LESN 17

Wa A Som Wiez We Jiizas Av?

PLIE

Wen wi lorn bout som a di sitn dem we Jiizas did du wen im de pan di ort, wi get fi si som a di gud wiez dem we im av. An dem wiez de mek wi waahn fi get kluosa tu Jiizas an im Faada, Jeuova. Wa a som gud wiez we Jiizas av? An ou wi kyan du laik Jiizas?

1. Ou Jiizas komiin laik im Faada?

Kaaz Jiizas did de iina evn fi wol iip a ierz wid im Faada, im du tingz jos laik im Faada. (Riid Jan 5:19.) Jiizas komiin so moch laik im Faada dat im se: “Enibadi we si mi si di Faada tu.” (Jan 14:9) Di muor yu nuo bout Jiizas, di muor yu a-go get fi nuo bout Jeuova. So jos laka ou Jiizas did kain tu piipl, im mek yu nuo se a so Jeuova a-go kain tu yu.

2. Wa a som a di sitn dem we Jiizas du we mek wi si se im lov Jeuova?

Jiizas did se: “Mi onggl a du wa mi Faada tel mi fi du, so dat di piipl dem iina di worl kyan nuo se mi lov mi Faada.” (Jan 14:31) Wen Jiizas did de pan di ort, im du evriting we im Faada tel im fi du, aal wen it did aad. Dat mek wi si se im did lov im Faada bad. Jiizas aalwiez a taak bout im Faada, an im mek ada piipl kuda ton im Faada fren tu.—Jan 14:23.

3. Wa a som a di sitn dem we Jiizas du we mek piipl si se im lov dem?

Di Baibl tel wi se wen Jiizas did “luk pan di piipl dem we de pan di ort, a dem [im] did riili lov.” (Pravorbz 8:31) Jiizas du tingz fi elp piipl an fi mek dem fiil gud bout demself. Dis mek wi si se Jiizas lov piipl. Di mirikl dem we im wok no onggl mek wi si se im powaful, bot dem mek wi si se im fiil it fi piipl we a sofa. (Maak 1:40-42) Im chriit evribadi gud, an im neehn chriit nobadi difrant kaaz a uu dem bi. Di piipl dem we riili waahn fi du wa rait, wen dem lisn tu Jiizas, di ting dem we dem ier im se mek dem fiil beta. An it gi dem sitn gud fi luk faawod tu. Kaaz Jiizas did riili lov piipl, im did redi fi sofa an ded fi evribadi. Bot yu si di wan dem we du wa im tel dem fi du, dem wan de riili speshal tu im.—Riid Jan 15:13, 14.

LORN SOM MUO

Lorn muor bout Jiizas wiez dem. An luk pan wa yu kyan du fi mek piipl si se yu lov dem an yu kain tu dem laik Jiizas.

4. Jiizas lov im Faada

Di sitn dem we Jiizas du mek wi si wa wi fi du fi mek Gad si se wi lov Im. Riid Luuk 6:12 an Jan 15:10; 17:26. Afta evri skripcha, wi a-go taak bout da kwestiyan ya:

Ou wi kyan du laik Jiizas an mek Jeuova si se wi lov Im?

Jiizas lov im Faada we de iina evn, an im prie tu im aal di wail

5. Jiizas kier bout piipl we niid elp

Jiizas kier bout ada piipl muor dan ou im did kier bout imself. Aal wen im did taiyad, im stil elp piipl. Riid Maak 6:30-44, an den wi a-go taak bout dem kwestiyan ya:

Wen yu luk iina da skripcha ya, wa a som a di sitn dem we Jiizas did du we mek wi si se im did kier bout ada piipl?—Luk pan vors 31, 34, 41, an 42.
Wa mek Jiizas did waahn fi elp piipl?—Luk pan vors 34.
Kaa Jiizas did av di siem wiez dem laik Jeuova, wa dat tiich wi bout Jeuova?
Wa a som a di sitn dem we wi kyan du fi mek piipl si se wi kier bout dem laik Jiizas?

6. Jiizas did kain tu piipl

Iivn duo Jiizas neehn rich, im did kain tu piipl an im waahn wi fi kain tu piipl tu. Riid Aks 20:35, an den wi a-go taak bout da kwestiyan ya:

Wa Jiizas se kyan mek wi api?

Plie di VIDIYO, an den wi a-go taak bout di neks kwestiyan.

VIDIYO: Wan Paat Fram Di Vidiyo We Niem, ‘It A-Go Mek Yu Muor Api Wen Yu Gi Sumadi Sitn’ (4:00)

Alduo wi mait-a puor, wa a som sitn we wi kyan gi tu piipl?

Yu did nuo se?

Di Baibl tel wi se nobadi kyaahn go tu di Faada ef dem no go chuu Jiizas. So a dat mek wen wi prie tu Jeuova, wi prie iina Jiizas niem. (Riid Jan 14:6.) Wen wi prie iina Jiizas niem, it shuo se wi nuo aal a wa Jiizas du so dat wi kyan ton Jeuova fren.

SUMADI MAIT-A SE: “Aal di sofa wi a sofa, Gad no bizniz wid wi.”

Jiizas did komiin laik im Faada, so ou di sitn dem we im du mek wi si se Jeuova kier bout wi?

DIS A WA YU FI MEMBA

Jiizas lov Jeuova, an im lov piipl tu. Kaa Jiizas komiin laik im Faada, di muor yu get fi nuo bout im a di muor yu a-go get fi nuo bout im Faada, Jeuova tu.