ZIRLAI 17

Isua Chu Eng Ang Mi Nge A Nih?

PLAY RAWH

Leia Isua thusawite leh thiltihte kan zir hian amah leh a Pa, Jehova min hnaih lehzualtîrtu miziate kan hmu chhuak a. Chûng mize duhawm takte zînga ṭhenkhat chu eng nge ni? Engtin nge kan nunah Isua kan entawn theih ang?

1. Eng kawngtein nge Isua chu a Pa ang a nih?

Isua chuan vânah a hmangaih tak a Pa chu enin, kum chhiarsên loh chhûng chu a hnên aṭangin a lo inzir tawh a. Chuvângin, a Pa ang chiaha ngaihtuahin thil a ti a ni. (Johana 5:19 chhiar rawh.) A nihna takah chuan, a Pa mizia ṭha famkima a lantîr avângin Isua chuan: “Tupawh mi hmu chu Pa hmu a ni,” tiin a sawi thei hial a ni. (Johana 14:9) Isua mizia i zir chuan Pathian Jehova i rawn hre chiang lehzual ang. Entîr nân, Isua’n mite a ngaihsak dân chuan, Jehova’n a ngaihsak dân che a târ lang a ni.

2. Engtin nge Isua’n Jehova a hmangaihzia a târ lan?

Isua chuan: “Keiin Pa ka hmangaih leh, Pain thu mi pêk ang zêlin thil ka ti tih khawvêlin an hriatna tûr a nih hi,” tiin a sawi a. (Johana 14:31) Leia a awm lai khân, Isua chuan a Pa thu zawm a harsat hunah pawh, a thu zâwmin a hmangaihna nasa tak a lantîr a ni. Isua chuan a Pa chanchin sawi leh a Pa nêna inṭhian tûra mi dangte ṭanpui chu nuam a ti hle bawk.—Johana 14:23.

3. Engtin nge Isua’n mite a hmangaihzia a târ lan?

Bible chuan Isua “lâwmna chu mihring fate chungah a ni,” tih a sawi a. (Thufingte 8:31) Chu a hmangaihna chu mite fuih nân leh mahni hmasial lo taka mi dangte ṭanpui nâna hmangin a lantîr a ni. A thilmak tihte chuan a thiltihtheihna mai ni lovin, a khawngaihna pawh a târ lang bawk. (Marka 1:40-42) Ani chuan mite chu ngilnei tak leh thlei bîk nei lovin a cheibâwl a. A thusawite chuan thinlung ṭha pu a thu ngaithlatu zawng zawngte hnênah thlamuanna leh beiseina a pe a ni. Isua chuan mihring zawng zawngte a hmangaih avângin hrehawm tawrh leh thih chu a inhuam a. Mahse, a bîk takin a zirtîrna zâwmtute chu a hmangaih lehzual a ni.—Johana 15:13, 14 chhiar rawh.

ZIR BELHIN HMUH BELH RAWH

Isua mizia zir belh la. Amah anga hmangaihna leh thilphalna lantîr dân ngaihtuah ang che.

4. Isua’n a Pa a hmangaih

Isua entawn tûr siam chuan Pathian kan hmangaihna lantîr dân min zirtîr a. Luka 6:12 leh Johana 15:10; 17:26 chhiar rawh. Bible chângte chhiar zawh hnuah, he zawhna hi sawiho vang che u:

Isua entawnin engtin nge Jehova kan hmangaihna kan lantîr theih?

Isua chuan a Pa vâna mi a hmangaih a, ṭawngṭaiin a be ziah ṭhîn

5. Isua chuan ṭanpui ngaite a ngaihsak

Isua chuan a mamawh aiin mi dangte mamawh a ngai pawimawh zâwk a. A chauh hle lai pawhin mi dangte ṭanpui nân a hun leh thate a hmang a ni. Marka 6:30-44 chhiarin, hêng zawhnate hi sawiho vang che u:

Hemi thu aṭang hian Isua’n mi dangte chunga ngaihsakna a lantîr dân kawng ṭhenkhat chu engte nge ni?—Châng 31, 34, 41, leh 42-na en rawh.
Engin nge Isua chu mi dangte ṭanpui tûra chêttîr?—Châng 34-na en rawh.
Isua’n Jehova mizia a entawn avângin, hei hian Jehova chungchâng eng nge a zirtîr che?
Isua’n mi dangte a ngaihsak dân chu eng kawngtein nge kan entawn theih?

6. Isua chu mi thilphal tak a ni

Isua chu hausa lo mah se, a thilphal hle a, keini pawh thilphal tûrin min fuih a ni. Tirhkohte 20:35 chhiarin, he zawhna hi sawiho vang che u:

Isua sawi angin, engtin nge hlimna kan neih theih?

VIDEO chu chhuah la, a hnuaia zawhna hi sawiho vang che u.

VIDEO: “Lâk Aiin Pêkin Lukhâwng A Nei Zâwk”—A Lâk Tawi (4:00)

Hausa lo mah ila, eng kawng ṭhenkhattein nge kan thilphal theih?

I lo hre tawh em?

Bible chuan Isua hminga Jehova hnêna ṭawngṭai tûrin min zirtîr a. (Johana 16:23, 24 chhiar rawh.) Hetianga kan ṭawngṭai hian Jehova ṭhian ni tûra Isua min ṭanpuina chunga kan lâwmzia kan lantîr tihna a ni.

MI ṬHENKHAT SAWI DAN: “Pathianin kan hrehawm tawrhte a ngaihsak lo.”