KALABO 17

Tuɓo-Vele Vagɔ Zɛɓɛi E Ziizɛ Ya?

TƐ GÁ

Da faa maa wolina e vile niitiɛ va Ziizɛ boni ta niitiɛ e kɛɛni zui ma, da zoo de na tuɓo-veleitiɛ wɛ̃ɛ. Na ɣa ɓɔ de va de lɔtɔ ba e vɛɛ Keea Jehova va. Tuɓo-velei niitiɛ taniga ta ga zɛɓɛ? Na ɣa ɣɛɛna da vile Ziizɛ wɔwɔ-wogi zu ɣɛ le da ŋeteai zu?

1. Ziizɛ wulovɛ ga Keea ɣɛ le?

Siɛgi ma Ziizɛ ɣɛni Gala ta e faa lamaa maa wolini Keea ya kwena tamaa wuuzu. Nii ɣa e kɛɛ tuɓo-velei ɓɔga na ki-gaa-ziɛi wuloai ga Keea. (Jɔ̃ 5:19 lodo.) Ziizɛ ɔ luɓo e ɣɛ velei Keea ɣa luɓo la, na ɣa e kɛɛni yiɛ ɣɛ tea: “Nui é pɛ̀tɛga é Kèea Gala vɛtɛga.” (Jɔ̃ 14:9) Ya faa maa wolina e vile Ziizɛ luɓo-veleitiɛ va, ya Jehova wɛ̃ɛ ɓɔɔ ga pagɔ. Velei Ziizɛ ɓɛdɛɛ la numaa ma, tɔ dɛɛzu ga Jehova ɓɛdɛvɛ e ʋaa ma.

2. Ziizɛ dɛɛvɛ ɣɛ le ga wõila ɣa zeea Jehova ʋaa ma?

Ziizɛ ɣɛni tea: “Gà kɛ è ɣɛ velei Kèea Gala boga la mà, kɛɛ ʋaa ma zui kwɛ̃ɛ ga Kèea wõi ɣa mà.” (Jɔ̃ 14:31) Tei Ziizɛ ɣɛni zui ma e dɛɛni ga wõila ɣa ɓɔɔ zeea Keea ʋaa ma. E kɛɛni ga velei ɔ goo-mɛni kuloni la zeea ani ɓalaa na ɔ ɓaana zee ma. Wõila ɣɛni Ziizɛ ya Keea ʋaa ma, na ɣa e kɛɛni ɔ yɛpɛ numaa wɔ e vile Keea va.—Jɔ̃ 14:23.

3. Ziizɛ dɛɛvɛ ɣɛ le ga wõila ɣa zeea de ʋaa ma?

Gala Kɔlɔi bogɛ ga “wõila ɓɔɔɓɔɔ ka Ziizɛ ya nu ɓuse ʋaa ma.” (Proverbs 8:31, nii ponɛi bu) E dɛɛni ga wõila ɣa zeea ga velei ɔ numaa ɣaa-nɛkpɛ la yiɛ ɓɔ te va. Faa maa-wɔlɔ-wɔlɔgitiɛ e kɛɛni e dɛɛvɛ ga, e wulo gaa-ɓai wulu e zeea, towa numaa maa-wõi zo. (Maki 1:40-42) Towa numaa zo ɓɔɔ ga pagɔ, ɛ lɛ su-yɛvɛ boga. Ɔ numaa ɣaa-nɛkpɛ, e ki-to fe niitiɛ ya tɔ wuito goi ma. Wõilai e Ziizɛ ya de ʋaa ma, towa e kɛɛni yiɛ ʋa bu ga e laa-nɔwɔ-wo e za de ʋaa ma. Kɛ taitiɛ te ziɛzu ga niitiɛ Ziizɛ dɛɛzu ga tiɛ, wõila ɓɔɔɓɔɔ ka zeea te ʋaa ma.—Jɔ̃ 15:13, 14 lodo.

FAA LAMAA MAA WOLI

Faa lamaa maa woli e vile Ziizɛ luɓo-veleitiɛ va. Wɛlɛ wɔnɔ velei va ya vile la kɔwɔ-wogi zu, yiɛ wõila lɛ ga numaa.

4. Wõila ɣa Ziizɛ ya Keea ʋaa ma

Niitiɛ Ziizɛ kɛɛni ta zoo te ɓɔ de va de dɛ ga wõila ɣa de ya Gala faa ma. A Luki 6:12 ɓɔga Jɔ̃ 15:10; 17:26 lodo. Wa ma maa wũgi lodona, wo gaa-zaɣa-kɛɛ nii ɣaa wote. Wa fele kelei lodona wɔnɔ, wo gaa-zaɣa-kɛɛ nii ɣaa wote:

Da leve ɣɛ le de dɛ ga wõila ɣa de ya Jehova ʋaa ma, e ɣɛ velei Ziizɛ kɛɛni la?

Wõila ɣa ɓɔɔ Ziizɛ ya Keea ʋaa ma, ɔ feli siɛ nɛpɛ ma

5. Ziizɛ ɓɛdɛvɛ niitiɛ ʋaa ma te laa-nɔwɔ-wosu

Ziizɛ ɓɛdɛɛ e ɣɛni numaa ma e leve ɓɔɔ va. Tei ɓalaa kpɔlɔgɛi e ɣɛni, e siɛ siɣini ba ga e ɓɔ numaa va. A Maki 6:30-44 lodo, wo gaa-zaɣa-kɛɛ niitiɛ ɣaa wote:

E ɣɛ velei Gala Kɔlɔi boga la, Ziizɛ dɛɛni ɣɛ le ga kpɛdɛvɛ numaa ʋaa ma?—Wɛlɛ ma woo 31, 34, 41, ɓɔga 42 va.
Zɛɓɛi e kɛɛni Ziizɛ yiɛ ɓɔ numaa va?—Wɛlɛ ma woo 34 va.
Tei Ziizɛ ɔ luɓo e ɣɛ velei Keea ɣa luɓo la, zɛɓɛi na dɛɛzu ga diɛ e vile Jehova va?
Da dɛ ɣɛ le ga de ɓɛdɛvɛ numaa ma, e ɣɛ velei Ziizɛ kɛɛni la?

6. Ziizɛ ɣa ga faa-nɛɛ ɣɛɛ nu

Ziizɛ ɣɛni ga faa-nɛɛ ɣɛɛ nu, velei ɓalaa sɔɔla laama lɛ ɣɛni la zeea. Tɔwɔ e wõini da ɓalaa de ɣɛ ga faa-nɛɛ ɣɛɛ vea. A Te Ɣɛɛ Ʋaitiɛ 20:35 lodo, wo gaa-zaɣa-kɛɛ nii ɣaa wote:

E ɣɛ velei Ziizɛ boni la, da leve ɣɛ le de kuuzu nɛɛ maa zɔlɔwo?

ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.

ƲILIOGI: “Tɔ Ga Tuuyiɛ Ɓakpa Nu Ma Ga É Faa-Nɛɛ Ɣɛ”—Ʋilio Kpuogi (4:00)

Da leve ɣɛ le de ɣɛ ga faa-nɛɛ ɣɛɛ vea, ani ɓalaa sɔɔla lamaa lɛ de ya?

E ɣɛni nii wõni?

Gala Kɔlɔi bogɛ ga de Gala feli Ziizɛ na daa-zeigi zu. (Jɔ̃ 16:23, 24 lodo.) Ani da Gala felina ɣana, towa dɛ ga de yee zeivɛ nii wu Ziizɛ kɛɛ de vɛ, ga e ɓɔ de va de ɣɛ ga Jehova na siɛ-pulu.

NUMAA TANIGA TE ƔƐ: “Gala lɛ ɓɛdɛni de ʋaa ma.”