XIDONDZRO 17
Xana Yesu i Mhunu Wa Ku Tsrhamisisa Kuyini?
Loko hi dondzra hi leswi Yesu a swi hlayiki ni leswi a swi yentxiki na a ha li la misaveni, hi vona wumhunu lebyi hi yentxaka hi navela ku va vanghanu vake ni va Papayi wake, Yehovha. Xana hi wani man’wana ya matsrhamela lama nyonxisaka ya Yesu, nakone hi nga mu yetiselisa kuyini a wuton’wini byezru?
1. Xana Yesu a fana ni Papayi wake hi tindlela tini?
Na a li matilweni, Yesu a vone a tlhela a dondzra ka Papayi wake hi malembe manyingi ngopfu swinene. Hi xivangelo lexo, a pimisa, a titwa nakone a tizra hi lani Papayi wake a tizraka ha kone. (Dondzra Yohan 5:19.) Kunene, Yesu a tekelela wumhunu bya Papayi wake hi ku helela lakakuva a te: ‘Lweyi a ndzri voniki, a voni Tatana.’ (Yohan 14:9) Loko u dondzra hi wumhunu bya Yesu, u ta mu tiva ku yampswa Yehovha. Hi xikombiso, ndlela leyi Yesu a kombisiki timpswalu ka vhanu ha yone, yi kombisa leswi Yehovha a titwisaka xiswone ha wene.
2. Xana Yesu a swi kombisise kuyini leswaku awa mu zrandzra Yehovha?
Yesu a te: ‘Leswaku misava mi tiva leswaku ndzri zrandzra Tatana ni leswaku ndzri tizra swanga heswi Tatana a ndzri leletisiki xiswone.’ (Yohan 14:31) Na a ha li la misaveni, Yesu a kombise leswaku a mu zrandzra ngopfu Papayi wake hi ku mu yingiseta nambi loko swi kazrata. Nakone leswi a a mu zrandzra ngopfu Papayi wake, nkama hinkwawu a a djula ku khanela ha yene a tlhela a pfuna van’wana ku kulisa wunghanu na yene.—Yohan 14:23.
3. Yesu a swi kombisise kuyini leswaku awa va zrandzra vhanu?
Bibele dzri li Yesu a ‘tsrhavela vana va vhanu’. (Amaproverbia 8:31) A kombise lizrandzru ledzri hi ku kutxa vhanu a tlhela va pfuna na swi sukela mbilwini. A yentxe mahlolana lama kombisiki leswaku a a ngo va ni ntamu ntsena kambe a a tlhela a va ni timpswalu. (Marka 1:40-42) A khome vhanu hi ndlela leyinene nakone a nga vanga na xihlawuhlawu. Mazritu yake ma txhavelele ma tlhela ma nyika dumbo vhanu hinkwavu va timbilu letinene lava a va yingiseta. Yesu a a tiyimisele ku xaniseka ni ku fa hi leswi a a zrandzra vhanu hinkwavu. Kambe a zrandzra ngopfungopfu lava landzraka tidondzro take.—Dondzra Yohan 15:13, 14.
KELISISA
Dondzra leswi yengetelekiki hi wumhunu bya Yesu, u tlhela u vona ndlela ya ku kombisa lizrandzru ni moya wa ku hanana ku fana na yene.
4. Yesu awa mu zrandzra Papayi wake
Xikombiso xa Yesu xi hi dondzrisa ndlela ya ku kombisa leswaku ha mu zrandzra Xikwembu Nkulukumba. Dondzrani Luka 6:12 na Yohan 15:10; 17:26. A ntsrhaku ka ku dondzra ndzrimana ha yin’we, bulani hi xivutiso lexi:
-
Ku fana na Yesu, xana hi nga swi kombisisa kuyini leswaku ha mu zrandzra Yehovha?
Yesu a a zrandzra Papayi wake wa le tilweni nakone a a kotisa ku khanela na yene hi xikhongoto
5. Yesu awa va twela wusiwana vhanu lava pfumalaka
Yesu a zrangise swivileleko swa vhanu van’wana. Nambi loko a kazralile, a tizrise nkama ni ntamu wake akuva a pfuna vhanu. Dondzrani Marka 6:30-44, mi gama mi bulisana hi swivutiso leswi:
-
Ka wudzrunguli lebyi, u kume leswaku hi tini tin’wana ta tindlela leti Yesu a kombisiki ha tone leswaku a a zron’weka hi vambeni?—Vona tindzrimana 31, 34, 41 ni 42.
-
I yini lexi susumeteliki Yesu ku pfuna vhanu?—Vona ndzrimana 34.
-
Leswi Yesu a nga ni wumhunu bya ku fana ni bya Yehovha, xana leswo hinkwaswu swi ku dondzrisa yini ha Yehovha?
-
Hi tini tin’wana ta tindlela leti hi nga tekelelaka ha tone mbilu ya Yesu ya ku zron’weka hi vambeni?
6. Yesu a ni moya wa ku hanana
Yesu a a ni moya wa ku hanana nambi leswi a a nge na swinyingi hi tlhelo dzra nyama, nakone a hi kutxa ku va ni moya wa ku hanana na hine. Dondzrani Amintiṛo 20:35, mi gama mi bulisana hi xivutiso lexi:
-
Hi ku ya hi Yesu, i yini leswi taka hi yentxa hi tovoka, kumbe hi nyonxa?
Vonani VHIDIYU, mi gama mi bulisana hi xivutiso lexi landzrelaka.
-
He tini tin’wana ta tindlela leti hi nga hananaka ha tone, nambiloko hi nge na swinyingi hi tlhelo dzra nyama?
A wu swi tiva?
Bibele dzri hi dondzrisa ku khongota ka Yehovha hi vito dzra Yesu. (Dondzra Yohan 16:23, 24.) Loko hi khongota hi ndlela leyo, hi kombisa leswaku ha khensa leswi Yesu a swi yentxiki akuva a hi pfuna ku va vanghanu va Yehovha.
VAN’WE VA LI: “Xikwembu Nkulukumba a nga na mhaka na hine nambi hi xaniseka.”
-
Leswi Yesu a nga ni wumhunu bya ku fana ni bya Papayi wake, xana mintizro yake yi swi kombisa hi ndlela yini leswaku Yehovha awa zron’weka ha hine?
NKATSRAKANYU
Yesu awa mu zrandzra Yehovha a tlhela a zrandzra ni vhanu. Leswi Yesu a fanaka ni Papayi wake, loko u ya u tiva Yesu, u ta ya u tiva Yehovha.
Mpfuxeto
-
Xana hi nga swi kombisa hi ndlela yini leswaku ha mu zrandzra Yehovha, ku fana na Yesu?
-
Xana hi nga kombisa hi ndlela yini leswaku ha va zrandzra vhanu, ku fana na Yesu?
-
Ka wumhunu bya Yesu, i yini leswi swi ku kokaka ngopfu?
HANDZRISISA
Dondzra mayelana ni man’we ya matsrhamela ya Yesu lawa hi nga ma yetiselaka.
“Yetisela Yesu Hi . . .” (Yesu— I Ndlela, Ntiyiso Ni Wutomi, tluka 317)
Kambisisa leswaku ha yini swi li swa lisima ku tizrisa vito dzra Yesu loko hi khongota.
Xana Bibele dzri hlaya swa kukazri hi leswi Yesu a a tsrhamisise xiswone hi tlhelo dzra nyama?
“Xana Yesu A A Ni Matsrhamela Muni?” (Leswi kumekaka ka jw.org)
Xana hi nga dondzra yini ka ndlela leyi Yesu a khomiki ha yone va xisati?
