ƐZUKOALƐDEƐ 17
Kɛzi Gyisɛse De Ɛ?
Saa yɛsukoa mɔɔ Gyisɛse hanle nee ninyɛne mɔɔ ɔyɛle ye wɔ azɛlɛ ye azo la anwo debie a, yɛnwu subane bie mɔ mɔɔ maa yɛbikye ye nee ɔ Ze Gyihova a. Subane ngɛnlɛma ɛhye mɔ bie a le boni? Na kɛ ɔkɛyɛ na yɛazukoa Gyisɛse wɔ yɛ ɛbɛlabɔlɛ nu ɛ?
1. Ndenle boni mɔ azo a Gyisɛse le kɛ ɔ Ze a?
Gyisɛse nleanle ɔ Ze ne mɔɔ lɛ ɛlɔlɛ la na ɔzukoale ye wɔ anwuma lɔ wɔ ɛvolɛ mgbe mgbe dɔɔnwo anu. Ɔti, ɔdwenle, ɔte nganeɛ na ɔyɛ ye ninyɛne kɛ ɔ Ze la. (Kenga Dwɔn 5:19.) Nɔhalɛ nu, Gyisɛse da ɔ Ze subane ali pɛpɛɛpɛ ɔti ɔhanle kɛ: “Mɔɔ ɛnwu me la ɛnwu Selɛ ne noko.” (Dwɔn 14:9) Mekɛ mɔɔ ɛlɛsukoa Gyisɛse subane ne anwo debie la, ɛbanwu Gyihova kpalɛ. Kɛ neazo la, kɛzi Gyisɛse dwenle menli nwo la maa yɛnwu kɛzi Gyihova dwenle ɛ nwo la.
2. Kɛzi Gyisɛse ɛla ye ali kɛ ɔkulo Gyihova ɛ?
Gyisɛse hanle kɛ: “Amaa ewiade ne anwu kɛ mekulo Selɛ ne la, melɛyɛ mɔɔ Selɛ ne ɛha ɛhile me kɛ menyɛ la ala.” (Dwɔn 14:31) Mɔɔ Gyisɛse wɔ azɛlɛ ye azo la, ɔyɛle tieyɛ ɔmaanle ɔ Ze wɔ mekɛ bɔbɔ mɔɔ ɛnee ɔyɛ se kɛ ɔbayɛ zɔ la na ɔlua zo ɔlale ye ali kɛ ɔkulo ye kpole. Eza kɛmɔ ɛnee Gyisɛse kulo ɔ Ze la ati, ɛnee dahuu ɔkulo kɛ ɔka ɔ nwo edwɛkɛ na ɔboa awie mɔ ɔmaa bɛ nee ye nyia agɔnwolɛvalɛ.—Dwɔn 14:23.
3. Kɛzi Gyisɛse ɛla ye ali kɛ ɔkulo menli ɛ?
Baebolo ne ka kɛ Gyisɛse “[kulo] alesama edwɛkɛ kpalɛ.” (Mrɛlɛbulɛ 8:31) Ɔlale ɛlɔlɛ ɛhye ali ɔlua awie mɔ mɔɔ ɔmaanle bɛ anwosesebɛ na ɔvile ye ɛhulolɛ nu ɔboale bɛ la azo. Ɔyɛle nwanwane ninyɛne mɔɔ kile kɛ ɔlɛ tumi na eza ɔdwenle menli nwo la. (Maake 1:40-42) Ɔ nee menli lile ye kɛnlɛma yɛɛ yeannyia awie anwo adwenle ɛtane. Ye edwɛkɛ kyekyele ahonlekpalɛma kɔsɔɔti mɔɔ diele ye la arɛle na ɔmaanle bɛnyianle anyelazo. Gyisɛse nyianle ɛhulolɛ kɛ ɔbanwu amaneɛ na yeawu ɔluakɛ ɔkulo alesama kɔsɔɔti. Noko ɔkulo menli mɔɔ tie ye ngilehilelɛ ne la kpalɛ.—Kenga Dwɔn 15:13, 14.
SUKOA DƆƆNWO
Sukoa Gyisɛse subane ne anwo ninyɛne dɔɔnwo. Na sukoa kɛzi bɛda ɛlɔlɛ nee atiakunlukɛnlɛma ali kɛ mɔɔ ɔyɛle la.
4. Gyisɛse kulo ɔ Ze
Gyisɛse neazo ne maa yɛnwu kɛzi ɔwɔ kɛ yɛda ye ali kɛ yɛkulo Nyamenle la. Kenga Luku 6:12 yɛɛ Dwɔn 15:10; 17:26. Ɛkenga tɛkese ko biala ɛwie a, bɛzuzu kpuya ɛhye anwo:
-
Kɛ ɔkɛyɛ na yɛazukoa Gyisɛse na yɛahile kɛ yɛkulo Gyihova ɛ?
Ɛnee Gyisɛse kulo ɔ Ze mɔɔ wɔ anwuma la na ɔ nee ye dendɛle fane dɔɔnwo wɔ asɔneyɛlɛ nu
5. Gyisɛse dwenle menli mɔɔ hyia moalɛ la anwo
Gyisɛse dwenlenle awie mɔ anwo dɛlale ɔ nwo. Ɔnyianle mekɛ ɔmaanle menli na ɔbɔle mɔdenle ɔboale bɛ wɔ mekɛ bɔbɔ mɔɔ ɛnee yevɛ la. Kenga Maake 6:30-44, na akee bɛzuzu kpuya ɛhye mɔ anwo:
-
Wɔ kɛlɛtokɛ ɛhye anu, ndenle boni mɔ a Gyisɛse luale zo hilele kɛ ɔdwenle awie mɔ anwo a?—Nea ngyehyɛnu 31, 34, 41 yɛɛ 42.
-
Duzu a hanle Gyisɛse maanle ɔboale awie mɔ a?—Nea ngyɛnu 34.
-
Kɛmɔ Gyisɛse lale Gyihova subane ali la ati, duzu a ɛhye maa ɛnwu ye wɔ Gyihova anwo a?
-
Ndenle boni mɔ a yɛbahola yɛalua zo yɛazukoa kɛzi Gyisɛse dwenle menli nwo la ɛ?
6. Gyisɛse ati ɛnyɛ se
Gyisɛse hyɛle awie mɔ debie ɔnva nwo kɛ ɛnee ɔnlɛ ninyɛne dɔɔnwo la, na ɔhanle ɔhilele yɛ kɛ yɛhyɛ debie. Kenga Gyima ne 20:35, na akee bɛzuzu kpuya ɛhye anwo:
-
Kɛ mɔɔ Gyisɛse hanle la, duzu a bamaa yɛ nye alie a?
Ye VIDIO ne, na akee bɛzuzu kpuya ɛhye anwo.
-
Saa yɛnlɛ ninyɛne dɔɔnwo bɔbɔ a, ndenle boni mɔ a yɛbahola yɛalua zo yɛahyɛ debie a?
Asoo ɛze?
Baebolo ne kilehile yɛ kɛ yɛzɛlɛ Gyihova wɔ Gyisɛse duma nu. (Kenga Dwɔn 16:23, 24.) Saa yɛdua adenle ɛhye azo yɛyɛ asɔne a, ɔkile kɛ yɛ nye sɔ mɔɔ Gyisɛse ɛyɛ ɛmaa yɛ amaa yɛayɛ Gyihova agɔnwo mɔ la.
BIE MƆ KA KƐ: “Nyamenle ɛndwenle yɛ amaneɛnwunlɛ nwo.”
-
Kɛmɔ Gyisɛse da ɔ Ze subane ali la ati, kɛzi ye nyɛleɛ kile kɛ Gyihova dwenle yɛ nwo ɛ?
EDWƐKƐ TITILI
Gyisɛse kulo Gyihova yɛɛ ɔkulo menli. Kɛmɔ Gyisɛse le kɛ ɔ Ze la ati, saa ɛnwu Gyisɛse kpalɛ a, ɛbanwu Gyihova kpalɛ.
Ndinu
-
Kɛ ɔkɛyɛ na yɛahulo Gyihova kɛ mɔɔ Gyisɛse yɛle la ɛ?
-
Kɛ ɔkɛyɛ na yɛahulo menli kɛ mɔɔ Gyisɛse yɛle la ɛ?
-
Gyisɛse subane boni a ɛ nye die nwo kpalɛ a?
KPONDƐ DƆƆNWO
Nea Gyisɛse subane bie mɔ mɔɔ yɛbahola yɛazukoa la.
“Sukoa Gyisɛse . . .” (Gyisɛse—Adenle Ne, Nɔhalɛ Ne, Ngoane Ne, mukelɛ 317)
Nea deɛmɔti ɔhyia kɛ yɛyɛ asɔne wɔ Gyisɛse duma nu la.
“Duzu Ati A Ɔwɔ Kɛ Yɛdua Gyisɛse Duma Nu Yɛyɛ Asɔne A?” (Ɛzinzalɛ Arane, February 1, 2008)
Asoo Baebolo ne ka kɛzi Gyisɛse de la anwo edwɛkɛ?
Duzu a yɛsukoa yɛfi kɛzi Gyisɛse nee mraalɛ lile la anu a?
“Nyamenle Bu Mraalɛ Yɛɛ Ɔdi Bɛ Eni” (Ɛzinzalɛ Arane, October 1, 2012)
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
