CHILONGESA 17
Uno Yesu Apwa Ngachilihi?
Omu natulinangula vyuma ahanjikile Yesu navize alingile omu apwile hano hamavu, natutachikiza vilinga vize navitupandamisa kuli ikiye nakuli Ise Yehova. Uno vilinga muka vyamwaza vize apwile navyo Yesu? Natulondezeza ngachilihi Yesu mukuyoya chetu?
1. Uno Yesu alifwana ngachilihi naIse?
Yesu namononga vyuma nalinginga Ise wazangi, nakulinangula kuli ikiye hamyaka yayivulu mwilu. Ngocho eji kushinganyekanga, nakwivwa nakulinga vyuma ngana mwaIse. (Tanga Yowano 5:19.) Yesu eji kulondezezanga Ise mujila yakukupuka. Ambile ngwenyi: “Weshowo nangumono ami namono naTata nawa.” (Yowano 14:9) Omu nautachikiza vilinga vyaYesu nautachikiza jino kanawa Yehova. Chakutalilaho, jila yize Yesu azakaminyinengamo vatu yasolola nge Yehova akuzakama.
2. Uno Yesu asolwele ngachilihi ngwenyi azanga Yehova?
Yesu ambile ngwenyi: “Hakusaka kaye katachikize ngwako ami ngwazanga Tata, . . . nguli nakulinga nge muze angulwezele Tata.” (Yowano 14:31) Omu apwile hano hamavu, asolwele ngwenyi azanga Ise hakumwononoka lika nahalwola chapwilenga chachikalu kulinga ngocho. Hakuwana nawa nge azangile chikuma Ise, ngocho ahanjikilenga chikuma hali ikiye nakukafwa nawa vakwavo vapandame chikuma kuli Ise.—Yowano 14:23.
3. Uno Yesu asolwele ngachilihi ngwenyi azanga vatu?
Mbimbiliya ngwayo Yesu ‘evwila kuwaha vatu.’ (Vishimo 8:31, kwinyikila chamwishi) Asolwele ngwenyi avazanga hakuvakolezeza nakuvakafwa. Alingile vyakukomwesa vyavivulu vize vyasolwele nge atwama nangolo namuchima wakeke. (Mako 1:40-42) Avasolwelelenga likoji, kaha nawa katalilenga vatu kumesoko. Vyuma ahanjikilenga vyavendejekelenga vatu vamwaza michima vaze vamwivwilililenga, nakuvalingisa vatalilile vyuma vyamwaza. Yesu alisuwile kuyanjila vatu nakuvafwila mwomwo avazanga. Oloze azangile chikuma vatu vaze vakavangijilenga vyuma anangwilenga.—Tanga Yowano 15:13, 14.
LINANGULE VYAKUJIMINYINA
Linangule vyavivulu utachikize muchima apwile nawo Yesu. Kaha nawa wana omwo unahase kusolola zangi namuchima wakuhana ngana muze alingile ikiye.
4. Yesu azanga Ise
Chakutalilaho chaYesu chatunangula omwo tunahase kusolwelamo ngwetu twazanga Kalunga. Tangenu Luka 6:12 naYowano 15:10; 17:26. Hanyima yakutanga chisoneka hichisoneka, shimutwilenu hachihula chino:
-
Natusolola ngachilihi ngwetu twazanga Yehova ngana muze alingile Yesu?
Yesu azangile Ise wamwilu, kaha ahanjikilenga nenyi mapapa kakavulu kuhichila mukulomba
5. Yesu azakaminenga vatu vaze vapwilenga muukalu
Yesu ahakilenga kulutwe vyuma vize vasakilenga vakwavo kuhambakana vize asakilenga ikiye. Azachishile lwola lwenyi nangolo jenyi mangana azakame vakwavo nahalwola azeyelenga. Tangenu Mako 6:30-44, kufumaho shimutwilenu havihula vino:
-
Kweseka namujimbu unatange, Yesu asolwelenga ngachilihi ngwenyi azakaminenga vakwavo?—Tala vesi 31, 34, 41, na 42.
-
Chuma muka chalingishile Yesu akafwe vatu?—Tala vesi 34.
-
Hakuwana nge Yesu alondezezelenga vilinga vyaYehova, uno echi chakunangula vyuma muka hali Yehova?
-
Jijila muka tunahase kuzakaminamo vakwetu ngana muze alingilenga Yesu?
6. Yesu apwile namuchima wakuhana
Yesu apwilenga namuchima wakuhana numba tuhu kapwilenga navikumba vyavivuluko, kaha nawa atukolezeza tulingenga mwomumwe. Tangenu Vilinga 20:35, nakushimutwila hachihula chino:
-
Kweseka namazu ahanjikile Yesu, chuma muka nachitukafwa tupwenga vakuwahilila?
Talenu VINDIYO, nakushimutwila hachihula chino:
-
Jijila muka jimwe tunahase kusolwelamo muchima wakuhana numba tuhu katwatwama navikumba vyavivuluko?
Uno watachikiza tahi?
Mbimbiliya yatunangula tulombenga kuli Yehova kuhichila mulijina lyaYesu. (Tanga Yowano 16:23, 24.) Nge natulombanga mujila kana, kaha natusolola ngwetu twatachikiza vyuma alinga Yesu mangana atukafwe tupwenga tumasepa jaYehova.
VATU VAMWE NGWAVO: “Kalunga kevwa kukola kumuchima hakutumona tuli nakuyandako.”
-
Hakuwana nge Yesu alondezezelenga vilinga vyaIse, jino vyuma alingilenga vyasolola ngachilihi nge Yehova atuzakama?
CHISHINA UNALINANGULA
Yesu azanga Yehova navatu. Hakuwana nge Yesu eji kulondezezanga Ise, ngocho nge naumutachikiza chikuma kaha nautachikiza nawa Yehova.
Kuhituluka
-
Natusolola ngachilihi ngwetu twazanga Yehova ngana muze alingile Yesu?
-
Natusolola ngachilihi ngwetu twazanga vakwetu vatu ngana muze alingile Yesu?
-
Vilinga muka atwama navyo Yesu vize wazanga chikuma?
WANA VYAVIVULU
Wana vilinga vimwe vyaYesu vize tunahase kulondezeza.
“Londezezenu Yesu Hakupwa. . .” (Yesu—Ikiye Jila, Ikiye Muchano, Ikiye Kuyoya, lifwo 317)
Wana ovyo chapwila chachilemu kulomba kuhichila muli Yesu.
“Mwomwo Ika Twatela Kulomba muLijina lyaYesu?” (Kaposhi Kakutalila, April 1, 2008)
Uno Mbimbiliya yavuluka omwo asolokelenga Yesu tahi?
“Uno Yesu Asolokelenga Ngachilihi?” (Chihande chili ha jw.org/lue)
Vyuma muka natulinangula kuli Yesu mujila azakaminyinengamo mapwevo?
“Kalunga Eji Kuvumbikanga Mapwevo Nakuvazakama” (Chihande chamuKaposhi Kakutalila)
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
