ĨSOMO YA 17
Yesũ Ethĩawa na Nguma Syĩva?
Yĩla tweemanyĩsya ĩũlũ wa Yesũ vamwe na maũndũ ala weekie e vaa ĩũlũ wa nthĩ, nĩtũmanyaa nguma syake nzeo ila itumaa twenda kũtwʼĩka anyanya make, na anyanya ma Ĩthe wake, Yeova. Nguma isu sya kwendeesya nĩ ta syĩva? Na tũtonya kũatĩĩa ngelekanyʼo ya Yesũ ata thayũnĩ witũ?
1. Yesũ avwʼanene na Ĩthe wake maũndũnĩ ta meva?
Yesũ ethĩĩtwe na Ĩthe wake wĩ wendo ĩtunĩ kwa myaka mbilioni mbingĩ, na ĩvindanĩ yĩu yonthe, nĩwĩmanyĩĩtye maũndũ ma vata mũno kuma kwake. Na nũndũ wa kĩtumi kĩu, mosũanĩo, mawoni, na meko make nĩmavwʼanene na ma Ĩthe wake. (Soma Yoana 5:19.) O na eka ũu, Yesũ onanasya nguma ta sya Ĩthe wake nesa vyũ, nginya ĩvindanĩ yĩmwe aisye atĩĩ: “Mũndũ o na wĩva ũla wambonie nĩwamwonie Asa o nake.” (Yoana 14:9) Waendeea kwĩmanyĩsya ĩũlũ wa nguma sya Yesũ, ũkamũmanya Yeova nesanga. Kwa ngelekanyʼo, wasũanĩa ũndũ Yesũ wathĩnĩkĩaa andũ, nũtonya kũmanya ũndũ Yeova ũkũthĩnĩkĩaa mũno wĩana.
2. Yesũ oonanisye ata kana nũmwendete Yeova?
Yesũ aisye atĩĩ: “Nĩ kana nthĩ ĩmanye kana nĩnĩmwendete Asa, nyie nĩĩka o ũndũ Asa ũmbĩaĩe nĩke.” (Yoana 14:31) Yĩla waĩ ĩũlũ wa nthĩ, Yesũ oonanisye kana nũmwendete Ĩthe mũno kwa kũmwĩwʼa o na yĩla vataĩ laisi kwĩka ũu. O na ĩngĩ, Yesũ nĩwendete kũneena ĩũlũ wa Ĩthe wake, na nĩwatetheeasya andũ angĩ matwʼĩke anyanya make.—Yoana 14:23.
3. Yesũ onanĩtye ata kana nĩwendete andũ?
Mbivilia ĩiweta ĩũlũ wa Yesũ yaĩtye kana “ũtanu [wake] waĩ na ana ma andũ.” (Nthimo 8:31) Oonanisye nĩwendete andũ kwa kũmekĩa vinya na kwĩyumya amatetheesye. Nĩweekie syama mbingĩ ila syoonanisye kana e vinya na e tei mwingĩ. (Maliko 1:40-42) Nĩwakuaa andũ nesa na ndavathũlaa amwe. Ndeto syake nĩsyakiakiasya andũ ala mamwĩthukĩĩasya maĩ na ngoo nzeo na ikamanenga wĩkwatyo. Yesũ nĩweeyumĩtye athĩnwʼe na aikwʼa, nũndũ nĩwendete andũ onthe. Ĩndĩ mũno mũno endete andũ ala maatĩĩaa momanyĩsyo make.—Soma Yoana 15:13, 14.
ĨMANYĨSYE MŨNANGO
Ĩmanyĩsye mũnango ĩũlũ wa nguma sya Yesũ. Na ũyona ũndũ ũtonya kwonanyʼa wendo na ũlau take.
4. Yesũ nĩwendete Ĩthe wake
Ngelekanyʼo ya Yesũ yĩtũmanyĩsya ũndũ twaĩlĩte kũmwenda Ngai. Somai Luka 6:12 na Yoana 15:10; 17:26. Ĩtina wa kũsoma kĩla ĩandĩko, neeneai ĩkũlyo yĩĩ:
-
Tũsũanĩĩte ngelekanyʼo ya Yesũ, tũtonya kwonanyʼa ata kana nĩtũmwendete Yeova?
Yesũ nĩwendete Ĩthe wake wa ĩtunĩ na mavinda maingĩ nĩwaneenaa nake kwĩsĩla mboya
5. Yesũ nũthĩnĩkĩaa mavata ma andũ
Yesũ nĩwaiaa mavata ma andũ ala angĩ mbee wa make. O na yĩla ũnoete, nĩwatũmĩaa ĩvinda yake na vinya wake kũtetheesya andũ. Somai Maliko 6:30-44, na ĩndĩ mũineenea makũlyo aa:
-
Mĩsoanĩ ĩsu, nĩ kwa nzĩa syĩva Yesũ woonanisye kana nĩwathĩnĩkĩaa ala angĩ?—Sisya mũsoa wa 31, 34, 41, na 42.
-
Nĩ kyaũ kyeekĩaa Yesũ vinya atetheesye andũ?—Sisya mũsoa wa 34.
-
Nũndũ Yesũ atĩĩaa ngelekanyʼo ya Yeova, maũndũ asu maũmanyĩsya kyaũ ĩũlũ wa Yeova?
-
Nĩ kwa nzĩa syĩva tũtonya kũatĩĩa ngelekanyʼo ya Yesũ ya kũthĩnĩkĩaa ala angĩ?
6. Yesũ nĩ mũlau
Yesũ aĩ mũlau mũno o na kau ndaĩ na syĩndũ mbingĩ sya kĩ-mwĩĩ, na nĩwatwĩkĩie vinya twĩthĩawe twĩ alau. Somai Meko ma Atũmwa 20:35, na ĩndĩ mũineenea ĩkũlyo yĩĩ:
-
Kwosana na ũndũ Yesũ wamanyĩisye, nĩ kyaũ kĩtonya kũtuma twĩthĩwa twĩ atanu?
Ĩloelei VITIO, na ĩndĩ mũineenea ĩkũlyo yĩĩ:
-
Tũtonya kwonyʼa andũ ala angĩ ũlau kwa nzĩa syĩva o na ethĩwa tũi na syĩndũ mbingĩ sya kĩ-mwĩĩ?
We nĩwĩsĩ?
Mbivilia ĩmanyĩasya kana twaĩle kũmũvoya Yeova ĩsyĩtwanĩ ya Yesũ. (Soma Yoana 16:23, 24.) Yĩla twavoya kwa nzĩa ĩsu twonanasya kana nĩtũũmũtũngĩa Yesũ mũvea nũndũ wa kũtũtetheesya tũtwʼĩke anyanya ma Yeova.
ANDŨ AMWE MAASYA: “Ngai ndalũnganaa na mathĩna maitũ.”
-
Nũndũ Yesũ ethĩawa na nguma ta sya Ĩthe wake, meko make monanĩtye ata kana Yeova nũtũthĩnĩkĩaa?
KĨLA TWEEMANYĨSYA
Yesũ nũmwendete Yeova, na nĩwendete andũ. Nũndũ Yesũ ethĩawa na nguma ta sya Ĩthe wake, o ũndũ waendeea kũmũmanya, nowʼo ũendeeaa kũmũmanya Yeova mũnango.
Makũlyo ma Kũsyokeleela
-
Tũtonya kwonanyʼa ata kana nĩtũmwendete Yeova, o ũndũ Yesũ ũmwendete?
-
Tũtonya kwonanyʼa ata kana nĩtwendete andũ ala angĩ o tondũ Yesũ ũmendete?
-
Nĩ nguma yĩva ya Yesũ yakwendeesya mũno?
MAŨNDŨ ANGĨ MA KWĨMANYĨSYA
Soma wone nguma imwe sya Yesũ ila tũtonya kwenda kwĩthĩwa nasyo.
“Atĩĩa Ngelekanyʼo ya Yesũ Kwa . . .” (Yesũ Nĩwe Nzĩa, Nĩwe wʼo, na Nĩwe Thayũ, ĩthangũ ya 317)
Ĩmanyĩsye wone nĩkĩ twaĩle kũvoyaa ĩsyĩtwanĩ ya Yesũ.
“Nĩkĩ Twaĩle Kũvoyaa Ĩsyĩtwanĩ ya Yesũ?” (Mũsyaĩĩsya, Ĩtukũ 1, Mwei wa 2, 2008)
Mbivilia nĩyĩeleetye ũndũ Yesũ ũilye?
Tũtonya kwĩmanyĩsya kyaũ twasũanĩa ũndũ Yesũ woonaa aka?
“Kũnenga Aka Ndaĩa Ũseũvyonĩ wa Ngai” (Mũsyaĩĩsya, Ĩtukũ 1, Mwei wa 9, 2012)
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
