CILONGESA 17

Vati ua fua Yesu?

ZIKULENU

Vati ua fua Yesu?

Mu tue ku lilongesa mezi na vilinga via Yesu mua kele ha mavu, tue ku nongonona vifua via cili via kala navio. Kaha vifua viaco vie ku tu lingisa tu likuate neni vusamba na Ise ua muilu, Yehova. Vifua viaco vika? Kaha vati tu hasa ku tambuluisa Yesu mu muono uetu?

1. Mu vinjila vika Yesu ua lifua na Ise?

Mu makulukazi na makulukazi a miaka ya kala muilu, Yesu ue ku tala Ise na ku lilongesa ku lungano lueni. Ngeci mukemuo, ue ku singanieka, ku livua, na ku linga viuma ngeci mueni. (Tandenu Yoano 5:19.) Mua vusunga, Yesu ue ku tambuluisa vuntu vua Ise mu vutantuluke vua ku linga, ua hetele na ha ku handeka ngueni: “Ou na nji mono ange, na mono Tata.” (Yoano 14:9) Omo mu lilongesa via vuntu vua Yesu, mu ka heta ha ku tantekeya vuino Yehova. Ca ku muenako, cikeketima ce ku muesa Yesu ku vantu, ca muesa vati Yehova ue ku livua ku tuala hali yenu.

2. Vati Yesu ue ku muesa ngecize ua lema Yehova?

Yesu ua handekele ngueni: “Linga vakua mavu va ka tantekeye ngecize ange nji lema Tata, kaha ngue omo Tata ua nji sikile mukemuo vene nje ku linga.” (Yoano 14:31) Mua kele ha mavu, Yesu ua muesele vukama vua cilemo ceni kuli Ise, mu ku mu ononoka mu viose cipue vene ha vintsimbu vi ca kaluuile ku lingamo. Yesu ua lemene naua ku handeka via Ise na ku kuasa vakuavo va likuate neni vusamba.—Yoano 14:23.

3. Vati Yesu ue ku muesa ngecize ua lema vantu?

Mbimbiliya ya muesa ngecize Yesu ua lema cikuma vantu. (Visimo 8:31) Kaha ua muesele cilemo caco mu ku kaniamesa vantu na ku va kuasa na mutima uose. Ua lingile vikomoueso, vize via muesele kati lika ngolo yeni vunoni na cikeketima ceni. (Mako 1:40-42) Ua muesele ngozi ku vantu kaha ka va muesele kahangu. Vihandeka vieni via lembeziekele na ku hana lulavelelo ku vose vaze va tavele ku mu halakana. Yesu ku cizango ceni, ua tavele ku yanda na ku-tsa omo lia ku lema vantu vose. Vunoni ua lema cikuma vaze ve ku ononoka vilongesa vieni.—Tandenu Yoano 15:13, 14.

TANTEKEYENU VIKUAVO

Tantekeyenu vikuavo ku tuala ha vuntu vua Yesu. Kaha hilulenu mua ku muesela cilemo na vuhuanga ngue mua lingile ikeye.

4. Yesu ua lema Ise

Lungano lua Yesu lua tu longesa vati tu hasa ku muesa cilemo kuli Njambi. Tandenu Luka 6:12 na Yoano 15:10; 17:26. Mu nima ya ku tanda nkala mukanda, simutuilenu ha cihula eci:

Vati tu hasa ku tambuluisa Yesu, na ku muesa ngecize tua lema Yehova?

Yesu ua lema Ise ua muilu kaha ku sua kumo, ua kele na ku simutuila neni mu vivundilo mua kele hano ha mavu

5. Yesu ue ku vuila ngozi vakua ku kalekeya

Yesu ua tuamekele vizango via vakuavo ku lutue lua vizango vieni. Ambe mua honene, ua pangesele ntsimbu na ndzili yeni mu ku kuasa vantu. Tandenu Mako 6:30-44, kaha simutuilenu ha vihula vi na hatako:

Mu muzimbu ou, mu vinjila vika Yesu ua muesele ngecize ua hakele seho ku visoti via vakuavo?—Talenu vinimbu 31, 34, 41, na 42.
Vika via vuisile Yesu cizango ca ku kuasa vantu?—Talenu cinimbu 34.
Kaha mu ku linga Yesu ue ku muesa vuntu vua Yehova, vika evi viose vi tua hilula via mi longesa ku tuala hali Yehova?
Mu vinjila vika tu hasa ku tambuluisa ku lisosomua ca kele na ku muesa Yesu ku vakuavo?

6. Yesu ua pua mukua ku hana

Yesu ua puile cihuanga vutuhu ua puile cihutu, kaha ua tu kaniamesa ku pua vihuanga. Tandenu Vilinga 20:35, kaha simutuilenu ha cihula ci na hatako:

Kuliya na mezi a Yesu, vati tu hasa ku uana ndzolela ya vusunga?

Talenu VIDEO, kaha simutuilenu ha cihula ci na hatako.

VIDEO: “Ndzolela ya Kama ya Kala mu ku Hana”—Mutamba ua video (4:00)

Mu vinjila vika tu hasa ku hana vakuetu ambe nga tua pua vihutu?

Mua vi tantekeyele ni?

Mbimbiliya ya tu longesa ku vundila kuli Yehova ku hitila mu lizina lia Yesu. (Tandenu Yoano 16:23, 24.) Ku vundila mu cifua eci, ca pua ku muesa ngecize tu tantekeya viuma via tu lingila Yesu, linga tu hase ku likuata vusamba na Yehova kaha tua vi tava.

VAMO VE KU HANDEKA NGUAVO: “Njambi ua tu mbila kuti.”