OSHILESHWA 17
Jesus omunhu naanaa a tya ngahelipi?
Eshi hatu lihongo kombinga yoinima oyo Jesus a popya nokwa ninga kombada yedu, ohatu lihongo kombinga yomaukwatya oo tae tu ehenifa popepi naye nosho yo Xe, Jehova. Omaukwatya amwe omuo mawa oelipi po? Nongahelipi hatu dulu okuhopaenena Jesus monghalamwenyo yetu?
1. Omeenghedi dilipi Jesus a fa Xe?
Eshi Jesus a kala meulu, okwa kala ha tale kwaasho Xe ta ningi nokulihonga kuye oule womido dihapu. Naasho osha li she mu ningifa a kale ha diladila, e udite nokukatuka ngaashi ye. (Lesha Johannes 5:19.) Jesus okwa li ha hopaenene filufilu omaukwatya aXe nomolwaasho a popya a ti: “Keshe ou a mona nge, okwa mona yo Tate.” (Johannes 14:9) Eshi to lihongo kombinga yaJesus, oto ka shiiva yo Jehova nawanawa. Pashihopaenenwa, onghedi omo Jesus a li a ulika kutya oku na ko nasha novanhu otai ulike kutya Jehova oku na ko nasha naave.
2. Jesus okwa ulika ngahelipi kutya oku hole Jehova?
Jesus okwa ti: “Opo ounyuni u shiive kutya ondi hole Tate, ohandi ningi naanaa ngaashi Tate a lombwela nge.” (Johannes 14:31) Eshi Jesus a li kombada yedu, okwa li a ulika kutya oku hole Xe neenghono, eshi a dulika kuye nokuli nopeemhito opo sha li shidjuu okudulika. Jesus okwa li yo e hole okupopya kombinga yaXe nokukwafela vamwe va pange oukaume naYe.— Johannes 14:23.
3. Jesus okwa ulika ngahelipi kutya oku hole ovanhu?
Ombiibeli oya ti kutya Jesus okwa “nyakukilwa ovana vovanhu.” (Omayeletumbulo 8:31) Okwa ulika ohole ya tya ngaho eshi a twa omukumo nokukwafela ovanhu nopehe na okulihola mwene. Okwa longa oikumwifilonga oyo ya ulika eenghono daye nosho yo olukeno laye. (Markus 1:40-42) Okwa ungaunga novanhu nonghenda noka li e na okatongo. Eendjovo daye oda hekeleka nokupa eteelelo ovanamitimadiwa aveshe ovo va pwilikina kuye. Jesus okwa li e na ehalo lokuliyandja a mone oixuna nokufya, molwaashi oku hole ovanhu aveshe. Ashike oku hole unene ovo hava shikula omahongo aye.— Lesha Johannes 15:13, 14.
KONAKONA MOULE
Lihonga shihapu kombinga yomaukwatya aJesus. Ndele to tale nghee to dulu okuulika ohole nokuyandja ngaashi a li a ninga.
4. Jesus oku hole Xe
Oshihopaenenwa shaJesus otashi tu hongo nghee hatu dulu okuulika kutya otu hole Kalunga. Lesha Lukas 6:12 nosho yo Johannes 15:10; 17:26. Konima eshi mwa lesha omushangwa keshe, kundafaneni epulo tali shikula:
-
Ongahelipi hatu dulu okuhopaenena Jesus nokuulika kutya otu hole Jehova?
Jesus oku hole Xe womeulu nokwa kala ha popi naye lwoikando okupitila meilikano
5. Jesus okwa li e na ko nasha naavo va pumbwa ekwafo
Jesus okwa li ha pitifa komesho eemhumbwe dovanhu, ponhele yokupitifa komesho daye mwene. Nokuli naashi a li ha kala a loloka, okwa li ha longifa efimbo neenghono daye a kwafele ovanhu. Lesha Markus 6:30-44, ndele tamu kundafana omapulo taa shikula:
-
Mehokololo olo, omeenghedi dilipi Jesus a li a ulika kutya oku na ko nasha navamwe?— Tala eevelishe 31, 34, 41 nosho yo 42.
-
Oshike sha li she linyengifa Jesus a kwafele ovanhu?— Tala ovelishe 34.
-
Molwaashi Jesus okwa li ha hopaenene omaukwatya aJehova, osho otashi ku hongo shike kombinga yaJehova?
-
Omeenghedi dimwe dilipi hatu dulu okuhopaenena Jesus, opo tu ulike kutya otu na ko nasha navamwe?
6. Jesus oha yandje nehalo liwa
Jesus okwa li ha yandje nehalo liwa, nokuli nonande ka li e na oinima ihapu yopamaliko, nokwe tu ladipika tu kale hatu yandje nehalo liwa. Lesha Oilonga 20:35, ndele tamu kundafana epulo tali shikula:
-
She likolelela kwaasho Jesus a popya, ongahelipi hatu dulu okukala twa hafa?
Dana OKAVIDIO, ndele tamu kundafana epulo tali shikula.
-
Omeenghedi dimwe dilipi hatu dulu okuyandja, nokuli nonande katu na sha shihapu?
Owe shi shiiva tuu?
Ombiibeli oye tu honga tu ilikane kuJehova, hatu pitile medina laJesus. (Lesha Johannes 16:23, 24.) Ngeenge hatu ilikana ngaho, ohatu ulike kutya otwa pandula osho Jesus e tu ningila, eshi e tu kwafela tu ninge ookaume kaJehova.
VAMWE OHAVA TI: “Kalunga ke na ko nasha eshi hatu mono oixuna.”
-
Molwaashi Jesus oha hopaenene omaukwatya aXe, eenghatu daye oda ulika ngahelipi kutya Jehova oku na ko nasha nafye?
ENGONGO
Jesus oku hole Jehova noku hole yo ovanhu. Molwaashi Jesus oku na omaukwatya a fa aXe, ngeenge owe mu shiiva nawanawa, oto ka shiiva yo Jehova.
Eendululo
-
Ongahelipi hatu dulu okuulika kutya otu hole Jehova ngaashi Jesus?
-
Ongahelipi hatu dulu okuulika kutya otu hole ovanhu ngaashi Jesus?
-
Oukwatya waJesus ulipi u hole unene?
TALA OUYELELE WA WEDWA PO
Natu ka konakoneni omaukwatya amwe aJesus oo hatu dulu okuhopaenena.
“Opo u hopaenene Jesus, ou na okukala. . .” (Jesus oye ondjila, noshili nomwenyo, epandja 317)
Lihonga kutya omolwashike twa pumbwa okwiilikana hatu pitile medina laJesus.
“Omolwashike twa pumbwa okwiilikana hatu pitile medina laJesus?” (Oshungonangelo, 1 Februali 2008)
Mbela Ombiibeli oya popya sha shi na sha neholokepo laJesus?
Oshike hatu lihongo konghedi omo Jesus a li ha ungaunga novakainhu?
“Efimaneko koshi yefiloshisho laKalunga” (Oshungonangelo, 1 Septemba 2012)
Otashi dulika yo u hafele oikundafanwa ei
OMAPULO OO HAA PULWA LUHAPU
Ekonakonombiibeli olo hali ningwa kEendombwedi daJehova oshike?
Peenghundafana doshali odo hadi ningwa kEendombwedi daJehova, oto dulu okulongifa etoloko lOmbiibeli keshe. Owa manguluka okushiva oukwaneumbo weni aushe, ile keshe umwe oo wa hala a kale po.
