JOKWA 17

Njika pat’a moto Yesu eno̱ e?

OKA

Joko te̱ o bia nje Yesu a kwalino̱, a bolino̱ pe̱ ke̱ e o wase, di maso̱ ná a be̱n bede̱mo be mabole̱ biso̱ ńo̱ngi o be̱ diko̱m lao na la Sango ao Yehova. Be bede̱mo be nde njika mo̱ e? Ne̱ni pe̱ jeno̱ ná jembilane̱ Yesu o longe̱ lasu e?

1. O njika mbadi Yesu eno̱ ka Sango ao e?

O mo̱ń, Yesu ombo Sango ao ńa ndolo, okwa pe̱ o mbasan mao lokoli la lodun la mimbu. Nik’e boli ná a madutea, a masenga, a mabola pe̱ mambo ka mo̱. (Langa Yohane 5:19.) Yesu embilane̱ bede̱mo ba Sango ao bwam kańena a kwali ná: “Nu ńe̱n mba e̱n nde Tete̱.” (Yohane 14:9) Woko te̱ o bia bede̱mo ba Yesu, o me̱nde̱ bata bia Yehova. K’eyembilan, ndedi Yesu a lee̱le̱no̱ bato e malee̱ ná Yehova a mombwea wa na mbale̱.

2. Ne̱ni Yesu a lee̱le̱no̱ ná a to̱ndi Yehova e?

Yesu a kwali ná: “E mapula ná wase e bie ná na to̱ndi Tete̱, na mabola pe̱ nde kana Tete̱ anedino̱ mba.” (Yohane 14:31) Ponda a tano̱ o wase, Yesu a lee̱le̱ ndolo ninde̱ne̱ a be̱nedino̱ Sango ao, ebanja a sengane̱ mo̱ to̱ o ponda nika e tano̱ ndutu. Yesu a ta pe̱ a to̱ndo̱ o kwalea ońola Sango ao, na o jongwane̱ bato o timba mako̱m ma Sango ao.—Yohane 14:23.

3. Ne̱ni Yesu a lee̱le̱no̱ ná a to̱ndi bato e?

Bibe̱l e makwala ná Yesu a “bwane̱ pe̱ bonabato muńe̱nge̱.” (Minia 8:31) Ndol’ao ńe̱ne̱ne̱ o mbadi embe̱no̱ bato, ongwane̱ pe̱ babo̱ esibe̱ jengane̱ babo̱ to̱ lambo. A po̱ngi betańsedi bena be lee̱ seto̱ ngiń’ao buka te̱, nde na nded’ao pe̱. (Marko 1:40-42) Ombwedi bato be̱se̱ na muyao esibe̱ ndando to̱ po̱. Byala bao be boli ba milema mi sibi be̱se̱ bena ba sengane̱ mo̱ lo̱ko̱mea na dipita. Yesu emedi o taka na o wo̱ ońola ndolo a be̱nedino̱ bato be̱se̱. Nde a to̱ndi tobotobo ba bena ba mabupe̱ belēdi bao.—Langa Yohane 15:13, 14.

ALA O NJIBA

Bata jokwa o bia bede̱mo ba Yesu. Wombweye pe̱ ne̱ni jeno̱ ná di lee̱le̱ ndolo na sanga la mulema ka mo̱.

4. Yesu a to̱ndi Sango ao

Eyembilan a Yesu e malee̱ biso̱ ne̱ni lee̱le̱ ná di to̱ndi Loba. Langa Lukas 6:12, Yohane 15:10 na 17:26. Ombusa bolanga b’epas’a Bibe̱l te̱, kwalea ońola min myuedi:

Kapo̱ ka Yesu, ne̱ni jeno̱ ná di lee̱le̱ ná di to̱ndi Yehova e?

Yesu a ta a to̱ndo̱ Sango ao ńe o mo̱ń, a ta pe̱ a kwalisane̱ mo̱ o muka ponda ye̱se̱

5. Yesu a mombwea bato ba matake̱

Yesu a ta ombwea bato bape̱pe̱ buka mo̱me̱ne̱. To̱ o ponda a tano̱ a wo̱lo̱, a bolane̱ pond’ao na ngud’ao o jongwane̱ bato. Langa Marko 6:30-44, nde lo kwaleye pe̱ ońola min myuedi:

O min myango, o njika mbadi iwo̱ Yesu a lee̱le̱no̱ ná a mombwea bane̱ e?—Ombwa myemba 31, 34, 41 na 42.
Nje e ta e tute̱le̱ Yesu o jongwane̱ bato e?—Ombwa mwemba 34.
Kana Yesu a membilane̱no̱ nde bede̱mo ba Yehova, nje nika e malee̱no̱ wa jombwea Yehova e?
O njika mbadi iwo̱ jeno̱ ná jembilane̱ mbadi Yesu ombwedino̱ bane̱ e?

6. Yesu a sangi mulema

To̱ná Yesu a si tano̱ a be̱ne̱ myam jita, a ta a sanga mulema; ome̱le̱ pe̱ biso̱ o sanga mulema. Langa Bebolo 20:35, nde lo kwaleye pe̱ ońola min myuedi:

Bupisane̱ Yesu, ne̱ni jeno̱ ná di be̱ bonam e?

Ombwa SINIMA, nde lo kwaleye pe̱ ońola myuedi mi mabupe̱.

SINIMA: “Bola le bonam buka kusa”—Esungu (4:00)

O njika mbadi iwo̱ jeno̱ ná di bola, to̱ e be̱ nde ná di si be̱n bekusedi jita e?

Mo̱ o ta o bia nika e?

Bibe̱l e malee̱ biso̱ ná di kane̱ nde Yehova o dina la Yesu. (Langa Yohane 16:23, 24.) Di makane̱ te̱ o ni mbadi, di malee̱ nde ná di memba nje Yesu a bolino̱ o jongwane̱ biso̱ o timba mako̱m ma Yehova.

BATO BA MAKWALA NÁ: “Bato ba mataka nde ońolana Loba a makekise̱ babo̱.”