17 NU GÈ NÒ
Mó Íb Nen Ní E Jíízọ̀s Dú É?
Tṍó e nóò nú ea kil ló gbò bel e Jíízọ̀s beè lò nè gbò nú ea beè naa tṍó ea beè di boo kunukẽ̀í, è monì gbò kpãá ea náa kọ é tõo bã ló a Tẹ̀, Jìhóvà, nè ẹ̀ẹ̀. Mókà gbò lé kpãa ní e Jíízọ̀s beè ié é? Vaá mósĩ́ deè ní eé láá nóe ẽ́?
1. Mósĩ́ deè ní e Jíízọ̀s bélí a Tẹ̀ ẹ?
Jíízọ̀s a tú gã́bug dẹ̀ gbáá noomá nú ea kil ló a Tẹ̀ gbẹá káála. Vó gbóó naa kọ á bugi togó, ié tọa ló, vaá labví láb belí a Tẹ̀. (Bugi Jọ́ọ̀n 5:19.) Mm̀ kà kà, Jíízọ̀s beè palàge nó gbò kpãà a Tẹ̀ naa ní ea kọ́ọ̀: “Nen ea ni mon nda a mon Tẹ̀.” (Jọ́ọ̀n 14:9) Tṍó eo gé nó nú ea kil ló íb nen e Jíízọ̀s dú, òé palàge nyimá ló Jìhóvà. Dì belí nu dòòmà bá, tóè sàn e Jíízọ̀s íe kilma ló gbò nen zógè bé e Jìhóvà ólò ẹ̀b nú ea kil ní ló naa.
2. Mósĩ́ deè ní e Jíízọ̀s zógè kọ à vulèè Jìhóvà ẹ?
Jíízọ̀s beè kọọ̀: “Sõò bàlà boo é íè ge nyimá kọ nda vulè nà Tẹ̀. Vó ní ea kọ́ ḿ naa kọ̀láá bé e nà Tẹ̀ beè lẹ̀ẹ̀làm naa ẽ́.” (Jọ́ọ̀n 14:31) Tṍó e Jíízọ̀s beè di boo kunukẽ̀í, a beè zogè kọọ̀ à palàge vulèè a Tẹ̀ tení dú ló gè gbànie tṍ ló, kọbèè tṍó ea beè tàvàlàẹ́ ló gè naa vó. A beè leemá nágé Jíízọ̀s gè kọ́ nú ea kil ló a Tẹ̀, vaá nvèè bá nè dõòna gbò kọ bàá dú a kóò.—Jọ́ọ̀n 14:23.
3. Mósĩ́ deè ní e Jíízọ̀s zógè kọ à vulèè gbò nen ẽ́?
Kpá Káí kọ́ọ̀ Jíízọ̀s beè “palàge ié lèèmá mm̀ gbò nen.” (Próvẹẹ̀b 8:31) A beè zogè kọ à vulèè gbò nen, tení dú ló gè siè va kpóó ló vaá nvèè bá nèva. Gbò tóm dũ̀ùnè ea beè sì zógè kọọ̀ à íe tóè sàn, níì áá kpóó nì. (Máàk 1:40-42) A beè tú lé bá faamá gbò nen vaá náa beè sà sĩ́ nen. A beè ló gbò bel nvèè nyíé gbàà vaá naa kọọ̀ gbò e bà pãanée tṍ ló á ié ból dẽesĩ́. Jíízọ̀s beè di kpènà ló gè mòn tã̀àgã̀ vaá ù, boo béè bé ea vulè gbò nen naa. Sõò a beè palàge vulè gbò e bà tú a nòòmànù siimá tóm.—Bugi Jọ́ọ̀n 15:13, 14.
KPÁÁ NÓ BỌ̀Ọ̀VẸ̀
Kpáá nó nú ea kil ló íb nen e Jíízọ̀s dú. Vaá ò bugi togó boo bé eo é láá ié vulè vaá dõo nu belí Jíízọ̀s naa.
4. Jíízọ̀s vulè a Tẹ̀
Nu dòòmà bá Jíízọ̀s nóòmài bé eé láá zogè kọ è vulèè Bàrì naa. Bugi Lúùk 6:12 nè Jọ́ọ̀n 15:10; 17:26. Tṍó eo ni bugi buù kà dọ̀ Kpá Káíí lọ̀l, ò gbóó aalai nakà bíbví:
-
Mósĩ́ deè ní eé láá nó Jíízọ̀s vaá zogè kọ è vulèè Jìhóvà ẹ?
Jíízọ̀s vulè a Tẹ̀ ea di káála vaá a beè tã̀àgã̀é ló lee
5. Jíízọ̀s ólò bùlà nú ea kil ló gbò e bíi di ló
Jíízọ̀s ólò palàge bùlà nú ea kil ló dõòna gbò èlmà a bá. Kọbèè tṍó e lóóe ọọ, a beè tú a tṍó nè kói nvèèmà bá nè dõòna gbò. Bugi Máàk 6:30-44, vaá ò gbóó aalai gbò bíbví:
-
Dẹ̀ẹ̀a boo dọ̀ Kpá Káíí, mókà gbò sĩ́deè ní e Jíízọ̀s zógè kọ à bulàẹ̀ nú ea kil ló dõòna gbò e?—Ẹ̀b 31, 34, 41, nè 42 gã́bel.
-
Éé ní ea beè naa kọọ̀ Jíízọ̀s á nvèè bá nè gbò nen ẽ́?—Ẹ̀b 34 gã́bel.
-
Éé ní e gè kọọ̀ Jíízọ̀s nó gbò kpãà a Tẹ̀ nóòmà ni kilma ló Jìhóvà ẹ?
-
Mókà gbò sĩ́deè ní eé láá nó bé e Jíízọ̀s beè bùlà nú ea kil ló dõòna gbò naa ẽ́?
6. Jíízọ̀s ólò dõo nu
Náa kal ló béè kọọ̀ Jíízọ̀s náa beè íe gã́bug nu, a beè dõo nú ea ié, vaá sièi kpóó ló kọ é naa nagé vó. Bugi Tóm 20:35, vaá ò gbóó aalai nakà bíbví:
-
Dẹ̀ẹ̀a boo nú e Jíízọ̀s kọ́, éé ní ea é láá naa kọ é ié ẹ́ẹ́-ẹẹ̀ nyíe ẽ́?
Bìlà VÍDIÒÍ, vaá ò gbóó aalai bíb ea nyoone.
-
Mókà gbò sĩ́deè ní eé láá dõo nu, kọbèè née íè gã́bug nu ẽ́?
O beè nyimá gé?
Kpá Káí nóòmài kọ é tã̀àgã ló Jìhóvà tení dú ló béè Jíízọ̀s. (Bugi Jọ́ọ̀n 16:23, 24.) Tṍó e tãàgã ló Bàrì naa vó, è zógè kọọ̀ nyíéi ẹ́ẹ́ ló nú e Jíízọ̀s ni náa kọbé è láá dú kóò Jìhóvà.
SÌGÀ GBÒ KỌ́Ọ̀: “Bàrì náa ólò bùlà nú ea kilíí ló tṍó e gé mon tã̀àgã̀.”
-
Tã́gíní bé e Jíízọ̀s íe gbò kpãá ea Tẹ̀ íeá, mósĩ́ deè ní ea láb zógè kọọ̀ Jìhóvà ólò bùlà nú ea kilíí ló é?
NÚ E NI NÓ
Jíízọ̀s vulè Jìhóvà, vaá à vulè nàgé gbò nen. Tã́gíní bé e Jíízọ̀s belí a Tẹ̀a, bé eo nóò nú ea kilíé ló naa, níà bé eo é palàge nyimá ló Jìhóvà naa ẽ́.
Ge Òòa Boo
-
Mósĩ́ deè ní eé láá zogè kọọ̀ è vulèè Jìhóvà belí Jíízọ̀s e?
-
Mósĩ́ deè ní eé láá zogè kọọ̀ è vulèè gbò nen belí Jíízọ̀s e?
-
Mókà gbò kpãà Jíízọ̀s ní ea palàge leemá ni ẽ́?
KPÁÁ GBĨ́ TẼ́ LÓ
Bugi togó boo gbò kpãà Jíízọ̀s eé láá nò.
“To Imitate Jesus, Be . . . ” (Jesus—The Way, the Truth, the Life, 317 náásĩ́)
Nyimá nú ea náa vaá à dú bíi kọ é tã̀àgã ló Bàrì tení dú ló béè Jíízọ̀s.
“Why Pray in Jesus’ Name?” (Kpá Tọ Kùdẽe Ló, February 1, 2008)
É kọọ̀ Kpá Káí kọ́ nú ea kil ló bé e Jíízọ̀s meà naa?
Éé ní eé láá nó lọl ló bá e Jíízọ̀s beè sẹ̀ẹ̀mà gbò bia ẹ́?
“Respect and Dignity Under God’s Care” (Kpá Tọ Kùdẽe Ló, September 1, 2012)
