KATAK 17

Kain Armej Rot Jesus?

PLAY

Ilo ad katak kõn men ko Jesus ear ba im kõm̦m̦ani ke ear pãd ijin ioon lal̦, jej katak im loi kadkad ko rej karuwaakl̦o̦k kõj ñan e im eo Jemãn, Jeova. Ta jet iaan kadkad kein rem̦m̦an? Ewi wãween jemaroñ anõke Jesus ilo mour eo ad?

1. Ilo wãween et Jesus ej ãinwõt Jemãn?

Ilo lañ ium̦win elõñ pilien iiõ ko, Jesus ear lale im katak jãn Jemãn, eo me el̦ap yokwe ippãn. Tokjãn men in, wãween an l̦õmn̦ak, eñjake, im kõm̦m̦an rej ãinwõt Jemãn. (Riit Jon 5:19.) Joñan an jejjet im jim̦we wãween an Jesus anõke kadkad ko kadkadin Jemãn, ear ba: “Jabdewõt eo em̦õj an lo ña, em̦õj an bar lo Jema.” (Jon 14:9) Ilo am̦ katak kõn kain armej rot Jesus, kwõnaaj kal̦apl̦o̦k am̦ jel̦ã kõn Jeova. Ñan waanjoñak, an Jesus tũriam̦okake armej ej kwal̦o̦k kõn wãween an Jeova eñjake kõn kwe.

2. Ewi wãween an Jesus kaalikkar bwe ej yokwe Jeova?

Jesus ear ba: “Ij kõm̦m̦ani men ko Jema ear jiroñ eõ bwe in kõm̦m̦ani kõnke lal̦ in en jel̦ã ke ij yokwe Jema.” (Jon 14:31) Ke Jesus ear pãd ijin ioon lal̦, ear kwal̦o̦k joñan an lukkuun yokwe Jemãn ikijjeen an kar pokake e meñe ilo iien ko reppen. Bareinwõt, ear aorõk ippãn Jesus kõnono kõn Jemãn im ñan jipañ ro jet ejaake juon jem̦jerã Ippãn.—Jon 14:23.

3. Ewi wãween an Jesus kaalikkar an yokwe armej?

Baibõl̦ ej ba bwe el̦ap an Jesus “lañlõñ [kõn] armej.” (Jabõn Kõnnaan 8:31) Ear kwal̦o̦k an yokwe armej ilo an kar rõjañ er im kaarmejjeteik e make ñan jipañ er. Menin kabwilõñlõñ ko ear kõm̦m̦ani ear jab baj kwal̦o̦k wõt kõn kajoor eo an, ak ear bar kwal̦o̦k kõn an tũriam̦o. (Mark 1:40-42) Ear jouj ñan armej im ear jab kwal̦o̦k kalijekl̦o̦k ñan jabdewõt. Naan ko an rar kaenõm̦m̦an im lel̦o̦k kõjatdikdik ñan aolep ro ear m̦ool bũrueer me rar roñjake e. Jesus ear m̦õn̦õn̦õ in eñtaan im mej kõn wõt yokwe eo an ñan aolep armej. Bõtab el̦aptata an yokwe ro rej pokake katak ko an.—Riit Jon 15:13, 14.

KAM̦WILAL̦L̦O̦K AM̦ MEL̦EL̦E

Kal̦apl̦o̦k am̦ jel̦ã kõn kain armej rot Jesus. Im lale ewi wãween kwõmaroñ kwal̦o̦k yokwe ekoba jouj im m̦õn̦õn̦õ in lel̦o̦k, ãinwõt kar e.

4. Jesus ej yokwe Jemãn

Joñak eo an Jesus ej kwal̦o̦k wãween eo jemaroñ kwal̦o̦k yokwe eo ad ñan Anij. Riit Luk 6:12 im Jon 15:10; 17:26. Ãlikin am̦ riiti kajjojo iaan eoon kein, bwebwenato kake kajjitõk in:

Ewi wãween jemaroñ anõke Jesus im kaalikkar bwe jej yokwe Jeova?

Jesus ear yokwe Jemãn ilañ im ekkã an kar kõnono ñane ilo jar

5. Jesus ej tũriam̦okake armej ro rej pãd ilo aikuj

Jesus ear likũt aikuj ko an ro jet m̦okta jãn aikuj ko an make. Meñe ilo iien ko ear m̦õk, ak ear kõjerbal iien im maroñ ko an ñan jipañ armej. Riit Mark 6:30-44, innem bwebwenato kake kajjitõk kein:

Ilo eoon kein, ta jet iaan wãween ko Jesus ear kwal̦o̦k an kea im l̦õmn̦ak kõn ro jet?—Lale eoon 31, 34, 41, im 42.
Ta eo ear kõm̦akũt Jesus ñan jipañ armej?—Lale eoon 34.
Kõnke Jesus ej anõke kadkad ko kadkadin Jeova, ta eo men kein rej katakin eok kõn Jeova?
Ta jet iaan wãween ko jemaroñ anõke Jesus ikijjeen wãween an kar kea im l̦õmn̦ak kõn ro jet?

6. Jesus ej juon eo ejouj im em̦õn̦õn̦õ in lel̦o̦k

Jesus ear m̦õn̦õn̦õ in lel̦o̦k meñe ear jab lõñ men ko ippãn, im ej rõjañ kõj ñan bar m̦õn̦õn̦õ in lel̦o̦k ñan ro jet. Riit Jerbal 20:35, innem bwebwenato kake kajjitõk in:

Ekkar ñan Jesus, ewi wãween jemaroñ lo m̦õn̦õn̦õ?

Kõjo̦e PIJAIN ALWÕJ eo, innem bwebwenato kake kajjitõk in:

PIJAIN ALWÕJ: “There Is More Happiness in Giving”—Excerpt (4:00)

Ta jet iaan wãween ko jemaroñ lel̦o̦k ñan ro jet meñe emaroñ jab lukkuun lõñ men ko ippãd?

Kwaar jel̦ã ke?

Baibõl̦ eo ej katakin kõj ñan jar ñan Jeova ilo etan Jesus. (Riit Jon 16:23, 24.) Ñe jej jar ilo wãween in, jej kwal̦o̦k bwe jej kam̦m̦oolol kõn men ko Jesus ear kõm̦m̦ani ñan jipañ kõj erom jeran Jeova.

JET ARMEJ REJ BA: “Armej rej eñtaan kõnke Anij ej mãlejjoñe er.”

Kõnke Jesus ej nemãmeen wõt Jemãn, ewi wãween an kõm̦m̦an ko an kaalikkar bwe Jeova ejjab kõm̦m̦an ad eñtaan?

TARLEP IN KATAK EO ILO TUKADU

Jesus ej yokwe Jeova, im ej yokwe armej. Kõnke Jesus ej ãinwõt Jemãn, ilo am̦ kal̦apl̦o̦k am̦ jel̦ã kajjien Jesus, enaaj l̦apl̦o̦k am̦ jel̦ã kajjien Jeova.