ANG ỌJẸ́JẸ 17

Ọngịnyị Ọlanyị IJisọsị à Tị́ Ri?

Jaabwọ kahị wẹẹ jẹ́ ang u-uhye nya ẹla ịlẹ ká iJisọsị ya bala ọhọhọ ụka kọ jam odehe, ahị kaa yẹ abwẹla ịlẹ kị ka tụ́ụhị jwoo ọwa bala iJihova Adamwụ chwẹẹ. Ịyẹ à tị́ ri abwẹla ịhyẹ ịlẹ ká iJisọsị la? Ányị ahị tị́ ka bwu gbịla iJisọsị ọ-ọhịhị nyahị ahị?

1. Agbẹyị iyina iJisọsị à tị́ me Adamwụ?

Ẹ-ẹpwụ nya ẹka ụnọ uku-uku, iJisọsị yẹ jaabwọ ká Adamwụ kaa họ ẹla bala ọ-jẹ́ ang bwu ẹga nyamwụ. Chajị nya ọọwa, ọ kaa kụ irya, yọyị nya ẹla, bala ọ-họ ẹla lala Adamwụ. (Wa ịJọn 5:19.) IJisọsị dọmwụ gbịla abwụma nya Adamwụ kpẹẹkpẹẹ dudu kọ yẹkẹẹ: “Ọng myị́ ọng ọlẹ kọ yẹm lẹ aalẹ, ọngọọwa yẹ Ohe Oluhye Adịda lẹ.” (ỊJọn 14:9) Jaabwọ ká wẹẹ jẹ́ ang u-uhye nya abwẹla nya iJisọsị, à ka jẹ́ iJihova gụ ọọwa. Ọ-chụ pwokwita, ọháha ọlẹ ká iJisọsị la ẹ-ẹga nya angịnyị mẹjẹ jaabwọ ká iJihova kaa kpahị jung kaka ba.

2. Ányị iJisọsị à tị́ mẹjẹ nyori iJihova họ́ọ?

IJisọsị yẹkẹẹ: “M ka họ ká alodehe wuu ka jẹ́ yẹkẹẹ, jaabwọ ká Ohe Oluhye Adịda nyị hám nya ịlẹhị-ịlẹhị lẹ, jaabwọ ká Adịda ọọwa ayịdang nyị dam ehile kpangga lẹ, ịnyịnyị-ịnyịnyị, am nyaa ka họ ịnyịlẹhị pyii lẹlẹ.” (ỊJọn 14:31) Ụka ká iJisọsị jam odehe, ọ mẹjẹ nyori Adamwụ họ́ọ bwula o-jwoo ihi, tụ́ ụka kọ dọmwụ lujwo nyọka họ ịnyị. Ịnyịnyị, chajị nyọlẹ ká Adamwụ họ́ọ, ọ kaa ya ẹla chajị nyamwụ yẹẹyẹẹ bala ọ-da angịkịla ụbwọ nyọka ri igu balọọ.—ỊJọn 14:23.

3. Ányị iJisọsị à tị́ mẹjẹ nyori angịnyị họ́ọ?

ỊBayịbụụ ya nyori ‘angịnyị ilodehe nyị há’ iJisọsị lụmẹ. (Etu 8:31) Ọ mẹ ọháha nyamwụ jẹ bwula o-ju angịnyị ọhụ bala ọ-daa ụbwọ la ọ-yẹ ịlọmwụ-ịlọmwụ ka. Ọ họ akụrwọ ẹbyẹbyị ịlẹ kị mẹ ọngịrị nyamwụ jẹ, ọ́ tị ba ọọwa ka, ị mẹjẹ nyori ọ kpahị ju angịnyị. (ỊMakị 1:40-42) Ọ kaa họ angịnyị ọnahị la ọ-yẹ oye-oye ka. Omyi Ẹla nyamwụ ya ẹjẹ ọkpụ́kpụ bala ẹhị ọrịrịị-rịrị ha angị la ọkịlẹtụ ọnyịịla ịlẹ kị ke ụrụ wo lọọ. IJisọsị nwụlanọ nyọka yẹ akama bala ọ-ka gbu chajị nya ọháha ọlẹ kọ la ẹ-ẹga nya angịnyị ehe wuu. Ma ọ la ọháha ẹ-ẹga nya angịlẹ kị kaa kpa ẹla ọmẹjẹ nyamwụ họ ụkụrwọ gụgụụgụ.—Wa ịJọn 15:13, 14.

JẸ́ GỤ ỌỌWA

Jẹ́ ang gụ ọọwa u-uhye nya abwẹla nya iJisọsị bala ọ-kụ ẹhị yẹ abwọlẹ á ka bwu mẹ ọháha jẹ bala ọ-pyẹ ụbwọ maa lala ọwa-ọwa.

4. IJisọsị la ọháha ẹ-ẹga nya Adamwụ

Ọgụ-ẹpẹtẹ nya iJisọsị mẹjẹ́ẹhị jaabwọ kahị ka bwu mẹ ọháha nyahị jẹ ẹ-ẹga nya Ohe. Wa iLuku 6:12 bala ịJọn 15:10; 17:26. Ụka kanụ wa ụpwụ ịgọgọ ọnyọnyọọnyị kpá, anụ ya ẹla u-uhye nya ịtọ ẹla ọlẹ:

Lala iJisọsị, ányị ahị tị́ ka bwu mẹjẹ nyori iJihova háahị?

IJisọsị la ọháha ẹ-ẹga nya Adamwụ, ọ tị kaa ya ẹla balọọ ụka lụmẹ-lụmẹ ẹ-ẹpwụ nya abwọ ọrịrị

5. IJisọsị kaa kpahị ju angị la ịbaba

IJisọsị kaa hu ịbaba nya angịkịla kụ ịlahị nya ịnyịlọmwụ. Ụka ká ịnyịrọ á chọọ pyẹpyẹ wẹwẹ, ọ kaa kpa ụka bala ọngịrị nyamwụ da angịkịla ụbwọ. Wa ịMakị 6:30-44, kanụ ya ẹla u-uhye nya ịtọ ẹla ịlẹ:

Ẹ-ẹpwụ nya oja ọwẹ, agbẹyị iyina iJisọsị à tị́ mẹ ahyẹẹrwẹrwa jẹ?—Yẹ ọgba 31, 34, 41, bala 42.
Ịyẹ à tị́ gu iJisọsị gbịla nyọka da angịnyị ụbwọ?—Yẹ ọgba 34.
Nyọlẹ ká iJisọsị kaa gbịla abwụma nya iJihova wẹẹ, ẹlịyẹ ẹla nyamwụ ịwẹ wuu à tị́ mẹjẹ́ng u-uhye nya iJihova?
Ụgbẹyị oyina ahị tị́ ka jẹ́-ẹ gbịla iJisọsị u-uhye nya ọ-kpahị ju angịkịla?

6. IJisọsị kaa hu ha

IJisọsị á la ang lụmẹ ka, ma ọ tị kaa hu ha angịkịla bwu ọ-pyịnyẹng ọlẹ kọ la. O juhi ọhụ nyọka hu ha ịnyịnyị. Wa Ụkụrwọ nya Alẹrụ 20:35, kanụ ya ẹla u-uhye nya ịtọ ẹla ọlẹ:

Ịyẹ iJisọsị à tị́ ya kọ ka ya ọkẹkẹnị hahị?

Yẹ IFIM ọwẹ, kanụ ya ẹla u-uhye nya ịtọ ẹla ọlẹ.

IFIM: ‘Ọkẹkẹnị Juwa Ha Angị Kaa Hu Ha Gụ’—Ụpa Ochiche (4:00)

Agbẹyị iyina ahị tị́ ka jẹ́-ẹ hu ha kori kahị dọmwụ la ang lụmẹ wẹwẹ ka?

À jẹ́ ẹla ọlẹ?

ỊBayịbụụ mẹjẹ́ẹhị ahị nyị raabwọ ha iJihova bwula ẹnyị nya iJisọsị. (Wa ịJọn 16:23, 24.) Kori kahị raabwọ ụ-ụgbẹyị ọlịịwẹ, ahị wẹẹ mẹjẹ nyori ẹla ọlẹ ká iJisọsị họ chajị kahị ka jẹ́-ẹ ri aligu nya iJihova myịhị lẹhị.

ANGỊHYẸ KAA YẸKẸẸ: “Akama nyahị-ị́ ri Ohe ẹla ka.”