ˈWƆN ˗GƆ 17
Yesu ˗bha ˈˈklʋʋsë ˗nu
ˈDhɛ ˈö Yesu kun ˈˈsɛ ˗ta, ˈwɔn ˗nu ˈö ˗an ˗kë waa pë ˈö˗ pö, kö ˈkwa ˗an ˗wo pö Biblö ˈgü, ˗yö kwa ꞊ɲɔɔn waa ö Dë Zoova ˗an ˗bha. Yesu ˗bha ˈˈklʋʋsë ˈbhaa ˗nu ˈtɔ˗ ˗mën? Kwa ˗dho ˈto ˗a ˗bha ˈwɔnzuan ˈˈpiʋ̈ ˗kɔ ˗kë ꞊dhɛ?
1. ˗Mën ˈö ˗kë ˈkwa˗ pö ꞊dhɛ Yesu ˗yö ˗bhɔ ö Dë ˗bha ˈkpakpadhö?
Yesu ˗yö pë ꞊vadhɛ ˗draan ö Dë ˈˈpiʋ̈ ˗kwɛ ˈˈmliyaa ꞊va ˈˈpiʋ̈ kö ˗yö ꞊kun dhaŋ˗ ˈgü. ˗A ˗wɔn ˈgü ˈdhɛ ˈö nu ˈˈsɛ ˗ta, ˗a kë ˗kɔ ˗nu, ˗a ˗bha ˈwɔn yö ˗kɔ ˗nu waa˗ ˗zota ˗kɔ ˗nu ˗wo ˗kë ꞊dhɛ ˗a Dë ˗bha ˈdhö. (Zan 5:19 ˗wo pö.) ˗Dhɛ ˈö ˗kë ꞊dhɛ Yesu ˗yö ˗ʒiö ö Dë kë ˗kɔ ˗nu ˈˈpiʋ̈ bhë, yö ˈnën ˈö˗ ˗wɔn ˈgü ˈö˗ pö: «ˈMɛ ˈbha n yö kö ˈbha n Dë yö.» (Zan 14:9) Kö ˈkwa Yesu dɔ ˗së ˈka, kwa ˗dho ˗a Dë Zoova dɔ ˗së ˈka ˈpö. ˗A ˈwɔnzuan ˈnën ˗tɔ mɛn ˗nu ˈwo kun saanˈˈ ˈgü ˗an ˗wëë ˗yö Yesu ˗kë. ˗Ya ˗zɔn ꞊dhɛ kwa ˗wëë ˗yö Zoova ˗kë ˈpö.
2. Yesu ˗ya ˗zɔn ꞊dhɛ Zoova ˗dhɔ ˗yö ö ˗kë ˗kɔ ˗kë ꞊dhɛ?
Yesu ˗ya ˗pö: «˗A ˗dhɛa ˗bha ꞊dhɛ ˈˈkpʋngtaamɛ ˗nu ˗wa ˈwɔn dɔ ꞊dhɛ n Dë ˗dhɔ ˗yö n ˗kë, ꞊dhɛ ˈpë ˈö˗ pö n ˗dhɛ ꞊në ˈa˗ ˗kë.» (Zan 14:31) ˗Dhɛ ˈö Yesu kun ˈˈkpɔnŋ ꞊taa, ˈkö ˗kë ꞊dhɛ ˗yö ˗kun ˗a ˗gɔ ˈˈgbɩɩ˗, ˗ya ˗zɔn ꞊dhɛ ö Dë ˗dhɔ ꞊dede ˗ya ˗kë ˈwɔn ˗man ˗a ˗ta ˗sü ˈka. ˗A Dë ˗dhɔ ˈö˗ ˈgü bhë yö ˈnën ˈö˗ ˗blü ˈpö -a ˗wɔn ˗blɛɛ mɛn ˈˈwɛɛ ˗nu ˗dhɛ ˗sü ˗bha, kö ˗wo kë ˗a ˈˈtɔŋdë ˗nu ˈka.—Zan 14:23.
3. ˗Kɔ ˗mɛɛn ˈö Yesu ˗ya ˗zɔn ˗a ˗bha ꞊dhɛ mɛn ˈˈwɛɛ ˗nu ˗dhɔ ˗ya ˗kë?
Biblö ˗ya ˗pö Yesu ˗yö «˗klu ˗sü ˈka mɛnbhɩɩdhe ˗nu ˗bha ꞊dedewo.» (Proverbes 8:31, ˗zoto ˗a ˈˈpiʋ̈ ˗wɔn) ˗Dhɔ ˈö˗ ˈgü ˗ya ˗blü ˈö mɛn ˗nu ꞊faan mën, ˈö ˗an ˗takun ˈˈwɛɛwɛ. ˗Dhidha ˗nu ˈö ˗an ˗kë, ˗wa ˗zɔn ꞊dhɛ ˗a ˈˈpii ˗yö ˈˈgbɩɩ˗, ˈˈkɛɛ ˗wa ˗zɔn ˈpö ꞊dhɛ mɛn ˗nu ˗wëë ˗ya ˗kë ꞊dedewo. (Makö 1:40-42) ˗A ˈˈklʋʋ ˗kun ˗së, ˈö ˈyaa mɛn ˗nu zë ˈgü. Zuʋ̈puumɛn ˗nu ˈwo kun wo ˈˈtʋ ˈto ˗ni ˈgü ˗a ˗bha, ˗yö ˗an ˗zogban ˈö˗ ˗kë ˈö ˈwo wo ˗zo yö ˗dhɛkpaɔ dhiʋ̈ˈˈ ˗së ˗dhɛ. Mɛnbhɩɩdhe ˗nu kwa ˗dhɔ ˈö˗ ˗kë ˗a ˈwɔn ˈgü ˗yö ˗we ˗a ˗bha kö ˈö saanˈˈ ˈsü, kö ˈö ga. ˈˈKɛɛ mɛn ˗nu ˈö ˗an ˗dhɔ ˗ya ˗kë ꞊dedewo ˈyö ˈwo ˗tɔ mɛn ˗nu ˈwo ˈwɔn man ˗a ˗ta.—Zan 15:13, 14 ˗wo pö.
˗KAA ˈˈPIƲ̈ ˈPƆN
˗Kwa Yesu ˗bha ˈˈklʋʋsë ˈbhaa ˗nu ˗wɔn blɛɛˈˈ kö ˗kɔ ˈö ˈkwa ˗dho ʒiö ˗a ˈka ˗a ˗bha ˗dhɔ waa˗ ˗bha ˈˈgblüsë ˈwɔnzuan ˈˈpiʋ̈, ˈkwa˗ dɔ.
4. Yesu Dë ˗dhɔ ˗ya ˗kë.
˗Kɔ ˈö ˈkwa ˗dho ˗a ˗zɔn ˗a ˈka ꞊dhɛ ˗Zlan ˗dhɔ ˗yö kwa ˗kë, Yesu ˗ya ˈwɔnzuan ˗zɔn kwa ˗dhɛ. ˗Ka Dhukö 6:12 waa Zan 15:10; 17:26 ˗an ˗wo pö. ˈKa ka bo ˗a ˈˈɲan ˈdhɛ ˈö ˈdhö ˗a ˗wo pö ˗sü ˈka, kö ˈka dhɛɛˈˈ ˈö yö ˗a ˗yɔ mɛɛnˈˈ:
-
Kwa ˗dho ʒiö Yesu ˗bha ˈwɔnzuan ˈˈpiʋ̈ ˗kɔ ˗kë ꞊dhɛ kö ˈkwa˗ ˗zɔn ꞊dhɛ Zoova ˗dhɔ ˗yö kwa ˗kë?
Yesu Dë ˗dhɔ ˗yö ˗kun ˗a kë ˗ni ˈgü ꞊dedewo, ˈö ˈwɔn ꞊blɛɛ ˗a ˗dhɛ ˈˈtʋ̈ŋ ˈˈplɛ ˈka
5. Mɛn ˗nu ˗wëë ˗yö Yesu ˗kë.
Yesu ˗yö ö ˗zota mɛn ˈˈwɛɛ ˗nu ˗wɔn ˈgü ˗blɛɛsü, ˈyö ꞊kun ö ˗zota ˗ni ö ˗de ˗wɔn ˈgü. ˈKö ˗kë ꞊dhɛ ˗a ˈgü ˗yö ˗ga, ˗yö ö ꞊faan waa ö ˗bha ˈˈtʋ̈ŋ ˗nu ˗sü ˈö mɛn ˗nu ˗takun. ˗Ka Makö 6:30-44 ˗an ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
-
˗Kwɛzlan ˈö bhë ˗a ˈgü, Yesu ˗ya ˗zɔn ˗kɔ ˗kë ꞊dhɛ ꞊dhɛ ö ö ˗zota mɛn ˈˈwɛɛ ˗nu ˗wɔn ˈgü. —-Ka kpɔɔˈˈ ˗a ˈˈɲan ˈsɛɛn˗ 31, 34, 41 waa 42 ˗an ˗bha.
-
ˈMën Yesu ˗blü mɛn ˗nu ˗takun ˗sü ˗bha? —-Ka kpɔɔˈˈ ˗a ˈˈɲan ˈsɛɛn˗ 34 ˗bha.
-
˗Dhɛ ˈö ˗kë ꞊dhɛ Yesu ˗yö ˗bhɔ ö Dë ˗bha bhë, ˗mën ˈö˗ këwɔn ˗nu ˗wa ˗zɔn kwa ˗dhɛ ˈö ˗gban Zoova ˗bha?
-
Kwa ˗dho ˗a ˗zɔn ˗kɔ ˗kë ꞊dhɛ ꞊dhɛ mɛn ˈˈwɛɛ ˗nu ˗wɔn ˗yö kwa ˗gɔ ˈˈgbɩɩ˗ ꞊dhɛ Yesu ˈdhö?
6. Yesu ˈˈgblü ˗yö ˗së.
ˈKö ˗kë ꞊dhɛ pë ˈyaa kun Yesu ˗gɔ ꞊va, ˗a ˈˈgblü ˗kun ˗së. ˗Yö kwa ꞊faan ˗mën ˈpö ˈˈgblüsë kë ˗sü ˗bha. ˗Ka Këwɔn ˗nu 20:35 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
-
Yesu ˗ya ˗pö ˗mën ˈö zuʋ̈gblüdhi nu mɛn ˗dhɛ?
˗Kaa VIDEO ˗ga, kö dhɛɛˈˈ ˈö ˈˈshia bhë ˈka˗ ˗yɔ mɛɛnˈˈ.
-
ˈKö ˗kë ꞊dhɛ pë ˈyaa kwa ˗gɔ ꞊va, kwa ˗dho ˈˈgblüsë kë mɛn ˈˈwɛɛ ˗nu ˈka ˗kɔ ˗kë ꞊dhɛ?
Ü˗ ˈwɔn ˗dɔ ˗ee?
Biblö ˗ya ˗pö kwa dua ˗mü ˈkwa bhɛɛˈˈ Zoova ˗dhɛ Yesu ˈtɔ ˈgü. (˗ka Zan 16:23, 24 ˗wo pö.) ˈKwa bhɛɛˈˈ Yesu ˈtɔ ˈgü, kö kwa˗ ˗zɔn ˈkpakpadhö ꞊dhɛ ˗a ˈsaa˗ ˈgü ˈyö ˈkwa ˗kë Zoova ˈˈtɔŋdë ˈka.
MƐN ˈBHAA ˗NU ˗WA ˗PÖ: «˗Zlan ˈnën ˈwɔn ˈˈgbɩɩ˗ ˗nu ˗wɔ kwa ˗ta kö ˈö kwa ˈgüdan.»
-
Kë ˈö˗ wo ꞊dhɛ Yesu ˗yö ˗bhɔ ö Dë ˗bha bhë, ˗a këwɔn ˗nu ˗wa ˗zɔn ˗kɔ ˗kë ꞊dhɛ ꞊dhɛ Zoova ˈyaa kwa ˈgüdan ˈwɔn ˈˈgbɩɩ˗ ˗nu ˈka?
˗A ˈDHƐ TO KWA ˈˈƝAAN
Zoova waa mɛnbhɩɩdhe ˗nu ˗dhɔ ˗yö Yesu ˗kë. Kë ˈö˗ wo ꞊dhɛ Yesu ˗yö ˗bhɔ ö Dë Zoova ˗bha ˈkpakpadhö bhë, kö ˈkwa˗ dɔ ˗së ˈka kwa ˗dho Zoova dɔ ˗së ˈka ˈpö.
˗Zobuödhe
-
Kwa ˗dho ˗a ˗zɔn ꞊dhɛ Zoova ˗dhɔ ˗yö kwa ˗kë ꞊dhɛ Yesu ˈdhö ˗kɔ ˗kë ꞊dhɛ?
-
Kwa ˗dho ˗a ˗zɔn ꞊dhɛ mɛnbhɩɩdhe ˗nu ˗dhɔ ˗yö kwa ˗kë ꞊dhɛ Yesu ˈdhö ˗kɔ ˗kë ꞊dhɛ?
-
Yesu ˗bha ˈˈklʋʋsë ˗mɛɛn ˈö˗ ˗dhɔ ˗yö ü ˗kë?
˗AN ˗GA ˈPÖ
Yesu ˗bha ˈˈklʋʋsë ˈbhaa ˗nu ˈö ˈkwa ꞊mɔɔn˗ ˗bha ˈkwa ʒiö ˗an ˈˈpiʋ̈, ˗an ˗ga.
˗Kɔ ˈö Yesu ˗duɛɛ ˈdhö ꞊bhlëësü ˗a ˈka kwa ˗bha bhɛɛwo ˈgü, ˗a ˗ga.
«ˈMën ˗kë ˈö ˈkwa ˗dho bhɛɛˈˈ ˗Zlan ˗dhɛ Yesu ˈtɔ ˈgü?» (˗Kwɛ 2008 Fevlie 1 ˗bha ˈˈGlaadhiʋ̈ ˗tɔn)
˗Mën ˈö Biblö ˗ya ꞊blɛɛ Yesu ˗dhü ˗bha?
˗Gleŋ ˗mɛɛn ˈö ˈkwa˗ sü ˗kɔ ˈö Yesu ˗yö dhebɔ ˗nu kun ˗a ˈka, ˗a ˗bha?
