KUKWE JA TÖTIKARA 17
¿Jesús ye ja ngwen ño?
Jesús kukwe niebare aune kukwe nuainbare kä tibienbätä ye tä nemen gare nie ngwane, niarata ja ngwen ño ye tä ni krötö bäri niara aune Rün kwe Jehová ye ken. ¿Töi kwin ye meden meden? ¿Aune ni raba dre nuainne ja ngwankäre niara erere?
1. ¿Kukwe medenbätä Jesús ja erebe Rün kwe ben?
Kä millón kwati krubäte te Jesuta kä kwinbiti ja kite Rün kwe ja tarekä yebätä. Yebätä tä töbike, tä ja ngwen aune jata nemen ruin ño Rün ie ye erere jata nemen ruin ie arato (mäkwe ñäkä Juan 5:19 yebätä). Jesuta ja ngwen Rün erere aisete niebare kwe: “Nire nire käta ti tuen, ye abko tä ti Rün tuen arato” (Juan 14:9). Jesús rabai gare bäri kwin mäi ngwane, Jehová rabai gare bäri kwin mäi. Jesús nämäne ni mada mike tuin bobre jai, ye tä bämike Jehová töita ño mä kräke.
2. ¿Jesús nämäne Rün tarere ye bämikani ño kwe?
Jesukwe niebare: “Tita ti Rün tarere rabadre gare nitre kä nete ie gäre, jändrän nuain mananta ti Rünkwe tie, tita nuainne” (Juan 14:31, Ngöbö Täräe [NGT], tärä okwä ükaninte). Jesús nämäne kä tibienbätä ngwane, Rün mikani täte kwe kukwe tare jökräbiti ta, yebiti bämikani kwe nämäne Rün tarere krubäte. Ne madakäre, Jesús nämäne blite Rün kwebätä ye käi nämäne nuärebätä aune nämäne nitre mada dimike nemen ja ketamuko Ngöbökwe (Juan 14:23).
3. ¿Jesús tä ni tarere ye bämikani ño kwe?
Jesuta “nitre kä nebätä ye tarere krubäte” nieta Bibliakwe (Proverbios 8:31). Nitre töi mikani jäme kwe aune dimikani kwe, akwa ñaka jondron ngübabare kwe ütiäre yebiti ja tare ye bämikani kwe. Kukwe ñan tuabare nuainbare kwe yebiti dite bämikani kwe aune ni nämäne tuin bobre ie bämikani kwe (Marcos 1:40-42). Töi nämäne jäme aune nämäne nitre kain ngäbiti ja erebe. Kukwe nie nämäne kwe yebiti, nämäne nitre brukwä kwin mike tö ngwen aune töi mike jäme. Ne madakäre, ni tare kwe yebätä namani juto ja tare nikakäre aune ja nire kwe biankäre ni jökrä kräke, akwa kukwe driebare kwe ye nire tä ja di ngwen mike täte ye bäri tare kwe (mäkwe ñäkä Juan 15:13, 14 yebätä).
JA TÖTIKE BÄRI NGUSETA
Jesús ja ngwani ño ye ani mike gare bäri jai aune ni tare kwe aune ja ngwani mantiame kwe erere ni raba nuainne ño ye ani mike gare jai.
4. Jesukwe Rün tare
Ngöbö tare nikwe ye ni raba bämike ño ie, ye Jesukwe bämikani ni käne. Ñäkädre Lucas 6:12, Juan 15:10 aune 17:26 yebätä aune kukwe ne kädriedre jabe:
-
Jesukwe kukwe nuainbare ye ben töbätä, ¿Jehová tare nikwe ye ni raba bämike ño?
Jesús nämäne Rün kwe kä kwinbiti tarere aune käre nämäne orare ie.
5. Nitre tä ja di ribere yebätä Jesús töita
Jesús töi nämäne bäri ni madabätä. Nämäne nainte, akwa yebiti ta nämäne ja di ngwen ni mada dimikakäre. Ñäkädre Marcos 6:30-44 yebätä aune kukwe ne kädriedre jabe:
-
Kukwe nieta nete erere, ¿Jesús töi nämäne ni madabätä bämikani ño kwe? (Bersikulo 31, 34, 41 aune 42 mikadre ñärärä).
-
¿Ñobätä Jesukwe nitre ye dimikani? (Bersikulo 34 mikadre ñärärä).
-
Jesuta ja ngwen Rün erere, ¿ye tä dre driere Jehovabätä mäi?
-
¿Jesús töi nämäne ni madabätä ye erere ni raba ja töi mike ño ni madabätä?
6. Jesús mantiame
Jondron nämäne braibe Jesukwe akwa ja ngwani mantiame kwe ye erere tä ni nübaire nuainne. Ñäkädre Hechos 20:35 yebätä aune kukwe ne kädriedre jabe:
-
Jesús kukwe niebare erere, ¿dreta kä mike juto nibätä?
VIDEO mikadre ñärärä, biti kukwe ne kädriedre jabe:
-
Ni bobre akwa, ¿ni raba dre nuainne ni mada kräke?
¿Ne gare mäi?
Nikwe oradre Jehovai Jesús käbiti drieta Bibliakwe (ñäkädre Juan 16:23, 24 yebätä). Ye erere nita nuainne ngwane, Jesús tä ni dimike nemen ja ketamuko Jehovakwe ye ütiäte ni kräke nita bämike.
NITRE RUÄRE TÄ KUKWE NE NIERE: “Ja tare nikata ye Ngöbö ñaka töibikaire”.
-
Jesuta ja ngwen Rün erere aisete, ¿ni ütiäte Jehová kräke ye bämikani ño kwe?
¿DRE NIBI GARE MÄI?
Jesuta Jehová tare aune ni tare kwe arato. Jesuta ja ngwen Rün erere, aisete niara rabai gare bäri mäi ngwane, Jehová rabai gare bäri kwin mäi.
Ngwankäreta törö
-
Jesuta Jehová tarere erere, ¿nita Jehová tarere ni raba bämike ño?
-
Jesús nämäne nitre tarere erere, ¿nita nitre tarere ni raba bämike ño?
-
Jesús ja töi keta kabre kwin bämikani, ¿ye meden bäri tuin kwin mäi?
KUKWE MIKE GARE BÄRI JAI
Jesús kukwe kwin bämikani ye erere mä raba nuainne ye mike gare jai.
“Ja ngwandre Jesús erere” (Jesús ye: ji, kukwe metre aune ja nire, página 317)
Ñobätä ütiäte nikwe oradre Jesús käbiti ye mike gare jai.
“¿Ñobätä oradre Jesús käbiti?” (Ni Mikaka Mokre, 1 febrero 2008)
¿Jesús bä ño ye Biblia tä mike gare?
¿Jesús meritre mikani ütiäte jai ye tä dre driere nie?
“Meri ütiäte Ngöbö kräke” (Ni Mikaka Mokre, 1 septiembre 2012)
Ne rabai tuen kwin mäi arato
KUKWE NGWANTARITA BÄRI
¿Ja tötika Bibliabätä drieta ni testiko Jehovakwe ye abokän ño?
Ni testiko Jehovakwe tä ni tötike ye ütiä kärä ñaka aune mä raba ja tötike Biblia jeñe mäkwe yebiti. Ne madakäre mä raba mä mräkä jökrä o ja ketamuko ye nübaire jabe ja tötike.
