ZANNOO 17

Wala Ka Yezu Waa?

ŊMƐ

Wala Ka Yezu Waa?

Ka te naŋ wa zanne yɛlɛ na Yezu naŋ da yel a kyɛ e saŋa na oŋ be a teŋɛzuŋ na, a maŋ vɛmeŋ teŋ nyɛ gyog-sonne na oŋ da taa na, a gyog-sonne ŋa maŋ toɔ̃ soŋ teŋ teŋ tage peɛle Yezu ane o Saa Jehoova. Bo gyog-sonne la ka Yezu da taa? Wala teŋ na baŋ e tɔglɔ Yezu gyog-sonne na te zemmo poɔŋ?

1. Sobuo ka Yezu da maŋ tu kyɛ tɔglɔ o Saa gyogri na?

A yuoŋ turituri na zaa Yezu naŋ da be sazuŋ na, o da maŋ kaarɛɛ lɛ na o Saa naŋ taa nɔmmo naŋ da maŋ erɛ o yɛlɛ, a kyɛ zanna yɛlɛ yire o zieŋ. Azuŋ, Yezu maŋ teɛrɛɛ yɛlɛ a kyɛ erɛ yɛlɛ aŋa o Saa. (Kanne Gyɔɔn 5:19.) Yezu da tɔglɛɛ o Saa gyogri na soŋ zaa ka lɛ vɛŋ oŋ gba da yelka: “Neɛ na zaa naŋ nyɛ ma nyɛ la a Saa.” (Gyɔɔn 14:9) Ka hooŋ zanne baŋ Yezu gyog-sonne na yɛlɛ soŋ, ho na wa baŋɛɛ Jehoova meŋ soŋ. Aŋa mannoo poɔŋ, lɛ na Yezu naŋ da maŋ wulo nyonono korɔ noba na wulee lɛ Jehoova naŋ taa nyonono a ko bo.

2. Wala ka Yezu da e a wuli ka o nɔnɔ la Jehoova?

Yezu yeleeŋ ka: “Kyɛ N erɛ la lɛ N Saa naŋ eŋ noɔre ko ma ka ka a teŋɛzu noba na baŋ ka N nɔŋ la a Saa.” (Gyɔɔn 14:31) Saŋa na Yezu naŋ da be a teŋɛzuŋ na, o da wulee nɔmmo naŋ e kpoŋ a ko o Saa saŋa na oŋ da maŋ sagra o Saa noɔre na. Yezu da maŋ erɛɛ yɛlɛ naŋ pɛlɛ Jehoova poɔ, haali saŋa na aŋ e kpeɛŋaa ko o gba. Yezu da maŋ mannɛɛ o Saa yɛlɛ korɔ noba, a kyɛ boɔrɔ ka o soŋ ba ka ba wa e o Saa zɔmenne meŋ.—Gyɔɔn 14:23.

3. Wala ka Yezu da e a wuli ka o nɔnɔ la noba?

A Baabole yeleeŋ ka Yezu “nimipɛl daaŋ be la nensaaleba eŋɛŋ.” (Yeng Yelibie 8:31) Yezu da maŋ wulee a nɔmmo ŋa saŋa na oŋ da maŋ eŋnɛ noba faŋa a kyɛ yi o poɔ zaa a sonnɔ noba na. Toŋseɛlɛ na Yezu naŋ da toŋ na da ba wulo o kpeɛ̃o yoŋ, kyɛ a da lɛ wulee o nyonono meŋ. (Marko 1:40-42) Yezu da taaɛ nimimaaroŋ a ko noba, o da ba wɛlɛ noba meŋ. O yelyaga da maŋ dii la sukyiri sonne deme sukyie a kyɛ lɛ ko ba tamaa meŋ. Nɔmmo na Yezu naŋ da taa ko nensaaleba na da vɛŋɛɛŋ oŋ yi o poɔ zaa a di dɔgɛɛ, a kyɛ kpi ko nensaaleba meŋ. Yezu taaɛ nɔmmo naŋ e zuluŋ a ko noba naŋ de o wuluu na tonɔ neŋ toma.—Kanne Gyɔɔn 15:13, 14.

ZANNE YƐLƐ YAGA POƆ

Ho na zanne nyɛɛ gyogri na Yezu naŋ da taa. A kyɛ lɛ zanne nyɛ lɛ hoŋ meŋ na baŋ tɔgloo a wulo noba nɔmmo a kyɛ yuoro ho nu a terɛ boma meŋ.

4. Yezu nɔnɔ la o Saa

Yezu wuli teŋ lɛ teŋ na baŋ e a wuli ka te nɔnɔ la Naaŋmen. Kanne Luka 6:12 ane Gyɔɔn 15:10; 17:26. Ka hooŋ wa kanne a sɛgre kaŋa zaa baare, yɛ gyieli a soorebiri naŋ tu na yɛlɛ:

Sobuo teŋ na baŋ tu kyɛ tɔgle Yezu a wuli ka te nɔnɔ la Jehoova?

Yezu nɔŋ la o Saa naŋ be sazuŋ, azuŋ o da maŋ bɔɛ wagre a yele yɛlɛ koroo puoro poɔŋ wagre zaa

5. Yezu da taaɛ noba naŋ be awonaa poɔŋ yɛlɛ

Yezu da maŋ teɛrɛɛ noba yelfɛree yɛlɛ a gaŋ o meŋɛ yelfɛree yɛlɛ. Haali saŋa na oŋ da maŋ bale gba, kyɛ o da maŋ de la o wagre neŋ o faŋa sonnɔ noba. Kanne Marko 6:30-44, a kyɛ gyieli a soorebie naŋ tu na yɛlɛ:

A yi a sɛgre ŋa poɔŋ, bo yɛlɛ mine la ka Yezu da e a wuli ka o taaɛ noba yɛlɛŋ?—Kaa o wɛlbo 31, 34, 41, ane 42 na.
Bonso ka Yezu da maŋ boɔrɔ ka o sonnɔ noba?—Kaa o wɛlbo 34 na.
Yezu da tɔglɛɛ Jehoova gyogri, azuŋ bo ka a yɛlɛ ŋa zaa wulo bo a kyaare Jehoova?
Wala teŋ meŋ na baŋ e a tɔglɔ Yezu a meŋ taa noba yɛlɛŋ?

6. Yezu da maŋ yuoree o nu a terɛ boma

Aneazaa ka Yezu da ba taa bontaree yaga kyɛ o da maŋ yuoree o nu a korɔ noba boma. O da maŋ eŋnɛɛ noba faŋa ka ba meŋ yuoro ba nu. Kanne Toma 20:35, a kyɛ gyieli a soorebiri naŋ tu na yɛlɛ:

Yezu yeleeŋ ka boŋ aŋ seŋ ka te e a toɔ̃ taa popeɛloŋ?

Ŋmɛ a VIDIO, a kyɛ gyieli a soorebiri naŋ tu na yɛlɛ.

VIDIO: “A E La Maaloo Yaga Ka Ho Terɛ”—Vidio Kyɛlee (4:00)

Ka te naŋ ba taa bontaree yaga gba, kyɛ sobuo teŋ na baŋ yuoro te nu a terɛ boma?

Ho da baŋɛɛŋ?

A Baabole wuli teŋ ka te maŋ tu Yezu yuori eŋɛŋ a kyɛ puore ko Jehoova. (Kanne Gyɔɔn 16:23, 24.) Ka te naŋ maŋ tu a lɛ sori ŋa poɔŋ kyɛ puoro korɔ Naaŋmen, lɛ na wuliŋ ka te nimiri paalɛɛ yɛlɛ na Yezu naŋ e a soŋ te teŋ wa e Jehoova zɔmenne na.

NOBA MINE MAŊ YELEŊ KA: “Dɔgɛɛ ŋa zaa teŋ dire ŋa yɛlɛ ba fɛrɛ Naaŋmen.”