17 YACHACHIKUY
¿Imayna sunquyuqtaq Jesusqa?
Kay pachapi kaspan Jesuspa tukuy ima ruwasqanmanta hinaspa willakusqanmanta yachaymi astawan yanapawasun payman chaynataq taytanmanpas asuykunapaq. ¿Jesusqa imayna sunquyuqtaq? ¿Imaynatam Jesusta qatipakuchwan?
1. ¿Imakunapim Jesusqa taytanman rikchakun?
Jesusqa taytan Jehova Dioswanmi hanaq pachapi wara-waranqantin wata karqa. Payqa taytanpa ruwasqantam chaynataq imayna kasqantam qawarqa hinaspam qatipakurqa. Chaymi Jesusqa taytan hina piensan, imatapas ruwan chaynataq pitapas kuyan (leey Juan 5:19). Jesusqa imayna sunquyuq kasqanpi taytanman rikchakusqanraykum nirqa: “Ñuqata rikuwaqniyqa taytaytapas rikurunñam”, nispa (Juan 14:9). Chaymi Jesusmanta allinta yachaspaykiqa Jehova Diosmantapas allinta yachanki. Jesusqa runakunatam llakipayarqa, Jehova Diospas chayna llakipayakuqmi.
2. ¿Imapaqmi Jesusqa kallpanchakurqa taytanta kuyasqanrayku?
Jesusmi nirqa: “Taytay kuyasqayta runakuna yachanankupaqmi taytaypa kamachiwasqanman hina imam kaqta ruwachkani”, nispa (Juan 14:31). Jesusqa kay pachapi sasachakuykunapi kaspanpas taytanta anchata kuyasqanraykum hinalla kasukurqa. Chaymantapas kusisqallañam taytanmanta runakunaman yachachirqa hinaspapas yanaparqam taytanta riqsinankupaq (Juan 14:23).
3. ¿Imakunatam Jesusqa ruwarqa runakunata kuyasqanrayku?
Bibliapim willawanchik Jesusqa ‘ancha-anchata runakunata kuyasqanmanta’ (Proverbios 8:31). Chaymi runakunapa sunqunkuta tiyaykachirqa hinaspa yanapaykurqa. Milagrokunatapas ruwarqa runakunata llakipayasqanraykum, manam atiyniyuq kasqanta runakuna yachanallanpaqchu (Marcos 1:40-42). Jesusqa llampu sunqum karqa hinaspapas llapallan runakunatam llakipayarqa. Paypa yachachisqanta uyarispankum llakisqa sunquyuq runakunapas kusisqa tarikurqaku. Chaymantapas lliw runakunata anchata kuyawasqanchikraykum ñakarispa wañukurqa, kasukuqninkunataqa astawanraqmi Jesusqa kuyan (leey Juan 15:13, 14).
ASTAWAN YACHAYKUSUN
Jesus imayna sunquyuq kasqanta yachaykuspayá kuyakuq hinaspa qukuykuq kasqanta qatipakusun.
4. Jesusqa taytantam anchata kuyan
Jesusqa yachachiwarqanchikmi Diosta pay hina kuyanapaq. Leeychik Lucas 6:12 hinaspa Juan 15:10; 17:26, chaymantañataq qatiqninmanta rimariychik:
-
Jesusta qatipakuspaqa, ¿imakunatam Diosta kuyasqanchikrayku ruwananchik?
Jesusqa taytan Jehova Diostam anchata kuyarqa, chaymi sapa kutilla mañakurqa.
5. Jesusqa runakunatam llakipayarqa
Jesusqa kikillanpi piensananmantaqa hukkunapim astawanqa piensaq, chaymi pisipasqaña kaspanpas hukkunata yanapaykunanpaq tiempochakurqa. Leeychik Marcos 6:30-44 hinaspa qatiqninmanta rimariychik:
-
Leesqanchikman hina, ¿imakunatam Jesusqa ruwarqa runakunata llakipayasqanrayku? (Kaqmanta leeykuychik 31, 34, 41, 42 versiculokunata).
-
¿Imanasqam Jesusqa chay runakunata yanaparqa? (Kaqmanta leeykuychik 34 versiculota).
-
Jesusqa taytanta qatipakuspam runakunata yanaparqa, chaynaqa ¿imayna sunquyuq Jehova Dios kasqantataq niwaq?
-
¿Imaynatataq runakunata yanapachwan Jesus hina?
6. Jesusqa qukuykuqmi karqa
Jesusqa mana tukuy imayuq kachkaspanpas qukuykuqmi karqa, chayna kasqanqa ñuqanchiktapas kallpanchawanchikmi qukuykuq kanapaq. Leeychik Hechos 20:35 hinaspa qatiqninmanta rimariychik:
-
Jesuspa nisqanman hinaqa, ¿imataq astawan kusichiwanchik?
VIDEOTA qawaykuychik hinaspa qatiqninmanta rimariychik:
-
¿Atichwanchu qukuykuq kayta wakcha kaspapas? ¿Imakunatataq ruwachwan?
Yachaykunaykipaq
Bibliapim yachachiwanchik Jehova Diosta mañakuspaqa “Jesuspa sutinpim mañakuykiku” nispa tukunapaq (leeychik Juan 16:23, 24). Chaywanmi agradecekunchik Jehova Diosman asuykunapaq Jesus yanapawasqanchikmanta.
WAKIN RUNAKUNAM NINKU: “Diosqa manam llakikunchu runakuna ñakariptinqa”, nispanku.
-
Jesusqa llakipayakuqmi karqa, chaynaqa ¿imayna sunquyuqtaq Jehova Diosqa kanman?
YUYARIYKUSUN
Jesusqa taytan Jehova Diostam anchata kuyan, runakunatapas kuyanmi. Jesusmanta allinta yachaspaykiqa Jehova Diosmantapas allintam yachanki.
¿Ima niwaqtaq?
-
¿Imapaqmi Jesus hina kallpanchakuchwan Jehova Diosta kuyasqanchikrayku?
-
¿Imapaqmi Jesus hina kallpanchakuchwan runakunata kuyasqanchikrayku?
-
¿Jesuspa imayna sunquyuq kasqantaq astawan kusichisunki?
ASTAWAN YACHANAYKIPAQ
Jesuspa imayna kasqanta qatipakunaykipaq kay yachachikuyta leey.
“Jesustayá qatipakusun” (Jesusqa ñanmi, chiqapmi, kawsay qukuqmi, 317 pagina)
¿Imanasqam Jesuspa sutinpi Jehova Diosta mañakunanchik? Chaymanta kay yachachikuypi leey.
¿Bibliapiqa ninchu Jesus imayna rikchayniyuq kasqanmanta? Chaymanta kaypi yachaykuy.
“¿Imaynataq Jesuspa rikchayninqa karqa?” (Tarinkim jw.org nisqanpi)
Jesusqa warmikunatam respetarqa, ¿imaynatam payta qatipakuchwan?
“Diosqa respetanmi warmikunata” (Llaqta Cuidaq, octubre-diciembre 2012)
Kaykunatapas leeykuy
TAPUKUYKUNA
¿Imaynatam Jehova Diospa testigonkunaqa bibliamanta yachachinku?
Jehova Diospa testigonkunaqa runamasinchiktam yanapaniku bibliamanta sumaqta yachanankupaq. Munasqayki bibliawanmi estudiawaq hinaspapas invitawaqmi aylluykikunata chaynataq amistadnikikunatapas.
