ISOMO LYA 17
Yezu Ali Muntu wa Gurhi?
Erhi rhuyiga lugenda emyanzi Yezu adesire n’ebi ajijire amango ali hanw’igulu, rhunabone morhere manji gakarhuma rhwamuzigira rhuzigire n’Ishe, Yehova. Morhere gahi na gahi ago? Na gurhi rhwakakulikira olwiganyo lwa Yezu omu kalamo kirhu?
1. Omu njira zihi Yezu ashushiremwo Ishe?
Omu miliyare y’emyaka Yezu alilamire empingu, alolerako Ishe w’obuzigire gurhi akola, na ntyo aciyigiriza okukola ak’Ishe. Co cirhuma arhanya, anaciyumve, n’okukola ak’Ishe. (Osome Yowane 5:19.) Yezu anayerekane bwinja-bwinja amorhere g’Ishe, co carhumaga aderha ntya: “Ombwine erhi abwine na Larha.” (Yowane 14:9) Oku wagendekera waciyigiriza binji okubiyerekire Yezu, ko wanahikira aha wamanya Yehova bwinja. Kwa lwiganyo, Yezu akagishibirira abantu bwenene, n’oko kuyerekine oku Yehova naye anarhushibirire.
2. Gurhi Yezu ayerekinemwo oku aba azigire Yehova?
Yezu aderha ntya: “Kukwanine igulu limanye oku nzingira Larha n’oku ebi Larha antegesire byo njira.” (Yowane 14:31) Erhi Yezu ali hanw’igulu, ayerekine kunganaci alizigire Ishe omu kumurhumikira ciru n’omu kanga kali kazibu okujira ntyo. Kandi, alisimire okubwira abandi okubiyerekire Ishe n’okubarhabala bajire obwîra bwa hofi-hofi haguma n’Ishe.—Yowane 14:23.
3. Gurhi Yezu ayerekinemwo oku aba azigire abantu?
Ebibliya eyerekine oku Yezu aba “azigire bene bantu bwenene.” (Emigani 8:31, NWT; amahugûlo g’idako) Yezu ajirire bene bantu bintu binji ly’abayereka oku abazigire, akabaha omurhima n’okubarhabala. Ebisomerine ajijire birhayerekanaga emisi yage kone, cikone kandi byayerekine obwonjo ajira kuli bene bantu. (Marko 1:40-42) Akagijirira abantu boshi aminja, arhanagwerhe kabôlo. Enderho zage zakag’irhuliriza n’okuha abantu birhohye bakagimuyumvirhiza obulangalire. Yezu ayemera okulibuka n’okufâ bulya alizigire bene bantu. Cikone, bala basima okukulikira enyigirizo zage bw’aba azigire bwenene.—Osome Yowane 15:13, 14.
HUMBIRIRA LY’OHUGÛKWA
Oyige bintu binji okubiyerekire amorhere ga Yezu. Onaciyigirize gurhi wakakayereka abandi oku obazigire n’oku obashibirire aka Yezu.
4. Yezu aba azigire Ishe
Olwiganyo lwa Yezu lurhuyeresire gurhi rhwakakayerekana oku rhuzigire Nnâmahanga. Osome Luka 6:12 na Yowane 15:10; 17:26. Enyuma z’okusoma ngasi lwandiko, oganirire er’idoso:
-
Gurhi rhwakayerekanamwo oku rhuzigire Yehova aka Yezu?
Yezu alizigire Ishe w’omu mpingu ananakag’imushenga ngasi mango
5. Yezu anakashibirira abantu
Yezu akagishokoza amalagirire g’abandi ahali h’okushokoza amalagirire gage yenene. Ciru n’amango alirhamire bwenene akolesa akasanzi kage n’emisi yage ly’arhabala abandi. Osome Marko 6:30-44, na buzinda oganirire aga madoso:
-
Mw’ogo mwanzi, bici biyerekine oku Yezu akagishibirira abandi?—Olole omulongo gwa 31, 34, 41, na 42.
-
Bici byakagishumya Yezu okurhabala abantu?—Olole omulongo gwa 34..
-
Bulya Yezu ayerekine n’obwalagale amorhere gali nk’aga Yehova, oko kukuyigirizize oku Yehova ajira morhere gahi?
-
Gurhi rhwakajira lyo rhuyerekana oku rhushibirire abandi aka Yezu?
6. Yezu aba muhânyi
Yezu ali muhânyi ciru ankaba arhagwerhe bintu binji, arhuhîre omurhima oku rhukaha abandi. Osome Ebijiro by’Entumwa 20:35, na buzinda oganirire er’idoso:
-
Bici Yezu adesire rhwakajira lyo rhuba n’obushagaluke?
Olole EVIDEO, na buzinda oganirire idoso likulikire.
-
Gurhi rhwakahâna ciru ankaba rhurhagwerhi bintu binji?
K’omanyire?
Ebibliya erhuyigirizize oku rhukashenga Yehova kugerera okw’izino lya Yezu. (Osome Yowane 16:23, 24.) Erhi rhujira ntyo rhunayerekane oku rhuvuzire omunkwa kw’ebi Yezu arhujirire lyo rhuba bîra ba Yehova.
HALI ABANTU BADERHA NTYA: “Nnâmahanga arhashibirira amalibuko girhu.”
-
Bulya Yezu ayerekine n’obwalagale amorhere gali nk’ag’Ishe, gurhi ebijiro byage biyerekinemwo oku Yehova anarhushibirire?
KWA BOFOFI
Yezu aba azigire Yehova, na kandi aba azigire abantu. Bulya Yezu anakayerekana amorhere gali nk’ag’Ishe, erhi wakagendekera wayiga enyanya zage wanahikira aha wamanya Yehova bwinja.
Okucikengeza
-
Gurhi rhwakayerekanamwo oku rhuzigire Yehova aka Yezu?
-
Gurhi rhwakayerekanamwo oku rhuzigire abantu aka Yezu?
-
Borhere buhi bwa Yezu bukushagalwire bwenene?
OCIYIGIRIZE KWA BULÎRI
Olole morhere maguma na maguma ga Yezu nirhu rhwakaciseza okuyerekana.
“Ili Kufuata Mufano wa Yesu, Ukuwe . . .” (Yesu—Ni Njia, Kweli, na Uzima, ukurasa wa 317)
Olole bulya gurhi rhushinganine rhusalire kugerera izino lya Yezu.
“Juu ya Nini Tusali mu Jina ya Yesu?” (Ilabiro ly’Akalalizi, ly’omu lusiku 1/2/2008)
Ka hali ebi Ebibliya edesire lugenda iranga lya Yezu?
Bici oku Yezu akagijirira abakazi kurhuyigirizize?
Olole n'Ebi Bikulikire
AMADOSO GALUG’IDOSIBWA
Gurhi Abahamirizi ba Yehova Bayigiriza Abantu Ebibliya?
Kugerera eprograma y’okuganîra ohâbwa n’Abahamirizi ba Yehova, wanakolesa Ebibliya onalonzize. Orharhindiraga okuyegereza abantu b’omulala gwawe n’abîra okucilunga haguma nawe okw’ifunzo lyawe ly’Ebibliya.
