SULA MAR 17

Yesu En Ng’at Machalo Nade?

TUGE

Sama wapuonjore e wi gik ma Yesu nowacho kendo timo ka en e piny, wafwenyo kido ma miyo wasudo machiegni kode kod Wuon-gi ma en Jehova. Moko kuom kido mabeyogo gin mage? To ere kaka wanyalo luwo ranyisi mar Yesu e ngimawa?

1. Yesu chalo gi Wuon-gi e yore mage?

Kuom higni mang’eny, Yesu osebedo e polo kopuonjore gik mathoth kuom Wuon-gi. Mano e momiyo Yesu paro kendo timo gik moko mana kaka Jehova. (Som Johana 5:19.) Yesu nyiso kido kaka mag Wuon mare e yo maber ahinya. Mano e momiyo nowacho kama: “Ng’at ma osenena, oseneno Wuoro bende.” (Johana 14:9) Kaka imedo puonjori e wi kido mag Yesu, e kaka ibiro medo ng’eyo Jehova e yo maber. Kuom ranyisi, yo ma Yesu ne dewogo ji nyiso kaka Jehova bende dewi.

2. Ere kaka Yesu osenyiso ni ohero Jehova?

Yesu nowacho niya: “Mondo piny ong’e ni ahero Wuora, atimo mana kaka Wuora osechika ni atim.” (Johana 14:31) Ka ne Yesu nie piny, nonyiso ni ohero Wuon mare kuom winje kata mana e kinde ma timo kamano ne ok yot. Bende, Yesu nohero wuoyo e wi Wuon-gi kendo konyo jomoko mondo gibed osiepe Jehova.—Johana 14:23.

3. Ere kaka Yesu osenyiso ni ohero ji?

Muma wacho ni Yesu ‘mor ahinya gi dhano.’ (Ngeche 8:31) Ne onyiso hera ma kamano ka ne ojiwo ji kendo konyogi gi chunye duto. Notimo honni ma ne nyiso teko ma ne en-go kod kaka nokecho ji. (Mariko 1:40-42) Notimo ne ji gik moko e yo mang’won ma ok obuono ng’ato ang’ata. Wechene nochiwo hoch kod geno ne ji duto mobolore ma ne winje. Yesu noyie sandore kendo tho nikech nohero dhano duto. Kata kamano, joma luwo puonjne e ma ohero ahinya.—Som Johana 15:13, 14.

TIM NONRO

Puonjri weche momedore e wi kido mag Yesu, kae to inon ane kaka inyalo nyiso ji hera kendo bedo jachiwo mana kaka en.

4. Yesu ohero Wuon mare

Ranyisi mar Yesu puonjowa kaka wanyalo hero Nyasaye. Som Luka 6:12 kod Johana 15:10; 17:26. Bang’ somo ndiko ka ndiko, wuouru e wi penjo ma luwoni:

Wanyalo nyiso nade ni wahero Jehova mana kaka Yesu notimo?

Yesu nohero Wuon-gi manie polo kendo nowuoyoga kode nyading’eny

5. Yesu dewo joma chandore

Yesu noketo dwach jomoko obed motelo ne mage. Kata mana e kinde ma ne ool, notiyo gi thuolone kod tekone e konyo ji. Som Mariko 6:30-44, kae to uwuo e wi penjo ma luwogi:

Kaluwore gi ndikogo, gin yore mage ma Yesu nonyisogo ni odewo jomoko?—Ne kwan matindo 31, 34, 41, kod 42.
Ang’o ma nojiwo Yesu mondo okony ji?—Ne kwan matindo 34.
Nikech Yesu nyiso kido kaka mag Wuon mare, mano puonji ang’o e wi Jehova?
Gin yore mage mamoko ma wanyalo nyisogo ni wadewo jomoko mana kaka Yesu?

6. Yesu en jachiwo

Kata obedo ni Yesu ne onge gi gik mang’eny, pod ne en jachiwo kendo nojiwowa mondo wan bende wabed jochiwo. Som Tich Joote 20:35, kae to uwuo e wi penjo ma luwoni:

Yesu nowacho ni en ang’o ma kelo mor?

Tug VIDIO, kae to uwuo e wi penjo ma luwoni:

VIDIO: “Chiwo Kelo Mor Mang’eny”—En Bath Vidio (4:00)

Gin yore mage ma wanyalo nyisogo ni wan jochiwo kata obedo ni wan gi gige ringruok matin?

Be ing’eyo?

Muma puonjowa ni onego wawuo gi Jehova e lamo kokalo kuom nying Yesu. (Som Johana 16:23, 24.) Ka walemo e yo ma kamano, wanyiso ni wagoyo erokamano kuom gima Yesu osetimo mondo wabed osiepe Jehova.

PARO MA JOMOKO NIGO: “Nyasaye ok dewwa sama wachandore.”