TLAMACHTILI 17
¿Kenijkatsa eli Jesús?
Kema tikitaj tlen kichijki uan tlen kiijtok Jesús kema itstoya ipan Tlaltipaktli, techpaleuia ma tijnechkauikaj ya uan iTata Jehová. ¿Tlake kuajkuali tlamantli kinextia Jesús? ¿Kenijkatsa uelis tijchiuasej kej ya?
1. ¿Ipan tlake tlamantli Jesús kinextia eli kej iTata?
Jesús uejkajkia itstok iuaya iTata nepa iluikak, kiitstok tlen kichiua uan kiyekojtok miak tlamantli tlen ya. Yeka moiljuia, kiyolmati uan kichiua kej iTata (xijpoua Juan 5:19). Jesús kinextia kuajkuali tlamantli sanse kej Jehová, yeka kiijtok: “Yajaya tlen nechitstok, ya kiitstok noTata” (Juan 14:9). Uajka, tlaj ta nojua kuali tikixmatis Jesús, nojkia kuali tikixmatis Jehová. Jesús kitekipachouayaya tlen kinpanoyaya maseualmej, nopa kinextia Jehová nojkia kitekipachoua tlen mitspano.
2. ¿Kenijkatsa Jesús kinextik kiiknelia iTata?
Jesús kiijtok: “Nochi tlakamej ipan ni Tlaltipaktli ma kimachilikaj nikiknelia noTata. Uan tlen noTata nechnauatia, ya nopa nijchiuas” (Juan 14:31). Kema Jesús itstoya ipan Tlaltipaktli, kinextik tlauel kiiknelia iTata pampa kichijki tlen kiiljuik maske kemantika ouij kimatki. Nojkia, Jesús kipaktiyaya kinmachtis sekinok tlen iTata uan kinpaleuiyaya ma mouampojchiuakaj iuaya (Juan 14:23).
3. ¿Kenijkatsa kinextik Jesús kiniknelia maseualmej?
Biblia kiijtoua Jesús tlauel kiniknelia maseualmej (Proverbios 8:31). Kinextik teiknelia kema kinyolchikajki uan kinpaleuik maseualmej. Kema kichiuayaya uejueyi tlamantli amo san kinextik kipiayaya miak chikaualistli, nojkia kinextik nelia tetlasojtlayaya (Marcos 1:40-42). Jesús kuali tenojnotsayaya, amo techikoitayaya uan nochi tlen kiijtouayaya kinyolchikauayaya katli kipiayayaj kuali ininyolo. Uan amo san ya nopa kichijki, nojkia temakak inemilis uan tlaijiyouik pampa tlauel kiniknelia nochi maseualmej. Uan nojua tlauel kiniknelia katli kichiuaj kampeka kichiuasej tlen ya tlamachtik (xijpoua Juan 15:13, 14).
KUALI XIMOMACHTI
Nojua kuali ma tikixmatikaj Jesús uan ma tikitakaj kenijkatsa uelis titeiknelisej uan titemakasej tlen tijpiaj sanse kej ya kichijki.
4. Jesús kiiknelia iTata
Tlen Jesús kichijki techpaleuia ma tijmatikaj kenijkatsa uelis tijnextisej tikikneliaj toTeotsij. Xijpouakaj Lucas 6:12 uan nojkia Juan 15:10 uan 17:26. Kema inkipojtiasej sejse texto, xijnankilikaj ni tlajtlanili:
-
¿Kenijkatsa uelis tijnextisej tikikneliaj Jehová kema timoiljuiaj tlen Jesús kichijki?
Jesús kiikneliyaya iTata uan nochipa kinojnotsayaya.
5. Jesús kitekipachoua tlen kinpano maseualmej
Jesús tlauel kitekipachouayaya tlen kinpanoyaya sekinok uan amo tlen ya kipanoyaya. Maske tlauel siajtoya, ya kichiuayaya kampeka kinpaleuis sekinok. Xijpouakaj Marcos 6:30-44 uan xijnankilikaj ni tlajtlanili:
-
Kej kiijtoua ni tlapoualistli, ¿kenijkatsa Jesús kinextik kitekipachouayaya tlen kinpanoyaya sekinok? (Xikitakaj versículos 31, 34, 41 uan 42).
-
¿Kenke Jesús kinpaleuik nopa maseualmej? (Xikitakaj versículo 34).
-
¿Tlake mitsmachtia tlen Jehová kema tikita Jesús kinextik kuajkuali tlamantli?
-
¿Kenijkatsa uelis tijnextisej techtekipachoua tlen kinpano sekinok sanse kej Jesús kichijki?
6. Jesús kipaktia temakas tlen kipia
Maske Jesús amo kipixtoya miak tlamantli, ya kipaktiyaya temakas tlen kipiayaya. Uan ya kineki nojkia kiampa ma tijchiuakaj. Xijpouakaj Hechos 20:35 uan xijnankilikaj ni tlajtlanili:
-
¿Tlake kiijtok Jesús kichiua ma tiyolpakikaj?
Xikitakaj nopa VIDEO uan xijnankilikaj ni tlajtlanili:
-
¿Kenijkatsa uelis titemakasej se tlenijki tlaj amo tijpiaj miak tlamantli?
¿Tijmajtoya?
Biblia kiijtoua kema tijnojnotsasej Jehová moneki tijtekiuisej Jesús itoka (xijpouakaj Juan 16:23, 24). Kiampa tijnextisej tlauel tijpatiitaj tlen Jesús kichijki pampa nopa techpaleuia ma timouampojchiuaj iuaya Jehová.
TLEN SEKINOK KIIJTOUAJ: “ToTeotsij amo kitekipachoua kema maseualmej tlaijiyouiaj”.
-
Jesús kinextia kuajkuali tlamantli kej iTata. Yeka, ¿kenijkatsa ika tlen kichijki Jesús kinextia Jehová kitekipachoua tlen techpano?
TLEN TIMOMACHTIJKEJ
Jesús kiiknelia Jehová uan nojkia kiniknelia maseualmej. Ya kichiua kej iTata, yeka kema nojua kuali tikixmajtias Jesús, nojkia kuali tikixmajtias Jehová.
¿Tlake tijyekok?
-
¿Kenijkatsa uelis tijnextisej tikikneliaj Jehová sanse kej Jesús kichijki?
-
¿Kenijkatsa uelis tijnextisej tikinikneliaj maseualmej sanse kej Jesús kichijki?
-
¿Tlake kuajkuali tlamantli tlen Jesús kinextia tlauel mitspaktia?
NOJKIA XIKITA NI
Xikita se keski kuajkuali tlamantli tlen Jesús kinextik, uan tlen tojuantij nojkia uelis tijnextisej.
“Ma tijchiuakaj kej Jesús” (Jesús eli nopa ojtli, tlen melauak uan nemilistli, iamayo 317)
Xikita kenke tlauel moneki tijtekiuisej Jesús itoka kema timomaijtosej.
“¿Kenke moneki tijtekiuisej Jesús itoka kema timomaijtosej?” (Tlen Tematiltia, febrero 1, 2008)
¿Kiijtoua Biblia kenijkatsa nesiyaya Jesús?
¿Tlake techmachtia kema tikitaj kenijkatsa Jesús kinitayaya siuamej?
“ToTeotsij kintlepanita uan kinpatiita siuamej” (Tlen Tematiltia, septiembre 1, 2012)
Tlen nojkia mitspaktis tikitas
TLEN KINEKIJ KIMATISEJ
¿Kenijkatsa Jehová itlajtoltemakauaj tlamachtiaj ika Biblia?
Kema Jehová itlajtoltemakauaj mitsmachtisej ika Biblia amo mitsinamasej uan uelis tijtekiuis Biblia tlen ta tijnekis. Nojkia uelis tikintlaneuis sekinok kej mochampoyouaj o mouampoyouaj.
