwereka oku turi kubasa kukunda Ruhanga witu. Shoma omuri Luka 6:12 na Yohaana 15:10; 17:26. Bwanyima y’okushoma buri cahandikirwe, muganire ahari eki kibuzo:

Ni bata oku turi kubasa kutoreza Yesu turi kwereka ku nitukunda Yehova?

Yesu akaba nakunda Ishe w’omu iguru kandi akaba namushaba burijo

5. Yesu nafa aha bi abantu bari kwetenga

Yesu akaba nafa aha bi abantu bari kwetenga omu mwanya g’okubanza. N’obu yabire aruhire, akaba nakoresa obwire bweye n’amani geye omu kukwasa abandi. Shoma omuri Mako 6:30-44, rero muganire ahari ebi bibuzo:

Oku wakireba omuri egi nkuru, ni buha buryo bumwe obu Yesu yayerekiremu ku nafa aha bandi?—Reba orunyiriri rwa 31, 34, 41, na 42.
Ni enki ecabire nikihiga Yesu kukwasa abantu?—Reba orunyiriri rwa 34.
Ahakuba Yesu yabire ari kwereka emitwarize y’Ishe, obwe eco nikikwegesa ki ahari Yehova?
Ni buha buryo obu turi kubasa kutorezamu Yesu turi kufa aha bandi?

6. Yesu ni efura

N’obu Yesu yabire atine ebintu byingi akaba ari efura kandi n’itwe akatuhiga kuba efura. Shoma omu Byakozirwe 20:35, rero muganire ahari eki kibuzo:

Nk’oku Yesu yabigambire ni enki ekiri kubasa kutuma twashemererwa?

Zana VIDIYO, rero muganire ahari eki kibuzo.

VIDIYO: “Okugaba nikutuma twashemererwa”—Akacweka (4:00)

Ni buha buryo obu turi kubasa kuhereza abandi n’obu turi kuba tutine ebintu byingi?

Waba nokimanya?

Bibuli netwegesa kushaba Yehova tubirabize omu izina rya Yesu. (Shoma omuri Yohaana 16:23, 24.) Twakikora basyoya, nitwereka ku nitusima ahabw’eki Yesu yatukorire ngu tube banywani ba Yehova.

ABANTU ABAMWE NIBAGAMBA NGU: “Ruhanga ni we ori kubonabonesa abantu ari kubageza.”