NǓKPLƆNKPLƆN 17
Mɛ Alɔkpa Tɛ Jezu ka Nyí?
Nú mǐ kplɔ́n nǔ dó nǔ e Jezu ɖɔ ɖò ayikúngban jí lɛ é kpo nǔ e é wà lɛ é kpo wu ɔ, mǐ nɔ mɔ jijɔ ɖěɖee nɔ dɔn mǐ sɛkpɔ́ é kpo Tɔ́ tɔn Jehovah kpo lɛ é. Jijɔ tɛ lɛ mɔ̌ ka wɛ? Nɛ̌ mǐ ka sixu wà nǔ Jezu ɖɔhun ɖò gbɛzán mǐɖesunɔ tɔn mɛ gbɔn?
1. Ali tɛ lɛ nu Jezu ka cí Tɔ́ tɔn ɖɔhun ɖè?
Ðò jixwé ɔ, Jezu ko kpɔ́n Tɔ́ tɔn wanyiyinɔ ɔ sín nǔwiwa lɛ bo lɛ́ kplɔ́n nǔ ɖò gɔ̌n tɔn nú xwè liva mɔ̌kpan. Wǎgbɔ tɔn ɔ, é nɔ lin nǔ, bo nɔ wà nǔ Tɔ́ tɔn ɖɔhun, bɔ lee nǔ nɔ cí nú Tɔ́ tɔn é nɔ cí mɔ̌ nú é lɔmɔ̌ pɛ́ɛ́. (Xà Jaan 5:19.) Nǔgbo ɔ, Jezu nɔ ɖè jijɔ Tɔ́ tɔn tɔn lɛ xlɛ́ ganji sɔmɔ̌ bo ɖɔ: “Mɛ e mɔ mì ɔ ko mɔ Tɔ́ ɔ.” (Jaan 14:9) Enyi a ɖò nǔ kplɔ́n dó jijɔ Jezu tɔn lɛ wu wɛ ɔ, a na wá tuùn Jehovah ganji. Ði kpɔ́ndéwú ɔ, lee Jezu sè wuvɛ̌ xá mɛ lɛ gbɔn é xlɛ́ ɖɔ nǔ towe nɔ ɖu ayi mɛ nú Jehovah tawun.
2. Nɛ̌ Jezu ka xlɛ́ ɖɔ emi yí wǎn nú Jehovah gbɔn?
Jezu ɖɔ: “Nú gbɛtɔ́ lɛ na dó tuùn ɖɔ un yí wǎn nú Tɔ́ ɔ, un na wà nǔ lee Tɔ́ ɔ zɔ́n mì gbɔn é.” (Jaan 14:31) Hwenu e Jezu ɖò ayikúngban jí é ɔ, é ɖè wanyiyi ɖaxó e é ɖó nú Tɔ́ tɔn é xlɛ́ gbɔn tónúsíse n’i gblamɛ, é tlɛ nyí hwenu e mɔ̌ biblo vɛwǔ é ɔ nɛ. Jezu lɛ́vɔ yí wǎn nú Tɔ́ tɔn sín xó ɖiɖɔ nú mɛ ɖevo lɛ kpo alɔdidó ye bonu ye na tɛ́n kpɔ́n bo zun xɔ́ntɔn xá Tɔ́ tɔn kpo.—Jaan 14:23.
3. Nɛ̌ Jezu ka xlɛ́ ɖɔ emi yí wǎn nú gbɛtɔ́ lɛ gbɔn?
Biblu ɖɔ dó Jezu wu ɖɔ “gbɛtɔ́ lɛ wu wɛ xomɛ nɔ hun [i] dó tawun.” (Nǔnywɛxó 8:31, nwt, tinmɛ e ɖò dò é) É ɖè wanyiyi tɔn xlɛ́ gbɔn wusyɛn dídó lanmɛ nú mɛ lɛ kpo alɔdidó ye cejɛnnabi mɛvo kpo gblamɛ. É bló nǔjiwǔ ɖěɖee xlɛ́ ɖɔ é ɖó hlɔnhlɔn bo nɔ lɛ́ sè wuvɛ̌ xá mɛ lɛ é. (Maki 1:40-42) É wà nǔ xá mɛ lɛ kpo xomɛnyínyɔ́ kpo, bo lɛ́ ɖè mɛɖé ɖó vo ɖò mɛɖé mɛ ǎ. Xó tɔn lɛ dó gbɔ nú ayijlɔjlɔnɔ e nɔ ɖótó è lɛ é, bo lɛ́ na ye nukúnɖiɖó. Ðó Jezu yí wǎn nú gbɛtɔ́ lɛ bǐ wutu ɔ, é sɔ́ jlǒ dó jiya bo kú dó ta yetɔn mɛ. Amɔ̌, mɛ ɖěɖee nɔ xwedó nǔkplɔnmɛ tɔn lɛ é wɛ é nɔ yí wǎn na hugǎn.—Xà Jaan 15:13, 14.
BA DÒ NÚ NǓ D’EJI
Kplɔ́n nǔ dó jijɔ Jezu tɔn lɛ wu d’eji. Lɛ̌ ba dò nú lee a na nɔ ɖè wanyiyi kpo alɔhundónanǔmɛ kpo xlɛ́ Jezu ɖɔhun gbɔn é.
4. Jezu yí wǎn nú Tɔ́ Tɔn
Kpɔ́ndéwú Jezu tɔn kplɔ́n mǐ lee mǐ sixu ɖè wanyiyi e mǐ ɖó nú Mawu é xlɛ́ gbɔn é. Xà Luki 6:12 kpo Jaan 15:10; 17:26 kpo. Nú a xà wemafɔ lɛ ɖokpo ɖokpo gudo hǔn, mi ɖɔ xó ɖó kpɔ́ dó nǔkanbyɔ elɔ jí:
-
Nɛ̌ mǐ ka sixu xlɛ́ ɖɔ mǐ yí wǎn nú Jehovah Jezu ɖɔhun gbɔn?
Jezu yí wǎn nú Tɔ́ tɔn jixwé tɔn ɔ bo nɔ ɖɔ xó n’i hwɛhwɛ ɖò ɖɛ mɛ
5. Mɛ e ɖò hudo mɛ lɛ é sín nǔ nɔ ɖu ayi mɛ nú Jezu
Hudo mɛ ɖevo lɛ tɔn sín dò súsú mya nukún nú Jezu hú éɖesunɔ tɔn lɛ. Hwenu e nǔ tlɛ cikɔ n’i é ɔ, é zán táan tɔn kpo hlɔnhlɔn tɔn kpo dó d’alɔ mɛ ɖevo lɛ. Xà Maki 6:30-44, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
-
Ali tɛ lɛ nu mɔ̌ Jezu ka xlɛ́ ɖɔ mɛ ɖevo lɛ sín nǔ ɖu ayi mɛ nú emi ɖè bɔ tan enɛ ɖexlɛ́?—Kpɔ́n wemafɔ 31, 34, 41, kpo 42 kpo.
-
Etɛ ka sísɛ́ Jezu bɔ é d’alɔ mɛ ɖevo lɛ?—Kpɔ́n wemafɔ 34.
-
Ðó Jezu nɔ ɖè jijɔ Jehovah tɔn lɛ xlɛ́ wutu ɔ, etɛ nǔ enɛ lɛ bǐ ka kplɔ́n we dó Jehovah wu?
-
Ali tɛ lɛ nu mɔ̌ mǐ ka sixu xwedó lee mɛ ɖevo lɛ sín nǔ nɔ ɖu ayi mɛ nú Jezu gbɔn é sín kpɔ́ndéwú ɖè?
6. Jezu nɔ hun alɔ dó na nǔ mɛ
Jezu ɖó nǔ agbaza tɔn gegě ǎ có, é nɔ hun alɔ dó na nǔ mɛ. É dó wusyɛn lanmɛ nú mǐ ɖɔ mǐ lɔ ni nɔ hun alɔ dó na nǔ mɛ. Xà Mɛsɛ́dó 20:35, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
-
Nɛ̌ mǐ ka sixu ɖó awǎjijɛ gbɔn bɔ Jezu ɖɔ?
Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.
-
Enyi mǐ ma tlɛ ɖó nǔ kaka ɖé ǎ ɔ, ali tɛ lɛ nu mɔ̌ mǐ ka sixu nɔ na nǔ mɛ ɖè?
A ka tuùn à?
Biblu kplɔ́n mǐ ɖɔ mǐ ni nɔ xoɖɛ sɛ́dó Jehovah ɖò Jezu nyikɔ mɛ. (Xà Jaan 16:23, 24.) Enyi mǐ xoɖɛ gbɔn mɔ̌ ɔ, é nɔ xlɛ́ ɖɔ nǔ e Jezu wà dó d’alɔ mǐ bɔ mǐ huzu xɔ́ntɔn Jehovah tɔn lɛ é sù nukún mǐtɔn mɛ.
MƐÐÉ LƐ ÐƆ: “Wuvɛ̌ mǐtɔn lɛ nɔ ɖɔ nǔɖe nú Mawu ǎ.”
-
Ðó Jezu nɔ ɖè jijɔ Tɔ́ tɔn tɔn lɛ xlɛ́ wutu ɔ, nɛ̌ nǔwiwa tɔn lɛ ka ɖexlɛ́ ɖɔ nǔ mǐtɔn nɔ ɖu ayi mɛ nú Jehovah gbɔn?
ETƐ LƐ A KA KPLƆ́N?
Jezu yí wǎn nú Jehovah, bo lɛ́ yí wǎn nú gbɛtɔ́ lɛ. Ðó Jezu cí Tɔ́ tɔn ɖɔhun wutu ɔ, bǎ e mɛ a tɛ́n kpɔ́n bo tuùn Jezu yì ɖó é ɔ, bǎ enɛ mɛ wɛ a na tuùn Jehovah yì ɖó.
Vɔ̌gbɔnji
-
Nɛ̌ mǐ ka sixu xlɛ́ ɖɔ mǐ yí wǎn nú Jehovah Jezu ɖɔhun gbɔn?
-
Nɛ̌ mǐ ka sixu xlɛ́ ɖɔ mǐ yí wǎn nú gbɛtɔ́ lɛ Jezu ɖɔhun gbɔn?
-
Jijɔ Jezu tɔn tɛ a ka yí wǎn na hugǎn?
KÍJÉ
Ba dò nú jijɔ Jezu tɔn e mǐ sixu xwedó é ɖé lɛ.
“Bonu A Na Wà Nǔ Jezu Ðɔhun Hǔn, . . .” (Jezu: Ali ɔ, Nǔgbo ɔ, Gbɛ̀ Ɔ, wexwɛ 317)
Kpɔ́n nǔ e wu mǐ ɖó na nɔ xoɖɛ ɖò Jezu nyikɔ mɛ é.
“Etɛwu Mǐ ka Ðó Na Nɔ Xoɖɛ Ðò Jezu Nyikɔ Mɛ?” (Atɔxwɛ [Flansegbe] 1er février 2008)
Biblu ka ɖɔ nǔɖe dó lee Jezu cí é wu à?
Etɛ lee Jezu wà nǔ xá nyɔnu lɛ gbɔn é ka sixu kplɔ́n mǐ?
“Mawu Nɔ Ðó Sísí nú Nyɔnu lɛ Bo Nɔ Lɛ́ Wlí Yɛ̌yi nú Ye” (Atɔxwɛ [Gungbe] 1er octobre 2012)
Xóta élɔ́ lɛ́ lɔ sixú jɛjí nú we
NǓ E MƐ LƐ́ NƆ YÁ WǓ KANBYƆ́ LƐ́ É
Nɛ̌ tuto Biblu kplɔ́nkplɔ́n tɔn e Kúnnuɖetɔ́ Jehovah tɔn lɛ́ nɔ xwlé mɛ é ka nɔ yi gbɔn?
Kpó Biblu kplɔ́nkplɔ́n vɔ̌nu sín tuto e Kúnnuɖetɔ́ Jehovah tɔn lɛ́ nɔ xwlé mɛ é kpó ɔ, a sixú zán lǐlɛ́dógbeɖévomɛ Biblu tɔn ɖěbǔ. A vo bó ná ylɔ́ xwédo towe blěbú alǒ xɔ́ntɔn towe lɛ́ ɖěbǔ bɔ yě ná gɔ́ nú we.
