LYNNONG 17

U Jisu u Long Uba Kumno?

TEM

Haba ngi pule shaphang kiei kiei kiba u Jisu u la kren bad u la leh mynba u don ha pyrthei, ngi shem ba ki jinglong jong u ki pynjan ïa ngi sha u bad sha U Jehobah. Kiei ki katto katne ki jinglong jong u? Bad kumno ngi lah ban pyrthuhbud ïa u Jisu ha ka jingim jong ngi?

1. Ha kano ka rukom u Jisu u long kum u Kpa jong u?

Ha ka por ba u Jisu u don ha bneng, u la khmih thuh ïa la u Kpa bad u la ïoh shibun ki jinghikai na u, da ki hajar hajar snem. Na kata ka daw, ki jingpyrkhat, ki jingsngew, bad ki kam jong u ki long kum ki jong u Kpa jong u hi. (Pule Ïoannis 5:19.) Ha ka jingshisha, u Jisu u pyrthuhbud thik pa thik ïa ki jinglong u Kpa jong u, kaba la pynlong ïa u ban ong: “Jar uba la ïohi ïa nga, u la ïohi ïa uta U Kpa.” (Ïoannis 14:9) Katba phi nang tip ïa ki jinglong u Jisu, katta phin nang kham tip shuh shuh shaphang U Jehobah. Kum ka nuksa, ka jingphikir jong u Jisu ïa ki briew ka pyni ba haduh katno U Jehobah u phikir ïa phi.

2. Kumno u Jisu u la pyni ba u ieid ïa U Jehobah?

U Jisu u la ong: “Ba kata ka pyrthei kan ïoh tip, ba nga ieid ïa uta U Kpa, bad kat kumba uta U Kpa u la hukum ïa nga, kumta nga leh.” (Ïoannis 14:31) Mynba u Jisu u don ha pyrthei, u la pyni ïa ka jingieid kaba khraw ïa la u Kpa da kaba kohnguh ïa u wat hapdeng ki jingeh. U Jisu u ju sngewtynnad bha ban kren shaphang u Kpa, bad ban ïarap ïa kiwei ban jan sha u Kpa jong u.—Ïoannis 14:23.

3. Kumno u Jisu u la pyni ba u ieid ïa ki briew?

Ha ka Baibl u Jisu u la ong, “ka jingsngewbha jong nga ka la long bad u khun bynriew.” (Proberb 8:31) U la pyni ïa kane ka jingieid da kaba ïarap bad ai mynsiem ïa ki briew. U la leh ïa ki kambah kiba pyni ym tang ïa ka bor jong u hynrei ïa ka jingsngewsynei jong u ruh. (Markos 1:40-42) U khlem leh shiliang ïano ïano ruh bad u la leh bha ïa baroh. Ki kyntien jong u ki pyntngen bad ki ai jingkyrmen ïa kito baroh kiba sngap shisha ïa u. U Jisu u la kloi ban shah ïa ki jingjynjar bad ban ïap na ka bynta jong ngi namarba u ieid ïa ki briew baroh. Hynrei u kham ieid ïa kito kiba bud ïa ki jinghikai jong u.—Pule Ïoannis 15:13, 14.

WAD SHUH SHUH

Pule bniah shaphang ki jinglong jong u Jisu, bad peit ruh kumno phi lah ban pyni jingieid bad jingsbun kum ma u.

4. U Jisu u ieid ïa la u Kpa

Ka nuksa jong u Jisu ka hikai ïa ngi kumno ban pyni ïa ka jingieid jong ngi ïa U Blei. Pule Loukas 6:12 bad Ïoannis 15:10; 17:26. Bad hadien ba la pule ïa man la ka dkhot sa ïa peit lang ïa kane ka jingkylli harum:

Kumno ngi lah ban pyrthuhbud ïa u Jisu, bad pyni ba ngi ieid ïa U Jehobah?

U Jisu u ieid bha ïa la u Kpa uba ha bneng bad u ju kren barobor ïa u ha ka jingduwai.

5. U Jisu u don ka jingsngewsynei ïa ki briew

U Jisu u kham phikir ïa kiwei ban ïalade. U la ai ïa la ka por bad ka bor ban ïarap ïa ki briew watla u la thait ruh. Pule Markos 6:30-44, bad nangta sa ïa peit lang ïa kine ki jingkylli harum:

Ha kine ki dkhot, kiei ki katto katne ki rukom kiba U Jisu u la pyni ba u phikir ïa kiwei?—Peit ïa ka dkhot ba 31, 34, 41, bad 42.
Kaei kaba pynlong ïa U Jisu ban ïarap ïa kiwei?— Peit ïa ka dkhot ba 34.
Namar u Jisu u pyrthuhbud ïa ki jinglong U Jehobah, te kane ka hikai aïu ïa ngi shaphang U Jehobah?
Kumno ngi lah ban pyrthuhbud ïa ka rukom phikir u Jisu ïa kiwei?

6. U Jisu u long uba sbun

U Jisu u long uba sbun watla um long uba riewspah, bad u pynshlur ruh ïa ngi ban long kiba sbun. Pule Kam 20:35, bad nangta sa ïa peit lang ïa kane ka jingkylli harum:

Katkum ka jingong u Jisu, kumno ngi lah ban long kiba kmen?

Peit ïa ka VIDEO, bad nangta sa ïa peit lang ïa kane ka jingkylli harum:

VIDEO: Ka Kham Kmen ban Ai ban ïa kaba Pdiang—Shi Bynta (4:00) (Phareng)

Ha kano ka rukom ngi lah ban ai, watla ngim don than shibun kiei kiei?

Hato phi tip?

Ka Baibl ka hikai ïa ngi ban duwai ha U Jehobah lyngba ka kyrteng u Jisu. (Pule Ïoannis 16:23, 24.) Haba ngi duwai ha kata ka rukom, ngi pyni ba ngi sngewnguh ïa kaei kaba u Jisu u la leh ban ïarap ïa ngi ban long ki paralok jong U Jehobah.

DON KIBA ONG: “U Blei um phikir ïa ngi.”

Namarba u Jisu u pyrthuhbud ïa ki jinglong U Jehobah, kumno ki jingleh jong u ki pynshisha ba U Jehobah u phikir ïa ngi?

KI MAT BAKONGSAN

U Jisu u ieid ïa u Jehobah, bad u ieid ïa ki briew. Namarba u Jisu u long kum u Kpa jong u, katba phi nang tip shaphang u Jisu, katta phin nang kham tip shuh shuh shaphang U Jehobah.